Malakki
1 Chaambilizyo:
Ijwi lyaJehova kuma-Israyeli kwiinda muli Malakki:*
2 “Ndakamutondeezya luyando inywe nibantu,” mbaamba Jehova.
Pesi mwaamba kuti: “Wakatutondeezya biyeni luyando?”
“Isawu taakali mukulana waJakkobo na?” mbaamba Jehova. “Pesi ndakayanda Jakkobo, 3 alubo ndakamuzonda Isawu; akupa kuti zilundu zyakwe zibe matongo alubo lukono lwakwe ndakalusiila bamwaaba bamunkanda.”
4 “Nikuba kuti ma-Edomu baamba kuti, ‘Twakamwayigwa, pesi tulabweeda tukayakulule matongo,’ nzezi nzyaamba Jehova wamakamu, ‘Bazooyaka, pesi ime ndizoodilisya, alubo bazoowambwa kuti “nchilawu chabubi” alubo “mbantu Jehova mbaasola kukabe kutamani.” 5 Muyoolibonena ameso aanu mpawo muyaakwaamba kuti: “Jehova alumbayizigwe muchilawu chama-Israyeli.”’”
6 “‘Mwana ulemeka wisi, alubo mubelesi ulemeka simalelo wakwe. Kuti kandili wuso, nkamboonzi nimutandilemeki? Kuti kandili simalelo wanu,* nkamboonzi nimutandiyoowi?* mbaamba Jehova wamakamu kulindinywe nibapayizi nimusampawula zina lyangu.
“‘Pesi mwaamba kuti: “Twalisampawula biyeni zina lyako?”’
7 “‘Kwiinda mukweeta chakulya* chisofweede kuchipayililo changu.’
“‘Alubo mwaamba kuti: “Twakusofwaazya biyeni?”’
“‘Kwiinda mukwaamba kuti: “Tebbulu lyaJehova nchintu cheelede kusofwaazigwa.” 8 Chiindi nimupa banyama bataboni kuti babe chipayizyo, mwaamba kuti: “Taakwe chibi pe.” Alubo chiindi nimupa banyama balemene naakuti bachiswa, mwaamba kuti: “Taakwe chibi pe.”’”
“Amweezye kubapa mweendelezi wanu. Ulabotelwa na akaambo kandinywe naakuti ulamutambula kabotu na?” mbaamba Jehova wamakamu.
9 “Lino amukombelezye Leza kuchitila kuti atufwide luzyalo. Azipo zyanu eezi zizwa mukuboko kwanu, kujana Leza wamutambula kabotu na?” mbaamba Jehova wamakamu.
10 “Ngwani uuyanda kujala milyango* aakati kanu? Nkaambo tamukonzyi nikuba kumwinika chipayililo changu kamutabbadalidwe. Tandibotelwi pe akaambo kandinywe,” mbaamba Jehova wamakamu, “alubo tandibotelwi pe akaambo kazipo nzimupa kuzwa mukuboko kwanu.”
11 “Nkaambo kuzwa zuba nilyazwa kusika nilyabbila,* zina lyangu linooli pati aakati kazisi. Mundawu zyoonse, zipayizyo zizootentwa kuti zisuke busi azipo zizoopegwa muzina lyangu kazili zipo zisalala; nkaambo zina lyangu lizooba pati aakati kazisi,” mbaamba Jehova wamakamu.
12 “Pesi muli kuchisofwaazya* kwiinda mukwaamba kuti, ‘Tebbulu lyaJehova lyeelede kusofwaazigwa, alubo michelo yalyo achakulya chalyo zyeelede kusofwaazigwa.’ 13 Alubo mwaamba kuti, ‘Bona! Chilakataazya!’ alubo mulachisesemwa,” mbaamba Jehova wamakamu. “Alubo mweeta banyama bakubba, balemene abachiswa. Kwaamba choonzyo, mweeta zintu eezi kuti zibe chipo! Ndeelede kuzitambula na kuzwa mukuboko kwanu?” mbaamba Jehova.
14 “Ulitukidwe silweeno, uuli aamunyama uuli kabotu mubutanga, pesi upanga chikonke akweeta munyama kuli Jehova uuli aanchasolwaacho.* Nkaambo ndili Mwaami mupati,” mbaamba Jehova wamakamu, “alubo zina lyangu lizooyoosya aakati kazisi.”