Samiyele Wakusaanguna
16 Kumamanino, Jehova wakabuzya Samiyele kuti: “Ulamulila kwachiindi chilamfu biyeni Sawulu, kakuli ime ndamukaka kuti ayendelezye kali mwaami wama-Israyeli? Zuzya kwija kwako amafuta wiinke. Ndilakutuma kuli Jese wakuBbetelehema, nkaambo ime lwangu ndalisalila umwi wabana bakwe kuti abe mwaami.” 2 Pesi Samiyele wakasandula kuti: “Ndilayinka biyeni? Sawulu nazimvwa ulandijaya.” Jehova wakasandula kuti: “Bweza kang’ombe kapwizi, ukakwaambe kuti, ‘Ndaza kuzoopayizya kuli Jehova.’ 3 Utambe Jese kuchipayizyo mpawo ndizookubuzya nzweelede kuchita. Undinanikile ooyo ngunditakutondeezye.”
4 Samiyele wakachita nzyaakaamba Jehova. Chiindi naakasika kuBbetelehema, baalu bamumuunzi bakali kukankama nibakamuswaana mpawo bakati: “Waza muluumuno na?” 5 Samuyele wakati: “Ndaza muluumuno. Ndaza kuzoopa chipayizyo kuli Jehova. Amulisalazye twiinkaamwi tukapayizye.” Mpawo wakasalazya Jese abana bakwe balombe. Kuzwa waawo, wakabayita kuti bayinkaamwi kukupayizya. 6 Nibakali kunjila, wakabona Eliyabbu mpawo wakati: “Kwaamba choonzyo, ngoyu munanike waJehova uliimvwi kunembo lyakwe.” 7 Pesi Jehova wakati kuli Samiyele: “Utalangi mbaboneka aanze naakuti mbali mulamfu, nkaambo ndamukaka. Nkaambo nzila muntu njabonaayo teenjiyo pe nzila Leza njabonaayo, nkaambo muntu ubona ziboneka aameso, pesi Jehova ubona zili mumoyo.” 8 Jese wakayita Abbinadabbu mpawo wakamweeta kunembo lyaSamiyele, pesi Samiyele wakati: “Ayooyu Jehova taamusala pe.” 9 Kuzwa waawo, Jese wakayita Shama, pesi Samiyele wakati: “Ayooyu Jehova taamusala pe.” 10 Nkinkaako, Jese wakeeta bana bakwe bali musanu ababili kunembo lyaSamiyele, pesi Samiyele wakati kuli Jese: “Jehova taakwe ngwaasala pe aakati kabaaba.”
11 Kumamanino, Samiyele wakati kuli Jese: “Aaba mbiibana bako balombe boonse na?” Wakamusandula kuti: “Kuchili umwi muniini ulikweembela mbelele.” Mpawo Samiyele wakati kuli Jese: “Tuma bantu kuti bakamwiite, nkaambo tatukookkala aansi pe kuti tulye kusikila asike.” 12 Nkinkaako, wakatuma bantu kuti bakamwiite mpawo bakamweeta. Wakali kusalala, kali aameso mabotu alubo wakali aamubili mubotu. Mpawo Jehova wakati: “Nyampuka umunanike, nkaambo ooyu nguwe ngundasala!” 13 Nkinkaako, Samiyele wakabweza kwija kwakali aamafuta, wamunanika kunembo lyabakulana bakwe. Alubo muuya waJehova wakasaanguna kumupa manguzu Davida kuzwa mubuzuba oobo kaziya kunembo. Mukuya kwachiindi, Samiyele wakanyampuka waya kuRama.
14 Muuya waJehova wakazwa muli Sawulu alubo muuya mubi uuzwa kuli Jehova wakamukataazya. 15 Babelesi baSawulu bakati kulinguwe: “Ulibwene kuti muuya mubi uuzwa kuli Leza ulikukukataazya. 16 Simaleleesu alayilile babelesi bakwe bayimvwi kunembo lyakwe kuti bamuyandwiide muntu uukwizi kabotu kulizya kantimbwa. Kufumbwa chiindi muuya mubi uuzwa kuli Leza nuukusikila, unookulizizya mpawo unoomvwa kabotu.” 17 Nkinkaako, Sawulu wakati kubabelesi bakwe: “Amundiyandwiide muntu uukwizi kabotu kulizya kantimbwa, mumweete kulindime.”
18 Umwi mubelesi wakwe wakati: “Kuli umwi mulombe ngundakabona, mwana waJese wakuBbetelehema uukwizi kabotu kulizya kantimbwa, ngusilumamba uuli aamanguzu uuli aachibindi. Ulakonzya kwaambuula kabotu, mubotu alubo Jehova uli aanguwe.” 19 Sawulu wakatuma batumwa kuli Jese kati: “Ndipe mwaanaako Davida uulikweembela mbelele.” 20 Nkinkaako, Jese wakabweza chinkwa achibikkilo chawayini chachikumba akana kampongo, wazibikka aadonki mpawo wakazitumizya mwanaakwe Davida kuti akazipe Sawulu. 21 Davida wakaza kuli Sawulu wasaanguna kumubelekela. Sawulu wakamuyanda loko Davida alubo wakaba sikumunyampwida zilwanisyo. 22 Sawulu wakatuma mulayizyo kuli Jese wakuti: “Ndikumbila kuti Davida akkale kali mubelesi wangu, nkaambo ndamuyanda loko.” 23 Chiindi choonse, muuya mubi uuzwa kuli Leza nwaakali kusika aali Sawulu, Davida wakali kubweza kantimbwa akukalizya mpawo Sawulu wakali kubatama akumvwa kabotu alubo muuya mubi wakali kuzwa aalinguwe.