Samiyele Wakusaanguna

17 MaFilisiti bakabunganizya masooja aabo* kuti balibambile kuyoolwana. Bakabungana kuSokko, iili muchilawu chaJuda. Alubo bakakkempa aakati kaSokko a-Azekka, ku-Efesi-damimu. 2 Sawulu abaalumi bamu-Israyeli bakabungana mpawo bakakkempa kuKalonga ka-Ela alubo bakalibambila kuyoolwana maFilisiti. 3 MaFilisiti bakakkala kubbazu limwi lyachilundu mpawo ma-Israyeli kulilimwi bbazu, aakati kakuli mumpata.

4 Mpawo kwakazwa mwiiminini wamasooja mukkeempu yamaFilisiti. Zina lyakwe wakali kutegwa Goliyati, wakuGati alubo wakali kulampa mamita akasisike ku 2.9.* 5 Wakazweete ngwaani yakkopa mumutwe wakwe alubo wakazweete kabaki kansimbi kakunkondo kakali aamakwa aayalene. Kabaki aako kakali kulema mashekeli aali 5 000.* 6 Wakaangide zikwabilizyo zyamumyiindi zyakkopa kumawulu aakwe alubo wakabbede sumu lyakkopa kumusana. 7 Luti lwasumu lyakwe lwakali mbuli chisamu chasikusuma alubo chitwe chansimbi chasumu lyakwe chakali kulema mashekeli aali 600.* Sikumunyampwida ntobo yakwe wakali kweenda kunembo lyakwe. 8 Mpawo wakayimikila woompolola kumasooja aama-Israyeli kati: “Nkamboonzi nimwalibambila kuzootulwana? Ime ndili muFilisiti. Inywe tamuli babelesi baSawulu na? Amulisalile mwaalumi uutakunukile kulindime kuti tulwane. 9 Kuti wandilwana akundijaya, tulaba babelesi banu, pesi kuti ndamuzunda akumujaya mulaba babelesi besu akutubelekela.” 10 Mpawo muFilisiti ooyo wakati: “Ndilikusampula masooja aama-Israyeli sunu. Amundipe mwaalumi tulwane!”

11 Sawulu ama-Israyeli boonse nibakamvwa majwi aaya aamuFilisiti, bakakankama akuyoowa kapati.

12 Davida wakali mwana waJese waku-Efrata yaBbetelehema iili muJuda. Jese wakali aabana balombe bali musanu abatatu alubo mumazuba aaSawulu wakali wachembaala kale. 13 Bana balombe batatu baJese bakali batobela Sawulu kunkondo. Bana aaba batatu bakayinka kunkondo, wakusaanguna wakali Eliyabbu, wachibili wakali Abbinadabbu, wachitatu wakali Shama. 14 Davida wakali keela alubo aaba bapati batatu bakatobela Sawulu.

15 Davida wakali kunoonga wayinka kuli Sawulu mpawo wabweeda kukweembela mbelele zyawisi kuBbetelehema. 16 Aachiindi nchicheecho, muFilisiti wakali kunoonga wayinka, wayimikila kunembo lyabo kuseeni agoko kwamazuba aali 40.

17 Mpawo Jese wakati kumwanaakwe Davida: “Bweza zilyo ziyokedwe zikkwana efa* azinkwa eezi zili kkumi, ufwambaane wiinkaazyo kubakulana bako kukkeempu. 18 Ubweze azipanzi zili kkumi zyachiizi* uzitole kumuzulwidi wabantu bali zyuulu. Alubo ukandilangile kuti bakulana bako balikabotu na mpawo weete chintu chizwa kulimbabo chitondeezya kuti balikabotu.” 19 Bakali aaSawulu abamwi baalumi boonse bachi-Israyeli kuKalonga ka-Ela kabali kulwana maFilisiti.

20 Nkinkaako, Davida wakafuma kuseeni loko wasiila umwi muntu kuti amulangile mbelele zyakwe. Kuzwa waawo, wakalongela zintu, weenda mbuli Jese mbaakamulayilila. Naakasika kukkeempu, wakajana masooja kalikuzwa kuti akalwane kali koompolola aloompololo lwankondo. 21 Ma-Israyeli amaFilisiti bakayimikila mumilongo yabo kabalangene kuti balwane. 22 Aachiindi nchicheecho, Davida wakasiya zibbudu zyakwe kuli sikulanga zibbudu mpawo wakachijaana waya nkubakali kulwanina. Naakasika, wakasaanguna kubuzya kuti bakulana bakwe balikabotu na.

23 Naakachili kwaambuulaabo, kwakasika mwiiminini wamasooja uutegwa Goliyati, muFilisiti wakuGati. Wakazwa kwakali masooja aamaFilisiti mpawo wakaambuula majwi aali mbuli ngaakaambide mpawo Davida wakaamvwa. 24 Baalumi boonse bamu-Israyeli nibakabona Goliyati, bakachija kabayoowede. 25 Baalumi bachi-Israyeli bakali kwaamba kuti: “Wamubona na mwaalumi ooyu uulikuza? Ulikuza kuzoosampawula ma-Israyeli. Muntu uutajaye mwaalumi ooyu, mwaami uzoomupa lubono lwiingi. Alubo uzoomupa mwanaakwe musimbi akwaangununa ng’anda yawisi kuzintu zyeelede kuchitilwa mwaami mu-Israyeli.”

26 Davida wakasaanguna kubuzya bantu bakayimvwi aafwiifwi anguwe kuti: “Uzoochitilwaanzi muntu uutajaye muFilisiti ooyo akugwisya masampu kuma-Israyeli? Nkaambo ngwani biya muFilisiti ooyo uutapalwide kuti asampawule masooja aaLeza muumi?” 27 Mpawo bantu bakamubuzya zintu zikozyenie aanzibakali bamubuzya kabati: “Eezi nzizyo nzyatachitilwe muntu uutamujaye.” 28 Mukulanaakwe mupati Eliyabbu naakamumvwa kalikwaambuula aabaalumi aaba, wakamunyemena loko Davida mpawo wakamubuzya kuti: “Nkamboonzi nwaakunukila ookuno? Tubelele ootuya tuche watusiilaani munkanda? Ndilikuzi kulisumpula kwako amakanze aako mabi aali mumoyo wako. Waza kuzooyebela nkondo kupela.” 29 Mpawo Davida wakati: “Ani ndachitaanzi? Ime ndilikubuzya kupela!” 30 Nkinkaako, wakachengunuka walanga kuluumbi muntu mpawo wabuzya mubuzyo uukozyenie mpawo bantu bakamusandula mbuli mbubakali bamusandula.

31 Majwi Davida ngaakaamba akamvwidikizigwa aabamwi bantu mpawo bakakwaabuzya Sawulu mpawo Sawulu wakati asike. 32 Davida wakati kuli Sawulu: “Kutabi muntu uukataazikana atala anguwe. Mubelesi wako ulayinka kuyoolwana aamuFilisiti ooyo.” 33 Pesi Sawulu wakati kuli Davida: “Tukonzyi pe kuyoolwana aamuFilisiti ooyo, nkaambo iwe uchili muniini, pesi we musooja kuzwa kachili muniini.” 34 Pesi Davida wakati kuli Sawulu: “Mubelesi wako wakali kweembela tanga lyawisi alubo kwakasika mulavu wabweza mbelele kuzwa mutanga. Aali chimwi chiindi, kwakasika munyama uutegwa bbeya wachita zikozyenie. 35 Ndakabatobela banyama aabo, ndabawuma mpawo ndavuna mbelele kuzwa kumilomo yabo. Nibakandibukila kuti bandilwane, ndakabajata aaboya* bwabo, ndabawuma mpawo ndabajaya. 36 Mubelesi wako wakabajaya boonse kabali babili, mulavu abbeya. MuFilisiti ooyu uutapalwidwe uzooba mbuli umwi wabo, nkaambo wasampula masooja aaLeza muumi.” 37 Davida wakayungizya kuti: “Jehova, ooyo wakandivuna kuzwa kumaala aamulavu akumaala aabbeya, nguwe uutandivune mukuboko kwamuFilisiti ooyu.” Mbaakamvwa oobo, Sawulu wakati kuli Davida: “Yinka, Jehova abe aanduwe.”

38 Sawulu wakazwaatika Davida zigogo zyakwe. Wakamuzwaatika ngwaani yakwe yakkopa* mumutwe mpawo wakazoomuzwaatika kabaki kansimbi kakunkondo. 39 Davida wakasekka panga lyakwe aazigogo zyakwe, weezya kweenda, pesi wakakachilwa kweenda, nkaambo taakazijayide pe. Davida wakati kuli Sawulu: “Tandikonzyi pe kweenda azintu eezi, nkaambo tandizijayide pe.” Nkinkaako, Davida wakazigwisya. 40 Mpawo Davida wakabweza nkoli yakwe, wasala mabwe aabulungusene aali musanu mukalonga, waabikka munkomo yamuchikwama chakwe chabeembeli. Mukuyungizya, wakali aankwisyo yakwe mukuboko. Kuzwa waawo, wakasaanguna kweenda kaya kumuFilisiti.

41 MuFilisiti wakali kuza buswena aafwiifwi aDavida alubo sikumunyampwida ntobo wakali kunembo lyakwe. 42 MuFilisiti ooyo naakalanga akubona Davida, wakamusampawula kalikumunyansya, nkaambo wakali mulombe mubotu biyo uusalala. 43 Nkinkaako, muFilisiti wakati kuli Davida: “Ubonaanga ndili munkala na me, nulikuza kuzoolwana aandime atuponda?” Mpawo muFilisiti wakasaanguna kutuka Davida kwiinda muli baleza bakwe. 44 MuFilisiti wakati kuli Davida: “Kuza kulindime mpawo nyama yako ndilayipa bayuni bakujulu abanyama bamusokwe.”

45 Davida wakasandula muFilisiti kati: “Iwe ulikuza kuzoondilwana aapanga amasumu, pesi ime ndilikuza kuzookulwana muzina lyaJehova wamakamu, Leza uulwana nkondo zyama-Israyeli ooyo ngwaasampawula. 46 Sunu Jehova ulakubikka mukuboko kwangu. Alubo ndilakuuma ndikujaye mpawo ndikudyunkule mutwe. Sunu, zidumbu zyabantu bali mukkeempu yamaFilisiti ndilazipa bayuni bamujulu abanyama bamusokwe bali aanyika. Mpawo bantu munyika yoonse bazooziba kuti kuli Leza mu-Israyeli. 47 Alubo bantu boonse babungene aano balaziba* kuti Jehova tabelesyi panga naakuti sumu kuti afutule bantu, nkaambo nkondo njiyaJehova alubo inywe moonse ulamubikka mukuboko kwesu.”

48 Mpawo muFilisiti wakasaanguna kweenda kuti aswaanane aaDavida, pesi Davida wakachijaana kaya kumasooja aabasinkondonyina kuti akaakuswaanane aamuFilisiti. 49 Davida wakanjizya kuboko mukakwama kakwe mpawo wakabweza bbwe walivwililisya. Wakawuma muFilisiti aankumu mpawo bbwe eelyo lyakabbila munkumu yakwe, wawida aansi abusyu. 50 Nkinkaako, Davida wakamuzunda muFilisiti kabelesya nkwisyo abbwe. Wakamuuma muFilisiti akumujaya nikuba kuti Davida taakajisi panga pe mukuboko kwakwe. 51 Davida wakayinkilila kunembo kalikuchijaana alubo wakasika wamulyatilila. Kuzwa waawo, wakabweza panga lyamuFilisiti, walisomona munkomo yalyo mpawo wakaba aachoonzyo chakuti wakali wafwa kwiinda mukumudyunkula mutwe kabelesya ndilyo. MaFilisiti nibakabona kuti mupati wabo wafwa, bakachija.

52 Nibakabona eezi, baalumi ba-Israyeli abamusyobo waJuda bakanyampuka mpawo bakasaanguna koompolola, baandilila maFilisiti nzila yoonse kuzwa mukkuti* kusika kumageedi aaku-Ekkironi alubo zidumbu zyamaFilisiti zyakayalana mumugwagwa kuzwa kuShaarayimu kusika kuGati aku-Ekkironi. 53 Ma-Israyeli nibakazwa kukwaandilila maFilisiti, bakabweza zintu zyakali mukkeempu yabo.

54 Mpawo Davida wakabweza mutwe wamuFilisiti akuutola kuJerusalema, pesi zilwanisyo zyamuFilisiti ooyu wakazibikka mutente lyakwe.

55 Sawulu naakabona Davida kalikuzwa kuti akaswaanane aamuFilisiti, wakabuzya Abbineri wakali kuzulwida masooja kuti: “Abbineri, kalombe aaka nkana kani?” Pesi Abbineri wakasandula kati: “Mbuli mbuli muumi O mwaami, tandizi pe!” 56 Mwaami wakati: “Yanduula kuti mwanaani mulombe ooyu.” 57 Davida mbaakazwa kukujaya muFilisiti, Abbineri wakamubweza wamutola kunembo lyaSawulu, kajisi mutwe wamuFilisiti mukuboko kwakwe. 58 Mpawo Sawulu wakati: “Iwe mulombe, uli mwanaani?” Mpawo Davida wakati: “Ndili mwana wamubelesi wako Jese wakuBbetelehema.”