Amosi
8 Nzezi Mwaami Singuzuzyoonse Jehova nzyaakanditondeezya: Bona! Kwakali bbasikiti lyakali aamichelo yachilimu. 2 Mpawo wakati, “Ulikubonaanzi Amosi?” Ndakasandula kuti, “Bbasikiti lili aamichelo yachilimu.” Mpawo Jehova wakati kulindime: “Mamanino abasikila bantu bangu ma-Israyeli. Tandichizoobalekeleli pe. 3 ‘Mubuzuba oobo, nyimbo zyamutempele zizoochincha zibe kulila,’ mbaamba Mwaami Singuzuzyoonse Jehova. ‘Zidumbu zyiingi zizoosowelwa koonse-koonse, zyakuti kuzoowumuna wii!’
4 Amumvwe eezi, inywe nimulyatuuka bafwaba
Animweeta lunyonyooko kuli baabo bali aamyoyo iibombede baanyika,
5 Inywe nimwaamba kuti, ‘Pobwe lyakukkala kwamweezi lizoomana lili, kuchitila kuti tuuzye zilyo zyesu,
Akuti Sabata lizoomana lili, kuchitila kuti tuuzye zilyo?
Kuchitila kuti tuchesye chipimyo cha-efa*
Akukomezya bulemu bwashekeli,*
Kuti tweene bantu azikkelo zyesu zyalweeno,
6 Kuchitila kuti tuule aabo batakwe nchibalaacho ansiliva
Akuti tuule bafwaba amanyatela,
Mpawo tuuzye zilyo zitagwasyi.’
7 Jehova wakonka aaBulemu bwaJakkobo kati,
‘Tandizooyilubi pe milimu yabo yoonse.
8 Nkinkaako, nyika izoozazama,
Amuntu woonse uukkala mulinjiyo uzoolila.
Nyika yoonse tayizoofuti na mbuli Mulonga waNayile
Alubo tayizoopawuli na akuyosa mbuli Mulonga waNayile waku-Ijipita?’
9 ‘Mubuzuba oobo,’ mbaamba Mwaami Singuzuzyoonse Jehova,
‘Ndizoopa kuti zuba libbile aakalangabweeseme,
Akupa kuti nyika ibe aamudima zuba kalitwamwaaba.
10 Ndizoochincha mapobwe aanu abe kulila
Anyimbo zyanu zyoonse zibe nyimbo zyakulila.
Tusolo twanu toonse ndizootuzwaatika zigogo zyamasaka alubo mitwe yanu yoonse ndizooyikulula,
Ndizoopa kuti kube mbuli kulila mwana uuzyedwe aalikke,
Alubo mamanino aazyo azooba mbuli buzuba bwakukataazikana.’
11 ‘Amubone! Mazuba azoosika,’ mbaamba Mwaami Singuzuzyoonse Jehova,
‘Aawo ninditazooyete nzala munyika,
Kutali nzala yachinkwa naakuti nyota yamaanzi,
Pesi yakuyanda kumvwa majwi aaJehova.
12 Bazoodadalika kabazwa kuli lumwi lwizi kabaya kuli lumwi lwizi
Akuzwa kubbazu lyakunyika kabaya kubuzwezuba.
Bazooyendengana kabali kuyanduula jwi lyaJehova, pesi tabazoolijani pe.
13 Mubuzuba oobo, banakalindu* babotu bazoosuntuka,
Kuswaanizya abaalumi bachiniini, akaambo kanyota.
14 Aabo bakonka aachibi chaSamariya abaamba kuti,
“Kwaamba choonzyo, mbuli leza wako mbali muumi, O Dani!”
Akuti, “Kwaamba choonzyo, mbuli nzila yaBberi-shebba mbiipona!”
Bazoowa mpawo tabazoobuki lubo pe.’”