Baami Wachibili
20 Mumazuba aayo, Hezekkiya wakachiswa zyakuti wakali waamba kufwa. Mupolofita Isaya mwana wa-Amozi wakasika kulinguwe wamubuzya kuti, “Nzezi nzyaamba Jehova: ‘Bape malayilile bamung’anda yako, nkaambo ulafwa, tukoopona pe.’” 2 Hezekkiya wakachengunuka walanga kumuduli mpawo wakasaanguna kukomba kuli Jehova kati: 3 “Ikaka O Jehova, ndakombelela, yeeya mbundakeenda kunembo lyako kandisyomeka, kandili aamoyo uumaninide alubo ndalikuchita zibotu mumeso aako.” Mpawo Hezekkiya wakasaanguna kulila loko.
4 Isaya taakayinasika pe kulubuwa lwaakati chiindi jwi lyaJehova nilyakamusikila kaliti: 5 “Bweeda ukabuzye Hezekkiya muzulwidi wabantu bangu kuti, ‘Nzezi nzyaamba Jehova Leza waDavida sianyookulu: “Ndayimvwa nkombyo yako. Ndayibona misozi yako. Ndilakuponia. Mubuzuba bwachitatu, uzooyinka kung’anda yaJehova. 6 Ndilakuyungizya minyaka iili 15 mubuumi bwako, alubo ndilakuvuna iwe amuunzi ooyu mukuboko kwamwaami wa-Asiriya. Ndilawulwanina muunzi ooyu akaambo kangu alubo akaambo kaDavida mubelesi wangu.”’”
7 Mpawo Isaya wakati: “Amweete chinkwa chipangidwe aankuyu njumu.” Nkinkaako, bakacheeta bachibikka aatumba, mpawo wakasaanguna kupona mbichaani-mbichaani.
8 Hezekkiya wakali wabuzya Isaya kuti: “Niinzi chitabe chitondeezyo chakuti Jehova ulandiponia akuti ndizooyinka kung’anda yaJehova mubuzuba bwachitatu?” 9 Isaya wakasandula kuti: “Nchechi chitondeezyo chizwa kuli Jehova chitakutondeezye kuti Jehova ulazichita nzyaamba: Uyanda kuti mweenzule* uuli aamatantilo* wiinke kunembo antaamu zili kkumi na, naakuti ubweede musule antaamu zili kkumi?” 10 Hezekkiya wakati: “Nkuuba kuti mweenzule wiinke kunembo awukke antaamu zili kkumi kwiinda kuti ubweede musule antaamu zili kkumi.” 11 Nkinkaako, mupolofita Isaya wakayita Jehova, mpawo Leza wakapa kuti mweenzule, ooyo wakali waseluka kale aamatantilo aa-Ahazi, ubweede musule antaamu zili kkumi.
12 Aachiindi eecho, mwaami waBbabbiloni Bberodakki-bbaladani mwana waBbaladani, wakatumizya magwalo achipo kuli Hezekkiya, nkaambo wakali wamvwa kuti Hezekkiya wakali kuchiswa. 13 Hezekkiya wakabatambula* alubo wakabatondeezya ng’anda yakwe yoonse yakubambila zintu—nsiliva, ngolida, mafuta aabbalisamu kuswaanizya amafuta mabotu, zilwanisyo zyakwe, azintu zyoonse zyakali mung’anda yakwe yakubikkila zintu. Taakwe chintu Hezekkiya nchaakatabatondeezya chakali mung’anda yakwe* amubweendelezi bwakwe boonse.
14 Mpawo Isaya mupolofita wakasika kuMwaami Hezekkiya wamubuzya kuti: “Baalumi aaba batyeni, alubo bazwa kuli?” Hezekkiya wakati: “Bazwa kunyika iili kule, kuBbabbiloni.” 15 Mpawo wakabuzya kuti: “Babonaanzi mung’anda yako?”* Hezekkiya wakasandula kuti: “Babona zintu zyoonse zyamung’anda yangu. Taakwe chintu nichiba chimwi nchindatabatondeezya mung’anda yangu* yakubikkila zintu.”
16 Mpawo Isaya wakati kuli Hezekkiya: “Mvwa jwi lyaJehova, 17 ‘Bona! Mazuba azoosika, mpawo zintu zyoonse zili mung’anda yako azintu zyoonse masianyookulu nzibakabunganizya kusika sunu zizootolwa kuBbabbiloni. Taakwe chitazoosyaale pe,’ mbaamba Jehova. 18 ‘Alubo bamwi bana bako mbutazoozyale bazoobwezegwa mpawo bazooba balupati-pati bamumuunzi wamwaami waBbabbiloni.’”
19 Hezekkiya wakati kuli Isaya: “Ijwi lyaJehova ndwaamba ndibbotu.” Mpawo wakayungizya kuti: “Zilikabotu kuti kakunooli luumuno akulyiiba* mumazuba nindichinooli muumi.”
20 Makani aachiindi woonse aali atala aHezekkiya, amilimu yakwe yoonse yanguzu ambaakayaka dambwa amugelo ambaakeeta maanzi mumuunzi, taalembedwe na mubbuku lyamakani aachiindi aaziindi zyabaami baJuda? 21 Mpawo Hezekkiya wakalazikwaamwi amasianyinakulu. Mwanaakwe Manase wakaba mwaami mundawu yakwe.