Joshuwa
24 Joshuwa wakabunganizya misyobo yoonse ya-Israyeli kuShekkemu mpawo wakayita baalu ba-Israyeli, basilutwe babo, babetesi babo abalupati-pati babo mpawo bakayimikila kunembo lyaLeza wakasimpe. 2 Joshuwa wakabuzya bantu boonse kuti: “Nzezi nzyaamba Jehova Leza wa-Israyeli, ‘Chiindi, masianyookulu—Tera wisi wa-Abbrahamu aNahori—bakali kukkala mutala aaMulonga* alubo bakali kubelekela bamwi baLeza.
3 “‘Mukuya kwachiindi, ndakabweza sianyookulu Abbrahamu mutala aaMulonga,* ndamweenzya munyika yoonse yaKkenani mpawo ndakavuzya bana bakwe. Ndakamupa Izakka. 4 Izakka ndakamupa Jakkobo a-Isawu. Mpawo Isawu ndakazoomupa Chilundu chaSeyiri kuti chibe lukono lwakwe, pesi Jakkobo abana bakwe bakakunukila ku-Ijipita. 5 Ndakatuma Mozesi a-Aroni, ndapenzya Ijipita azintu nzindakachita aakati kabo, chiindi nindakamugwisya mumo. 6 Nindakabagwisya mawuso mu-Ijipita mpawo basika kulwizi, ma-Ijipita bakabatobela angolo zyankondo abasimabbiza mane basika kuLwizi Lusalala. 7 Mpawo bakasaanguna kundililila ime ndiJehova, nkinkaako, ndakabikka mudima aakati kanu ama-Ijipita mpawo ndakabavumba aamaanzi aamulwizi, mwakalibonena ameso aanu nzindakachita mu-Ijipita. Mwakazookkala munkanda kwaminyaka myiingi.*
8 “‘Ndakamweeta munyika yama-Amori ibakali kukkala mutala aaJodani. Bakamulwana, pesi ndakababikka mukuboko kwanu, kuchitila kuti mubweze nyika yabo mpawo ndakabanyonyoona kunembo lyanu. 9 Mpawo Bbalakki mwana waZipori mwaami waMowabbu wakanyampuka walwana ma-Israyeli. Nkinkaako, wakayita Bbalamu mwana waBbewori kuti amutuke. 10 Pesi teendakamuswiilila pe Bbalamu. Nkinkaako, wakamulongezya kwaziindi zyiingi alubo ndakamuvuna mukuboko kwakwe.
11 “‘Mwakazubuka Jodani mwasika muJerikko mpawo beendelezi baJerikko, ma-Amori, maPerezi, maKkenani, maHeti, maGigashi, maHivi, amaJebbusi bakamulwana, pesi ndakababikka mukuboko kwanu. 12 Ndakabamana manguzu kamutanasika pe, ndakabatanda kunembo lyanu baami babili bama-Amori. Teemwakabatanda aapanga naakuti adaantambwa lyanu. 13 Ndakamupa nyika njimutabelekede amyuunzi njimutayakide pe alubo mulikkede mulinjiyo. Mulikulya michelo yamumyuunda yamisaansa ayami-olifa njimutabyalide pe.’
14 “Nkinkaako, amuyoowe Jehova mumubelekele amoyo uumaninide achakusyomeka,* mugwisye baleza bakali kubelekelwa aamasianyookulu mutala aaMulonga aku-Ijipita mpawo mubelekele Jehova. 15 Kuti kamubonaanga nkubi kubelekela Jehova, amulisalile sunu ngumuyanda kubelekela, kufumbwa kuti mbaaleza mbibakali kubelekela masianyookulu mutala aaMulonga naakuti mbaaleza bama-Amori mbimukkede aabo. Pesi ime abamung’anda yangu tunoobelekela Jehova.”
16 Bantu nibakamvwa makani aaya bakati: “Tazichiti pe kuti tusiye Jehova kuti tubelekele bamwi baleza. 17 NguJehova Leza wesu wakatugwisya aamwi amandeende kuzwa munyika ya-Ijipita, mung’anda yabuzike, wakachita zitondeezyo zipati kunembo lyesu awakali kutukwabilila mulweendo lwesu loonse ndutwakeenda aakati kabantu boonse mbitwakayinda. 18 Jehova wakatanda bantu boonse kuswaanizya ama-Amori bakatusaangunina kukkala munyika eeyi. Nkinkaako, andiswe tulabelekela Jehova nkaambo nguLeza wesu.”
19 Mpawo Joshuwa wakabuzya bantu kuti: “Tamukonzyi pe kubelekela Jehova, nkaambo nguLeza uusalala, nguLeza uuyanda kukombwa biyo alikke. Tazoomulekeleli pe milandu yanu* azibi zyanu. 20 Kuti mumusiye kupela Jehova akuyoobelekela baleza beenzu, anguwe uzoomubukila amumane nikuba kuti wakamuchitila zintu zibotu.”
21 Pesi bantu bakati kuli Joshuwa: “Peepe, tulabelekela Jehova!” 22 Nkinkaako, Joshuwa wakabuzya bantu kuti: “Inywe ndindinywe bakamboni bamajwi ngimwaamba, mwasala kubelekela Jehova.” Bantu bakati: “Iiyi tuli bakamboni.”
23 “Amugwisye baleza beenzu bali aakati kanu, myoyo yanu mwiipe Jehova Leza wa-Israyeli.” 24 Mpawo bantu bakati kuli Joshuwa: “Tulabelekela Jehova Leza wesu akuswiilila jwi lyakwe!”
25 Joshuwa wakapangana chizuminano abantu mubuzuba oobo, alubo wakababikkila mulawu muShekkemu. 26 Mpawo Joshuwa wakalemba majwi aaya mubbuku lyaMulawu waLeza alubo wakabweza bbwe pati walyiimikizya aansi aamunsamu mupati aafwiifwi andawu yaJehova iisalala.
27 Joshuwa wakayinkilila kunembo kubuzya bantu boonse kuti: “Amubone, bbwe eeli lizooba kamboni uutupa mulandu, nkaambo lyazimvwa zyoonse nzyaamba Jehova kulindiswe, lizooba kamboni uumupa mulandu kuchitila kuti mutamukaki pe Leza wanu.” 28 Mpawo Joshuwa wakabaleka bantu kuti beende, umwi awumwi wakaya kulukono lwakwe.
29 Nizyakayinda zintu eezi, Joshuwa mwana waNuni mubelesi waJehova wakafwa kali aaminyaka iili 110. 30 Nkinkaako, bakamuzikka muchilawu chalukono lwakwe muTiminati-sera, muchilawu chili aazilundu cha-Efremu, kubbazu lyakunyika lyaChilundu chaGaashi. 31 Ma-Israyeli bakayinkilila kunembo kubelekela Jehova mumazuba woonse aaJoshuwa amumazuba woonse aabaalu bakasyaala Joshuwa naakafwa, ibakazi milimu yaJehova yoonse njaakachitila ma-Israyeli.
32 Mafuwa aaJosefa ngibakazwaawo ma-Israyeli mu-Ijipita, bakaazikka muShekkemu, muchipanzi chanyika yaJakkobo njaakawula kubana baHamori wisi waShekkemu amali yansiliva zili 100; alubo chakaba lukono lwabana baJosefa.
33 Anguwe Eliyezari mwana wa-Aroni wakafwa. Nkinkaako, bakamuzikka mukalundu kaFiniyasi mwanaakwe nkaakapegwa muchilawu chili aazilundu cha-Efremu.