Kulonga
17 Mbungano yoonse yama-Israyeli yakazwa munkanda yaSini kiiyabulonga-longa kweendelana amalayilile aaJehova, mpawo yakaakukkala kuRefidimu. Pesi teekwakalikwe maanzi aakuti bantu banywe.
2 Nkinkaako, bantu bakasaanguna kupopotela Mozesi kabati: “Tupe maanzi aakunywa.” Pesi Mozesi wakati kulimbabo: “Nkamboonzi nimuli kundipopotela? Nkamboonzi nimuli kusunka Jehova?” 3 Pesi bantu bakali aanyota mpati alubo bakali kung’ung’unina Mozesi kabati: “Wakatugwisya ku-Ijipita kuti uzootujazye aanyota abana besu azivuubwa zyesu na?” 4 Mpawo Mozesi wakalila kuli Jehova kati: “Ndichite biyeni abantu aaba? Lino-lino balanduuma aamabwe!”
5 Jehova wakati kuli Mozesi: “Yinka kunembo lyabantu, ubweze bamwi baalu ba-Israyeli aamwi amufunko wako ngwaakabelesya kuuma Mulonga waNayile. Ubweze mufunko ooyo, wiinke. 6 Ndinooyimvwi kunembo lyako nkukooko aabbwe lili kuHorebbu. Weelede kuuma bbwe mpawo lilagwisya maanzi kuchitila kuti bantu banywe. Mozesi wakachita oobo kunembo lyabaalu ba-Israyeli.” 7 Nkinkaako, bakawuzika ndawu eeyo kuti Masa* akuti Meribba,* nkaambo ma-Israyeli bakapopota alubo bakasunka Jehova kabati, “Jehova mpali na aakati kesu?”
8 Ma-Amalekki bakasika balwana ma-Israyeli kuRefidimu. 9 Mpawo Mozesi wakati kuli Joshuwa: “Sala baalumi mwiinke mukalwane ma-Amalekki. Juunza ndizooyimikila aakalundu kandijisi mufunko waLeza wakasimpe mukuboko kwangu.” 10 Joshuwa wakachita mbuli mbaakabuzigwa aaMozesi, wakalwana ma-Amalekki. Mozesi, Aroni aHuri bakatanta kalundu.
11 Kufumbwa chiindi Mozesi naakatambikide maboko aakwe, ma-Israyeli bakali kuzunda, pesi chiindi naakali kwaaselusya, ma-Amalekki bakali kuzunda. 12 Maboko aaMozesi naakalema, bakabweza bbwe bamubikkila mpawo wakakkala aalindilyo. Aroni wakayimikila kubbazu eeli alubo Huri wakayimikila kubbazu eeliya mpawo bakataba maboko aakwe kuchitila kuti akkale kaali mujulu kusikila nilyakabbila zuba. 13 Joshuwa wakazunda Amalekki abantu bakwe kabelesya panga.
14 Jehova wakati kuli Mozesi: “Lemba makani aaya mubbuku kuti abe chiyubulusyo* mpawo waayindulule kuli Joshuwa, ‘Amalekki ndizoomulobya aansi aamajulu.’” 15 Mpawo Mozesi wakayaka chipayililo akuchuuzika kuti Jehova-nisi.* 16 Wakati: “Jehova uzoomulwana Amalekki mumazyalani amumazyalani, nkaambo kuboko kwakwe kwabukila chuuno chabwaami chaJa.”