Detoronomi
31 Mpawo Mozesi wakeenda waakwaamba majwi aaya kuma-Israyeli boonse. 2 Wakati kulimbabo: “Sunu ndili aaminyaka iili 120, tandichikonzyi pe kumuzulwida nkaambo Jehova wakati kulindime, ‘Tuzoomuzubuki pe Jodani ooyu.’ 3 Jehova Leza wanu nguwe uulikuzubuka kunembo lyanu. We lwakwe uzoonyonyoona zisi eezi kunembo lyanu alubo muzoozitanda. Joshuwa nguwe uutamuzulwide kuti muzubuke mbuli mbaakaamba Jehova. 4 Jehova uzoozichita mbuli mbaakachita kuli Sihoni a-Ogi, baami bama-Amori, anyika yabo chiindi naakabanyonyoona. 5 Jehova uzoopa kuti mubazunde alubo mweelede kubachita kweendelana amulawu woonse ngundamupa. 6 Amusime mube aachibindi. Mutayoowi pe nikuba kuzazama kunembo lyabo, nkaambo Jehova Leza wanu ulikweenda aandinywe. Tazoomulekelezyi pe nikuba kumusiya.”
7 Mpawo Mozesi wakayita Joshuwa wamubuzya majwi aatobela kunembo lyama-Israyeli boonse aakuti: “Sima ube aachibindi, nkaambo nduwe nutazoonjizye bantu aaba munyika Jehova njaakakonkezya kumasianyinakulu kuti uzoobapa alubo uzoobapa kuti ibe lukono lwabo. 8 Jehova nguwe uulikweenda kunembo lyako, unooli aanduwe. Tazookulekelezyi pe nikuba kukusiya. Utayoowi pe nikuba kuzazama.”
9 Mpawo Mozesi wakalemba Mulawu ooyu wawupa bapayizi maLevi, banyampula bbokesi lyachizuminano chaJehova abaalu boonse ba-Israyeli. 10 Mozesi wakabalayilila kati: “Kumamanino aaminyaka iili musanu ayibili aachiindi chibikkidwe mumunyaka wakwaangununwa, muchiindi chaPobwe lyaZivututu, 11 ma-Israyeli boonse nibazooboola kunembo lyaJehova Leza wanu kundawu njatazoosale, mweelede kubabalila Mulawu ooyu kuti ma-Israyeli boonse bawumvwe. 12 Amubunganizye bantu, baalumi, banakazi, bana abeenzu bali mumyuunzi yanu kuchitila kuti baswiilile, bayiye alubo bayoowe Jehova Leza wanu akuti batobele majwi woonse aaMulawu ooyu. 13 Mpawo bana babo batazi Mulawu ooyu bazooswiilila, bayiye akuyoowa Jehova Leza wanu mumazuba woonse aabuumi bwanu munyika njimutazookone nimwazubuka Jodani.”
14 Jehova wakati kuli Mozesi: “Bona! Chaswena chiindi chakuti ufwe. Yita Joshuwa muzooyimikile aatente lyakuswaanganina kuchitila kuti ndimubikke kuba muzulwidi.” Nkinkaako, Mozesi aJoshuwa bakayinka baakwiimikila kutente lyakuswaanganina. 15 Mpawo Jehova wakalibonia kutente mumusumpuululu wajoba, mpawo musumpuululu ooyo wakayimikila kumanjililo aatente.
16 Jehova wakati kuli Mozesi: “Bona, waba aafwiifwi kufwa.* Bantu aaba bazoosaanguna kuchita bwaamu bwakumuuya abaleza beenzu babazyungulukide munyika njibaya kukubweza. Bazoondisiya akutyola chizuminano changu nchindakapangana aambabo. 17 Kuchiindi eecho, bukali bwangu buzoobavutukila alubo ndizoobasiya ndibasisile busyu bwangu kusikila bamane. Mpawo nibazoosikilwa aamapenzi amakataazyo miingi bazoowamba kuti, ‘Mapenzi aaya aatusikila atondeezya kuti Leza tachili aakati kesu pe!’ 18 Pesi ndinoosiside busyu bwangu mubuzuba oobo akaambo kabubi boonse mbubakachita kwiinda mukutobela bamwi baleza.
19 “Amulembe lwiimbo oolu muluyiisye ma-Israyeli. Abalwiiye kuchitila kuti lube kamboni uubapa mulandu. 20 Nindazoobanjizya munyika njindakakonkezya kumasianyinakulu—nyika iikunka malili abuchi—alubo nibazoolya akukkuta akukkala kabotu,* bazooya kukubelekela bamwi baleza, tabazoondilemeki pe alubo bazootyola chizuminano changu. 21 Mapenzi amakataazyo miingi naazoobasikila, lwiimbo oolu luzooba kamboni uubapa mulandu (nkaambo bana babo tabeelede kululuba pe), nkaambo ndilaazi makanze ngibabaawo kale nikuba kanditanabanjizya munyika njindakakonkezya.”
22 Mozesi wakalemba lwiimbo oolu mubuzuba oobo akuluyiisya ma-Israyeli.
23 Wakabikka* Joshuwa mwana waNuni kuti abe muzulwidi mpawo wakamubuzya kuti: “Sima ube aachibindi, nkaambo nduwe nutazoonjizye ma-Israyeli munyika njindakabakonkezya, ndinooli aanduwe.”
24 Mozesi mbaakamaninsya biyo kulemba majwi woonse aaMulawu ooyu mubbuku, 25 wakalayilila maLevi banyampula bbokesi lyachizuminano chaJehova kati: 26 “Amubweze bbuku eeli lyaMulawu mulibikke kumbali aabbokesi lyachizuminano chaJehova Leza wanu mpawo lizooba kamboni uubapa mulandu mpawaawo. 27 Ndizizi loko kuti muli basikupapila akuti muli aamitwe miyumu. Kuti kakuli mwakali kumupapila Jehova kandichili aandinywe, nkukwaamba kuti muzooyindilila biya nindafwa. 28 Amundibunganizizye baalu boonse bamisyobo yanu abalupati-pati banu, ndaambe majwi aaya kabamvwide, alubo ndachita kuti julu anyika zibe bakamboni babapa mulandu. 29 Ndizizi loko kuti nindafwa muzoochita zintu zibi muleye munzila njindakamulayilila. Kwaamba choonzyo, mapenzi azoomusikila mumazuba aali kunembo, nkaambo muzoochita zintu zibi mumeso aaJehova akumunyemya akaambo kamilimu yamaanza aanu.”
30 Mozesi wakaamba majwi aalwiimbo oolu kuzwa kumatalikilo do kumamanino, mbungano yoonse yama-Israyeli kayiswiilizizye: