Lwakusaanguna kuBatesalonikka
2 Bakombima, muzizi kabotu kuti kumuswaya nkutwakachita, teekwakali kwabuyo pe. 2 Nkaambo nikuba kuti twakasaanguna kuswaana mapenzi akuti twakajatwa chalunya kuFilipi mbuli mbumuzi kale, Leza wesu wakatugwasya kuti tube aachibindi chakuti tumubuzye makani mabotu aaLeza, nikuba kuti twakali kukazigwa loko.* 3 Nkaambo kumusungwaazya nkutuchita takuzwi mubulewusi, mukutasalala amulweeno, 4 pesi mbuli mbaakabona Leza kuti tuleelela kuti tupegwe makani mabotu, nkinkaako, tulaambuula kuti tubotezye Leza, ooyo uulanga-langa myoyo yesu kutali kuti tubotezye bantu pe.
5 Kwaamba choonzyo, mulizi kuti teetwakamulumbayizya aamajwi aakubeja naakuti akuupa-wupa katuli aamakanze aakutangala, Leza ngukamboni kumakani aaya! 6 Alubo mulizi kuti tatulikuyanduula bulemu kuzwa kubantu, kube kulindinywe naakuti kuzwa kuli bamwi, nikuba kuti twakali kukonzya kumumizya loko mukutulangania mbuli baapostoli baKkristu. 7 Pesi twakaba aamoyo mutete aakati kanu, mbuli mwanakazi uunyonsya mbabalanga kabotu* bana bakwe. 8 Mbukunga twakali kumuyanda loko, twakalipeda* kuti tumupe, kutali makani mabotu aaLeza kupela, pesi abuumi bwesu nkaambo mwakaba bantu bayandwa loko kulindiswe.
9 Ndisyoma muchiyeeyede bakombima mbutwakali kubeleka akuchita milimu iimizya. Twakali kubeleka mansiku asikati, kuchitila kuti tutamizyi naaba uumwi aakati kanu, nitwakali kumukambawukila makani mabotu aaLeza. 10 Inywe muli bakamboni, aLeza ngukamboni kumakani aakuti, twakali kusyomeka, twakali bantu baluleme akuti teetwakali aamulandu pe aakati kanu, nibasyomi. 11 Muzizi kabotu mbutwakali kumusungwaazya akumuumbulizya akupa bukamboni kuli umwi awumwi wanu, mbuli mbachita wisi kubana bakwe, 12 kuchitila kuti mwiinkilile kunembo kweenda bweelede mbuli mbayanda Leza, ooyo uulikumwiita kuBwaami bwakwe akubulemu bwakwe.
13 Kwaamba choonzyo, andiswe nchitumulumba Leza chiindi choonse, nkaambo nimwakatambula jwi lyaLeza ndimwakamvwa kulindiswe, teemwakalitambula mbuli kuti ndijwi lyabantu pe, pesi mwakalitambula mbuli mbulibede choonzyo, mbuli jwi lyaLeza lilikubeleka mulindinywe nibasyomi. 14 Nkaambo inywe bakombima, mwakatobelezya chikozyano chambungano zyaLeza zijisini aaKkristu Jesu, zili kuJudiya, nkaambo mwakapenzegwa aabantu bakulindinywe, mbuli mbubalikupenzegwa aamaJuda, 15 aabo bakajaya Mwaami Jesu abapolofita alubo bakatupenzya. Mukuyungizya, tabalikuchita zintu zibotezya Leza pe, pesi balikukazyania aazintu ziyandwa aabantu boonse, 16 nkaambo balikutukasya kwaambuula aabantu bazisi, kuchitila kuti bafutulwe. Nibachita zintu eezi, nga balikuyungizya zibi zyabo. Pesi kumamanino bukali bwakwe bwabasikila.
17 Pesi bakombima, nitwakaanzaanisigwa aandinywe* kwachiindi chifwiifwi biyo, (kumubili kutali mumyoyo yesu), twakeezya amanguzu eesu woonse kuti tuzoomubone* akaambo kachiyandisyo chipati nchitwakalaacho. 18 Nkinkaako, twakali kuyanda kuza kulindinywe, kwaamba choonzyo, ime ndiPawulu ndakeezya, kutali kamwi pesi tubili, nikuba oobo Saatani wakatusinkila nzila. 19 Nkaambo ngwani bulangilizi bwesu, kukondwa kwesu abulumbu bwesu bwakubotelwa* kunembo lyaMwaami Jesu muchiindi chakubawo kwakwe? Teendinywe na? 20 Kwaamba choonzyo, inywe ndindinywe bulemu bwesu akukondwa kwesu.