Baami Wachibili
23 Nkinkaako, mwaami wakatumizya mulumbe, mpawo bakayita baalu boonse bamuJuda amuJerusalema. 2 Kuzwa waawo, mwaami wakayinka kung’anda yaJehova kalaamwi abaalumi boonse bamuJuda, abantu boonse bakkala muJerusalema, abapayizi, abapolofita—bantu boonse kuzwa kumuniini kusika kumupati. Wakababalila majwi woonse aamubbuku lyachizuminano lyakajanika mung’anda yaJehova. 3 Mwaami wakayimikila kumbali aapila wapanga chizuminano* kunembo lyaJehova chakuti unootobela Jehova akubamba milawu yakwe, ziyeezyo zyakwe, amalayilile aakwe, amoyo wakwe woonse abuumi bwakwe boonse, kwiinda mukuchita kweendelana amajwi aachizuminano aalembedwe mubbuku eeli. Mpawo bantu boonse bakachizumina chizuminano eecho.
4 Mpawo mwaami wakalayilila Hilikkiya mupayizi mupati, bagwasilizi bamupayizi mupati, abalindi bamilyango kuti bagwisye zibelesyo zyoonse zyaBbaala, zyachisamu chisalala, azyamakamu aakujulu woonse zyakali mutempele lyaJehova. Mpawo wakazitenta aanze aaJerusalema muminkunu yaKkidroni, alubo wakabweza dyota lyazyo walitola kuBbeteli. 5 Nkinkaako, wakagwisya bapayizi babaleza bakuli zimwi nyika, aabo baami baJuda mbibakali basala kuti kabawuntumuna busi bwazipayizyo mundawu zyakukombela mumyuunzi yaJuda amumyuunzi iizyungulukide Jerusalema, kuswaanizya abaabo bawuntumuna busi bwazipayizyo kuli Bbaala, kuzuba, kumweezi, kumakamu aanyenyeezi, akumakamu woonse aakujulu. 6 Wakagwisya chisamu chisalala* mung’anda yaJehova wachitola aanze aaJerusalema kuKkuti lyaKkidroni,* mpawo wakachitenta muKkuti lyaKkidroni* wachiziya kusikila chaba busu, mpawo busu oobo wakabumwayila aatubanda twabantu biyo. 7 Alubo wakadilisya maanda aamawuule baatempele bachaalumi bakali mung’anda yaJehova, oomo banakazi mubakali kusumina matente aakukombela aachisamu chisalala.*
8 Mpawo wakagwisya bapayizi boonse mumyuunzi yaJuda, alubo wakasofwaazya ndawu zyakukombela aawo bapayizi mpubakali kuuntumunina busi bwazipayizyo kuzwa kuGebba kusika kuBberi-shebba. Alubo wakadilisya ndawu zyakukombela zyakumageedi aakali kumanjililo aageedi lyaJoshuwa silutwe wamuunzi, aayo aakali kuchimweensi kuti muntu kalikunjila aageedi lyamuunzi. 9 Bapayizi bamundawu zyakukombela teebakali kubeleka pe aachipayililo chaJehova muJerusalema, pesi bakali kulya chinkwa chitakwe bumena kabalaamwi ababbululu babo. 10 Alubo wakasofwaazya Tofeti iili muKkuti lyaBana baHinomu,* kuchitila kuti kutabi muntu naba uumwi uutenta* mwanaakwe mulombe naakuti musimbi mumulilo kachitila Molekki. 11 Alubo wakakasya mabbiza, aayo baami baJuda ngibakali bapa kuzuba, kuti atanoonjili mung’anda yaJehova kaayinda mung’anda* yaNatani-melekki walupati-pati mung’anda yamwaami, eeyo yakali kumavulandi. Alubo wakatenta ngolo zyazuba mumulilo. 12 Alubo mwaami wakadilisya zipayililo baami baJuda nzibakali bayaka aachiluli chang’anda yamujulu ya-Ahazi, kuswaanizya azipayililo eezyo Manase nzyaakali wayaka mumabuwa aabili aang’anda yaJehova. Wakaziziya mpawo busu bwazyo wakabumwayila muKkuti lyaKkidroni.* 13 Alubo mwaami wakasofwaazya ndawu zyakukombela zyakali kunembo aaJerusalema kubbazu lyakumusanza* kwaChilundu chaLunyonyooko,* eezyo Solomoni mwaami wa-Israyeli nzyaakayakila Ashitoreti leza wachanakazi uusesemya wamaSidoni, anzyaakayakila Kkemoshi leza uusesemya wamaMowabbu, anzyaakayakila Milikkomu leza uusesemya wama-Amoni. 14 Wakatyoloola mapila aasalala akugonka zisamu zisalala,* mpawo wakazuzya mafuwa aabantu mundawu zyazyo. 15 Alubo wakadilisya chipayililo chakali kuBbeteli, ndawu yakukombela Jerobbowamu mwana waNebbati njaakali wayaka, eeyo yakapa kuti Israyeli abisye. Naakamaninsya kudilisya chipayililo mundawu yakukombela, wakatenta ndawu yakukombela, wayiziya kusikila yaba busu mpawo wakatenta chisamu chisalala.*
16 Josiya naakacheba, wakabona tubanda aajulu aachilundu mpawo wakalayilila kuti mafuwa agwisigwe mutubanda mpawo wakaatenta aachipayililo, kuchitila kuti achisofwaazye kweendelana ajwi lyaJehova ndyaakaambilizya muntu waLeza wakasimpe, ooyo wakaambilizya kuti zintu eezi zyakali kuzoochitika. 17 Mpawo wakati: “Nkabanda kani aakaya nkindibwene?” Bantu bamumuunzi bakamusandula kuti: “Nkabanda kamuntu waLeza wakasimpe wakazwa kuJuda, ooyo wakaambilizya zintu eezi nzwaachita atala achipayililo chamuBbeteli.” 18 Mpawo wakati: “Amumuleke apumune. Mutazumizyi muntu naba uumwi kuti apambanisye mafuwa aakwe.” Nkinkaako, bakaasiya mafuwa aakwe kuti atapambanisigwi, kuswaanizya amafuwa aamupolofita wakali wazwa kuSamariya.
19 Alubo Josiya wakagwisya maanda woonse aakukombela mundawu zyakukombela zyakali mumyuunzi yaSamariya, eezyo baami ba-Israyeli nzibakali bayaka kuti banyemye Leza. Wakaachita mbuli mbaakachita kuBbeteli. 20 Nkinkaako, wakapayizya bapayizi boonse bamundawu zyakukombela bakali mpawaawo aazipayililo, alubo wakatenta mafuwa aabantu aalinzizyo. Kuzwa waawo, wakabweeda kuJerusalema.
21 Mwaami wakalayilila bantu boonse kuti: “Amuchitile Jehova Leza wanu Pasika, mbuli mbukulembedwe mubbuku eeli lyachizuminano.” 22 Taakwe Pasika lili mbuli eeli lyakachitwa kuzwa mumazuba aababetesi nibakali kubeteka Israyeli naakuti mumazuba woonse aabaami ba-Israyeli abaami baJuda. 23 Pesi mumunyaka wachi 18 wabweendelezi bwaMwaami Josiya, Pasika eeli lyakachitilwa Jehova muJerusalema.
24 Alubo Josiya wakagwisya basondi, basikwaamba zitazoochitike kunembo, zikozyano zyamaterafimu,* zibumbwa zisesemya,* azintu zyoonse zisesemya zyakali munyika yaJuda amuJerusalema, kuchitila kuti achite kweendelana amajwi aaMulawu aakalembedwe mubbuku eelyo Hilikkiya mupayizi ndyaakajana mung’anda yaJehova. 25 Taakwe mwaami wakamusaangunina wakali mbuli nguwe, iwakaboola kuli Jehova amoyo wakwe woonse abuumi bwakwe boonse amanguzu aakwe woonse, kweendelana aMulawu woonse waMozesi. Alubo taakwe uumbi uuli mbuli nguwe wakazoobawo musulaakwe.
26 Nikuba oobo, Jehova taakabuleka pe bukali bwakwe bwakavutukila Juda akaambo kazintu zyoonse zinyemya eezyo Manase nzyaakachita kuti anyemye Leza. 27 Jehova wakati: “Anguwe Juda ndizoomutanda kunembo lyangu, mbuli mbundakatanda Israyeli. Ndizoowukaka muunzi ooyu waJerusalema ngundakasala, ang’anda eeyo njindakaamba kuti, ‘Zina lyangu linooli nkukooko chiindi choonse.’”
28 Makani aachiindi woonse aali atala aJosiya, azintu zyoonse nzyaakachita, taalembedwe na mubbuku lyamakani aachiindi aaziindi zyabaami baJuda? 29 Mumazuba aakwe, Faro Nekko mwaami wa-Ijipita wakasika kuti azooswaanane aamwaami wa-Asiriya aafwiifwi aMulonga waYufurati, mpawo Mwaami Josiya wakayinka kuti akamulwane. Pesi Nekko naakabona Josiya, wakamujaya kuMegido. 30 Mpawo babelesi bakwe bakanyampula chidumbu chakwe mungolo kuzwa kuMegido kabamweeta kuJerusalema, mpawo bakamuzikka mukabanda kakwe. Kuzwa waawo, bantu bamunyika eeyo bakabweza Jehowahazi mwana waJosiya bamunanika, alubo bakamubikka kuti abe mwaami mundawu yawisi.
31 Jehowahazi wakali aaminyaka iili 23 naakaba mwaami, alubo wakeendelezya kwamyeezi iitatu muJerusalema. Banyina bakali kutegwa Hamutali mwana waJeremiya wakuLibbina. 32 Jehowahazi wakasaanguna kuchita zibi mumeso aaJehova, kweendelana azintu zyoonse nzibakachita masianyinakulu. 33 Faro Nekko wakamubikka mujele kuRibbila munyika yaHamati, kuchitila kuti amukachizye kweendelezya muJerusalema, mpawo wakabbadalisya bantu bamunyika eeyo matalenta* aansiliva aali 100 atalenta limwi lyangolida. 34 Mukuyungizya, Faro Nekko wakabikka Eliyakkimu mwana waJosiya kuba mwaami mundawu yaJosiya wisi, alubo wakamuchincha zina kuti abe Jehoyakkimu. Pesi wakabweza Jehowahazi wamweeta ku-Ijipita, ooko nkwaakazoofwida. 35 Jehoyakkimu wakapa Faro nsiliva angolida, pesi wakabbadalisya bantu bamunyika mutelo kuti ajane nsiliva njaakali kuyanda Faro. Wakabikka mweelwe wansiliva angolida wakeelede kubbadalwa aamuntu umwi awumwi wamunyika eeyo kuti ape Faro Nekko.
36 Jehoyakkimu wakali aaminyaka iili 25 naakaba mwaami, alubo wakeendelezya kwaminyaka iili 11 muJerusalema. Banyina bakali kutegwa Zebbida mwana waPedaya wakuRuma. 37 Wakaliswini kuchita zibi mumeso aaJehova, kweendelana azintu zyoonse nzibakachita masianyinakulu.