Mukambawusi
3 Chintu chimwi achimwi chili aachiindi chacho,
Chiindi chamulimu umwi awumwi aanyika:
2 Chiindi chakutumbukwa achiindi chakufwa,
Chiindi chakubyala achiindi chakunonkola chakazikkwa,
3 Chiindi chakujaya achiindi chakuponia,
Chiindi chakudilisya achiindi chakuyaka,
4 Chiindi chakulila achiindi chakuseka,
Chiindi chakoomoka achiindi chakuzyana,*
5 Chiindi chakusowa mabwe achiindi chakubunganizya mabwe;
Chiindi chakumbundila achiindi chakutambundila;
6 Chiindi chakuyanduula achiindi chakuzumina kuti chintu chakasweeka;
Chiindi chakubamba chintu achiindi chakusowa;
7 Chiindi chakudelula achiindi chakusuma;
Chiindi chakuumuna achiindi chakwaambuula;
8 Chiindi chakuyanda achiindi chakuzonda;
Chiindi chankondo achiindi chaluumuno.
9 Muntu uubeleka ujanaanzi kumilimu yakwe yoonse? 10 Ndakabona milimu Leza njaakapa bana babantu kuchitila kuti bakkale kabali aazyakuchita. 11 Wakapanga zintu zyoonse zibotu* aachiindi chazyo. Wakabikka buumi butamani mumyoyo yabo. Nikuba oobo, bantu tabazooyimvwisisisyi pe milimu yoonse Leza wakasimpe njaakachita kuzwa kumasaangunino kusika kumamanino.
12 Ndakazoobona kuti, taakwe chintu chibotu chiinda kuti bantu babotelwe akuti bachite zintu zilikabotu mubuumi bwabo, 13 akuti muntu woonse weelede kulya akunywa akubotelwa akaambo kamilimu yoonse njabeleka changuzu. Eechi nchipo chizwa kuli Leza.
14 Ndakazoobona kuti zintu zyoonse zichitwa aaLeza wakasimpe zilakkala kukabe kutamani. Taakwe chakuyungizya kulinzizyo naakuti chakugwisya kulinzizyo. Leza wakasimpe wakazichita munzila eeyi kuchitila kuti bantu bamuyoowe.
15 Kufumbwa zichitika, zyakachitikide kale alubo zitazooze zyakaliwo kale, pesi Leza wakasimpe uyanduula zyakali kwaandililwa.*
16 Alubo nzezi nzindakabona aansi aano: Aandawu yabululami kwakali bubi alubo aandawu yazintu ziluleme kwakali zintu zibi. 17 Mpawo mumoyo wangu ndakalibuzya kuti: “Leza wakasimpe uzoobeteka bantu baluleme ababi, nkaambo milimu yoonse azintu zyoonse zili aachiindi chazyo.”
18 Alubo mumoyo wangu ndakalibuzya atala abana babantu, kuti Leza wakasimpe uzoobasunka akubatondeezya kuti bali mbuli banyama, 19 nkaambo kuli mamanino aabantu amamanino aabanyama, boonse bali aamamanino aakozyenie. Mbuli munyama mbafwa anguwe muntu mbafwa. Alubo boonse bali aamuuya uumwi.* Nkinkaako, muntu tasumpukide pe kwiinda munyama, nkaambo zyoonse tazigwasyi. 20 Zyoonse ziya kundawu iimwi. Zyoonse zyakazwa kubulongo, zyoonse zibweeda kubulongo. 21 Ngwani loko uuzi kuti muuya wabantu uya kujulu na, akuti muuya wabanyama uya aansi aanyika? 22 Mpawo ndakabona kuti taakwe chintu chilikabotu kwiinda kuti muntu abotelwe akaambo kamulimu wakwe, mbukunga oobu mbulumbu bwakwe,* nkaambo ngwani uukonzya kupa kuti abone zitazoochitike kali wafwa?