Makani Aakalembwa aaJohane
16 “Ndamubuzya zintu eezi, kuchitila kuti lusyomo lwanu lutamani* pe. 2 Bantu bazoomutanda muchikombelo. Kwaamba choonzyo, chizoosika chiindi aawo muntu woonse uumujaya natazoobonaanga wachitila Leza mulimu uusalala. 3 Bazoochita zintu eezi nkaambo tabamuzi pe Taata alubo tabandizi pe. 4 Nikuba oobo, ndamubuzya zintu eezi kuchitila kuti, chaakusika chiindi nizitazoochitike, muzooyeeye kuti ndakamubuzya.
“Kumasaangunino, teendakamubuzya zintu eezi pe nkaambo ndakachili aandinywe. 5 Pesi lino ndilikwiinka kuli Yooyo wakandituma. Nikuba oobo, taakwe naaba uumwi aakati kanu uundibuzya kuti, ‘Uya kuli?’ 6 Lino myoyo yanu yawusa nkaambo ndamubuzya zintu eezi. 7 Nikuba oobo, ndimubuzya choonzyo kuti, kweenda kwangu kuzoogwasya ndinywe. Nkaambo kuti teendayinka, mugwasilizi tazoosiki pe kulindinywe pesi kuti ndayinka ndizoomutumina nguwe.* 8 Mugwasilizi ooyo aasika, nyika uzooyipa bukamboni bwachoonzyo atala achibi, bululami akubetekwa. 9 Bukamboni bwakusaanguna buli atala achibi, nkaambo tabakwe lusyomo pe mulindime, 10 bumwi buli atala abululami, nkaambo ndiya kuli Taata alubo tamuchizoondiboni lubo pe, 11 mpawo bumwi buli atala akubetekwa, nkaambo mweendelezi wanyika eeyi wabetekwa kale.
12 “Ndichili aazintu zyiingi nzindeelede kumubuzya, pesi lino tamukonzyi pe kuzimvwisisisya. 13 Pesi aakusika mugwasilizi ooyo, nkukwaamba muuya wakasimpe, uzoomuzulwida mukasimpe koonse, nkaambo takaambi nzyaliyeeyela pe, pesi uzoowamba nzyaamvwa alubo uzoomubuzya zintu zichiza. 14 Mugwasilizi ooyo uzoopa kuti ndilemekwe nkaambo uzoomubuzya nzyajana kuzwa kulindime. 15 Zintu zyoonse Taata nzyalaazyo, nzizyangu. Nchindati, mugwasilizi ooyo uzoomubuzya nzyajana kuzwa kulindime. 16 Muchiindi chifwiifwi, tamuzoondiboni pe alubo muchiindi chifwiifwi, muzoondibona.”
17 Mpawo bamwi basikwiiya bakwe bakabuzyania kuti: “Ani ulikwaambaanzi nalikutubuzya kuti, ‘Muchiindi chifwiifwi, tamuzoondiboni pe alubo muchiindi chifwiifwi, muzoondibona,’ analikuti, ‘nkaambo ndiya kuli Taata’?” 18 Nkinkaako, bakali kuti: “Ulikutyeni biya nalikuti, ‘muchiindi chifwiifwi’? Tatuzizi pe nzyalikwaamba.” 19 Jesu wakalizi kuti bayanda kumubuzya mubuzyo, nkinkaako wakati kulimbabo: “Mulikubuzyania zintu eezi na akaambo kakuti ndati: ‘Muchiindi chifwiifwi, tamuzoondiboni pe alubo muchiindi chifwiifwi, muzoondibona’? 20 Kwaamba choonzyo, ndimubuzya simpe kuti, muzoolila akoomoka pesi nyika izoobotelwa. Muzoowusa pesi kuusa kwanu kuzoochincha kube kukondwa. 21 Mwanakazi nalikutumbuka, ulawusa nkaambo chiindi chakwe nga chasika pesi kuti mwana watumbukwa, nga waaluba machise woonse akaambo kakukondwa kuti kwazyalwa muntu munyika. 22 Munzila iikozyenie, andinywe muluuside pesi ndizoomubona lubo mpawo myoyo yanu izoobotelwa alubo taakwe muntu uutazoomunyange kukondwa kwanu. 23 Mubuzuba oobo, taakwe mubuzyo ngumutazoondibuzye pe. Kwaamba choonzyo, ndimubuzya simpe kuti, kufumbwa chintu nchimukumbila kuli Taata, uzoomupa muzina lyangu. 24 Kusika lino, tamunakumbila chintu pe muzina lyangu. Amukumbile mpawo mulapegwa, kuchitila kuti kukondwa kwanu kuzule.
25 “Ndamubuzya zintu eezi kandisendekezya. Chizoosika chiindi nindizooleka kumubuzya kandisendekezya, pesi ndizoomubuzya aantanganana atala aTaata. 26 Mubuzuba oobo, muzookumbila kuli Taata muzina lyangu pesi tandilikwaamba kuti ndizoomukumbilila pe. 27 Nkaambo Taata umuyanda loko nkaambo mwakandiyanda alubo mwakasyoma kuti ndakaza kandili mwiiminini waLeza. 28 Ndakaza kandili mwiiminini waTaata alubo ndakaza munyika. Pesi lino ndaabusiya nyika alubo ndaabwiinka kuli Taata.”
29 Mpawo basikwiiya bakwe bakati: “Bona! Lino nzulikwaambuula nzyaabumvwisisika nkaambo tuchisendekezyi pe. 30 Lino twaziba kuti ulizizi zintu zyoonse akuti taakwe weelede kukubuzya mubuzyo. Akaambo kazeezi, twasyoma kuti wakazwa kuli Leza.” 31 Jesu wakati kulimbabo: “Lino mwasyoma na? 32 Amubone! Chizoosika chiindi alubo chasika kale nimuzoomwayikizyania, umwi awumwi kaya kung’anda yakwe mpawo muzoondisiya andilikke. Pesi tandili aandilikke pe nkaambo Taata ulaandime. 33 Ndamubuzya zintu eezi, kuchitila kuti mube aaluumuno kwiinda mulindime. Munooli aamapenzi munyika, pesi mutayoowi pe! Ndayizunda nyika.”