Kulonga
7 Mpawo Jehova wakati kuli Mozesi: “Ndapa kuti ube mbuli Leza* kuli Faro alubo Aroni mukulanaako ulaba mupolofita wako. 2 Weelede kwiindulula zintu zyoonse nzinditakulayilile mpawo Aroni mukulanaako uyoowambuula aaFaro alubo Faro uyoogwisya ma-Israyeli munyika yakwe. 3 Pesi Faro ndilamuleka kuti ayumye moyo alubo ndizoovuzya zitondeezyo azigambyo zyangu munyika ya-Ijipita. 4 Pesi Faro tazoomuswiilili pe, ndilabikka kuboko kwangu aa-Ijipita akugwisya makamu aangu, bantu bangu ma-Israyeli kuzwa munyika ya-Ijipita achisubulo chipati.* 5 Nindazootandabika kuboko kwangu ku-Ijipita akugwisya ma-Israyeli aakati kabo, ma-Ijipita bazooziba choonzyo kuti ndime Jehova.” 6 Mozesi a-Aroni bakachita nzibakalayililwa aaJehova, bakachita mbuboobo. 7 Mozesi wakali aaminyaka iili 80 mpawo Aroni wakali aaminyaka iili 83 nibakaambuula aFaro.
8 Jehova wakati kuli Mozesi a-Aroni: 9 “Kuti Faro wamubuzya kuti, ‘Amuchite chigambyo,’ ubuzye Aroni kuti, ‘Bweza mufunko wako uuwaale aansi kunembo lyaFaro.’ Mufunko ooyo ulaba nzoka mpati.” 10 Nkinkaako, Mozesi a-Aroni bakanjila mwaakabede Faro mpawo bakachita mbuli mbubakalayililwa aaJehova. Aroni wakawaala mufunko wakwe kunembo lyaFaro ababelesi bakwe mpawo mufunko wakaba nzoka mpati. 11 Pesi Faro wakayita baalumi basongo, basondi abapayizi basimasalamusi bamu-Ijipita mpawo bakachita chintu chikozyenie kababelesya masalamusi aabo. 12 Umwi awumwi wabo wakawaala mufunko wakwe aansi mpawo mifunko eeyo yakaba nzoka mpati, pesi mufunko wa-Aroni wakamena mifunko yabo. 13 Nikuba oobo, Faro wakayumya moyo, taakabaswiilila pe mbuli mbaakaambide Jehova.
14 Mpawo Jehova wakati kuli Mozesi: “Moyo waFaro muyumu. Wakaka kuleka bantu kuti beende. 15 Wiinke kuli Faro kuseeni. Unooli kaya kumulonga. Weelede kwiimikila kuti muswaanane kumbali aaMulonga waNayile. Wiinke aamufunko uulya wakachincha kuba nzoka. 16 Weelede kuyoomubuzya kuti, ‘Jehova Leza wamaHebberu wandituma kulinduwe alubo waamba kuti: “Leka bantu bangu beende, kuchitila kuti bakandibelekele munkanda,” pesi teewaswiilila pe kusikila lino. 17 Nzezi nzyaamba Jehova: “Akaambo kazeezi, uzooziba kuti ndime Jehova. Ndilawuma maanzi aali muMulonga waNayile amufunko uuli mukuboko kwangu mpawo alachincha abe ganzi. 18 Baswi bali muli Nayile balafwa. Mpawo Nayile uzoonunka nsu alubo kuzoobayumina ma-Ijipita kunywa maanzi aali muli Nayile.”’”
19 Mpawo Jehova wakati kuli Mozesi: “Buzya Aroni kuti, ‘Bweza mufunko wako utandabike kuboko kwako aajulu aamaanzi aamu-Ijipita, aali mumilonga yabo, mumigelo yabo, mumalambwa aabo amuzibikkilo zyabo zyamaanzi zipati, kuchitila kuti abe ganzi.’ Kuzooba ganzi munyika yoonse ya-Ijipita nimuba muzibikkilo zipangidwe aazisamu amuzibikkilo zyamabwe.” 20 Mozesi a-Aroni bakachita mbuli mbubakalayililwa aaJehova. Wakanyampula mufunko wakwe wawuma maanzi aakali muMulonga waNayile kunembo lyaFaro ababelesi bakwe mpawo maanzi woonse aakali mumulonga akachincha aba ganzi. 21 Baswi bakali mumulonga bakafwa alubo mulonga wakasaanguna kununka nsu. Ma-Ijipita teebakachili kukonzya pe kunywa maanzi aamuli Nayile alubo kwakali kwaba ganzi munyika yoonse ya-Ijipita.
22 Pesi ambabo bapayizi basimasalamusi bamu-Ijipita bakachita chintu chikozyenie kababelesya masalamusi aabo. Nkinkaako, Faro wakayinkilila kunembo kuyumya moyo, taakabaswiilila pe mbuli mbaakaambide Jehova. 23 Kuzwa waawo, Faro wakabweeda kung’anda yakwe alubo taakalikataazya pe atala anzizyo. 24 Ma-Ijipita boonse bakali kuseya kumbali aamulonga waNayile kuti bajane maanzi aakunywa, nkaambo teebakachili kukonzya pe kunywa maanzi aamuli Nayile. 25 Kwakayinda mazuba aali musanu aabili kuzwa Jehova naakawuma maanzi aamuli Nayile.