Lwakusaanguna Luya Kuli Timoti
6 Aabo bali munsi aajokwe lyabuzike, abayinkilile kunembo kubalemeka loko basimalelaabo, kuchitila kuti bantu bataambuuli zibi atala azina lyaLeza anjiisyo yakwe. 2 Mukuyungizya, aabo bali aabasimalelo basyoma, tabeelede kubalangila aansi akaambo kakuti mbakombinyina. Pesi beelede kubeleka amoyo woonse nkaambo aabo bagwasigwa aamilimu mibotu njibachita, mbasyomi alubo mbayandwa.
Yinkilila kunembo kuyiisya zintu eezi akupa malayilile aaya. 3 Kuti muntu wayiisya imwi njiisyo alubo katazuminani aanjiisyo eeyi mbotu* iizwa kuMwaami wesu Jesu Kkristu, naakuti anjiisyo yeendelana aakulipeda kuli Leza, 4 ulalisumpula alubo taakwe nchamvwisisisya pe. Ngusinkazi alubo uyandisya kukazyania atala amabala. Zintu eezi zyeeta munyono, kulwana, kubejelezyania,* kuyeeyelana zintu zibi, 5 kukazyania lubbe atala atuntu tuniini abantu bapambanikide mizeezo batakwe kasimpe, aabo bayeeya kuti kulipeda kuli Leza ninzila yakujana bunoti. 6 Kwaamba choonzyo, kulipeda kuli Leza akukkutisikana, kweeta bunoti bwiingi loko. 7 Nkaambo taakwe chintu nchitwakeeta munyika alubo taakwe chintu nchituzoozwaacho pe. 8 Nkinkaako, kuti katuli aachakulya azyakuzwaata,* tunookkutisikana azintu eezi.
9 Pesi aabo bakanzide kunota, bawida mumasunko amukakole amukulombozya zintu zyiingi zyabufuba-fuba, zyeeta mapenzi alubo ziwaalila bantu mulunyonyooko amukuloba. 10 Nkaambo kuyandisya mali muyanda wazintu zyoonse zibi alubo kwiinda mukwiiyandisya munzila iili boobu, bamwi bapambulwa mulusyomo alubo baliyasuula koonse-koonse amachise miingi.
11 Nikuba oobo, iwe numuntu waLeza, chija zintu eezi. Pesi tobela bululami, kuyoowa Leza, lusyomo, luyando, kulisimya akuba aamoyo uubombede. 12 Lwana nkondo mbotu yalusyomo, jatisisya buumi butamani, oobo mbwaakayitilwa alubo mbwaakaambilizya kabotu aantanganana kunembo lyabakamboni biingi.
13 Kunembo lyaLeza uubamba zintu zyoonse kazili zyuumi, akuli Kkristu Jesu ooyo wakapa bukamboni bulikabotu kunembo lyaPontiyo Pilato, ndikulayilila kuti 14 ubambe mulawu munzila iitakwe kabata alubo iitasoleki pe, kusikila kukuyubununwa kwaMwaami wesu Jesu Kkristu, 15 ooko nkwatazootondeezye Simanguzu uuli aalikke alubo uubotelwa, kuziindi zyako zibikkidwe. We Mwaami wabaabo beendelezya kabali baami alubo nguSimalelo wabaabo beendelezya kabali basimalelo, 16 nguwe alikke uutafwi, uukkala mumumuni uutasikiki, ooyo uutanabonwa aamuntu alubo uutakonzyi kubonwa. Kulinguwe akube lulemeko amanguzu aatamani. Ameni.
17 Layilila aabo banotede mubwiime bwazintu oobuno,* kuti batalisumpuli akuti batabikki bulangilizi bwabo kubunoti bunyonyooka, pesi babubikke kuli Leza ooyo uutupa chakuvuzya zintu zyoonse zipa kuti tubotelwe. 18 Babuzye kuti bachite zibotu, banote mumilimu mibotu, bape amoyo woonse,* balibambile kwaabilana aabamwi, 19 kabalibambila kabotu bunoti, nkukwaamba ntalisyo mbotu yabuumi bulikunembo, kuchitila kuti bajatisisye buumi bwachoonzyo.
20 Timoti, bamba zintu nzwaakapegwa, ufutatile makani aatagwasyi aabisya zintu zisalala, amakani aakukazyania ngibaamba kuti “nduzibo,” kakuli ngakubeja. 21 Kwiinda mukulisumpula aaluzibo luli boobu, bamwi baleya mulusyomo.
Luzyalo lupati aalube aandinywe.