KuBaroma
3 Ani kuba muJuda kugwasyaanzi, naakuti kupalulwa kugwasyaanzi? 2 Kugwasya loko munzila zyoonse. Chakusaanguna, bakapegwa makani aasalala aaLeza. 3 Ani kaambo kalaali aawa? Kuti kakuli kuti bamwi babo bakabula lusyomo, kubula lusyomo kwabo kujana kwapa kuti Leza atasyomeki na? 4 Teembubo pe! Leza ajanike kali wachoonzyo nikuba kuti kwajanika kuti bantu boonse balabeja, mbuli mbukulembedwe kuti: “Kuchitila kuti kuboneke kuti uliluleme mumajwi aako akuti uzunde wanoobetekwa.” 5 Nikuba oobo, kuti kutalulama kwesu kakutondeezya bululami bwaLeza, ani mpo tutyeni? Twaambe kuti Leza taluleme na chiindi natondeezya bukali bwakwe? (Ndilikwaambuula mbuli mbubayeeya bantu.) 6 Teembubo pe! Leza uliluleme nkaambo kaansinga taluleme pe, walikunooyibeteka biyeni nyika?
7 Pesi kuti kubeja kwangu kakulikupa kuti kasimpe kaLeza kazibwe loko kuti alemekwe, nkamboonzi nindilikubetekwa mbuli sizibi? 8 Alubo nkamboonzi nimutaambi mbuli mbubatubejelezya bamwi bantu, baamba kuti iswe tuti, “Atuchite zintu zibi kuchitila kuti tusikilwe aazintu zibotu”? Kubetekwa kwabantu aaba kuleendelana abululami.
9 Ani mpo tutyeni? Iswe tulisumpukide na kwiinda bamwi boonse? Peepe! Nkaambo mbuli mbutwaamba kale, maJuda amaGrikki boonse beendelezegwa aachibi, 10 mbuli mbukulembedwe kuti: “Taakwe muntu uululeme pe, naaba uumwi. 11 Taakwe muntu uumvwisisisya pe, taakwe muntu uuyanduula Leza pe. 12 Bantu boonse baleya, boonse tabachigwasyi pe. Taakwe muntu uufwida bamwi luzyalo, naaba uumwi biyo.” 13 “Goyooyo lyabo nkabanda kali bukwazi, beena bantu alulimi lwabo.” “Buyoka bwanzoka buli mumilomo yabo.” 14 “Munkanwa lyabo muzwide lutuko abukali.” 15 “Mawulu aabo achijaanina kukutila ganzi.” 16 “Lunyonyooko amapenzi zili munzila zyabo, 17 alubo teebayiziba pe nzila yaluumuno.” 18 “Tabamuyoowi pe Leza mumeso aabo.”
19 Tulizi kuti zintu zyoonse zyaambwa aaMulawu, zyakalembelwa bantu bali aansi aaMulawu, kuchitila kuti milomo yoonse ijalwe akuti nyika yoonse yeelele kupegwa chisubulo chizwa kuli Leza. 20 Nkinkaako, taakwe uutazoowambwe kuti uliluleme kunembo lyakwe kwiinda mumilimu yamulawu, nkaambo mulawu upa kuti tuchizibe kabotu chibi.
21 Pesi lino bululami bwaLeza bwatondeezegwa kakutakwe mulawu, mbuli Mulawu aBapolofita mbuzipa bukamboni bwakuti, 22 Leza ulakonzya kwaamba muntu woonse ulaalusyomo kuti uliluleme akaambo kakuba aalusyomo muli Jesu Kkristu. Nkaambo taakwe musiyano pe. 23 Nkaambo bantu boonse bakabisya alubo tabasikili pe kubulemu bwaLeza 24 alubo muluzyalo lwakwe lupati, Leza wakabapa chipo chitabbadalwi, chakubaamba kuti baliluleme kwiinda mukubaangununa kabelesya chinunuzyo chakabbadalwa aaKkristu Jesu. 25 Leza wakamupa kuti abe chipayizyo chakumaninsya milandu kuli baabo* basyoma muganzi lyakwe. Wakachita oobo kuti atondeezye bululami bwakwe, nkaambo kwiinda mukutafwambaana kunyema kwakwe, Leza wakali kulekelela zibi zyakachitwa chiindi. 26 Eezi zyakali kuzootondeezya bululami bwakwe muchiindi eechino, kuchitila kuti abe mululami nikuba chiindi naamba muntu ulaalusyomo muli Jesu kuti uliluleme.
27 Kuchili kamwi kaambo na kapa kuti tulidunde? Peepe, taachikwe pe. Ani nguuli mulawu uutukasya kuti tulidunde? Mulawu wamilimu na? Peepe, pesi mulawu walusyomo. 28 Nkaambo iswe tulizi kuti muntu waambwa kuti uliluleme akaambo kalusyomo kutali akaambo kamilimu yamulawu. 29 Leza ngwamaJuda kupela na? Ani teeLeza wabo na ambabo bantu bazisi? Kwaamba choonzyo, ambabo nguLeza wabo. 30 Mbukunga Leza ngumwi, bantu bapalwidwe uzoobaamba kuti baliluleme akaambo kalusyomo alubo bantu batapalwidwe uzoobaamba kuti baliluleme kwiinda mulusyomo lwabo. 31 Nkinkaako, tuusowe na mulawu akaambo kalusyomo lwesu? Peepe, iswe tusumpula mulawu.