Kuli Tito
3 Yinkilila kunembo kubayeezya kuti balibombye akuti baswiilile mfulumende abeendelezi, balibambile kuchita milimu mibotu yoonse, 2 bataambuuli zintu zibi kumuntu woonse, batabusyi nkondo, pesi ababe bantu bamvwisisisya, kabatondeezya kuti bali aamoyo uubombede kubantu boonse. 3 Nkaambo aali chimwi chiindi, andiswe twakali bantu batakwe maanu, bataswiilili, beenwa, bazike bakuyanda zintu zisiyene-siyene akulikondelezya, alubo twakali kuchita zibi akuchitilana munyono, twakali kusesemya alubo twakali kuzondana.
4 Nikuba oobo, chiindi luzyalo lwaMufutuli wesu Leza, aluyando ndwalaalo kubantu, nizyakayubununwa 5 (kutali akaambo kakuti kuli milimu iiluleme njitwakachita pesi akaambo kaluzyalo lwakwe), wakatufutula kwiinda mukutusanzya akutweeta kubuumi alubo wakapa kuti tube bapya kwiinda mumuuya uusalala. 6 Wakatila muuya ooyu aalindiswe kawuli mwiingi* kwiinda muli Jesu Kkristu Mufutuli wesu, 7 kuchitila kuti nitwamana kwaambwa kuti tuliluleme kwiinda muluzyalo lupati lwayooyo, tukabe basikukona kweendelana abulangilizi bwabuumi butamani.
8 Majwi aaya alasyomeka alubo ndiyanda kuti wiinkilile kunembo kuzikitizya makani aaya, kuchitila kuti bantu bakasyoma Leza bayinkilile kunembo kubikka mizeezo yabo kukuchita milimu mibotu. Zintu eezi nzibotu alubo zigwasya bantu.
9 Pesi utaliswaanizyi mutwaambo twakukazyania twabufuba-fuba atwamazyalani, amukupambana akulwana akaambo kaMulawu, nkaambo zintu eezi tazigwasyi pe alubo nzyabuyo. 10 Muntu uusumpula kabunga, utaliswaanizyi aanguwe pe nwaazwa aakumulaya* kakusaanguna akachibili, 11 nkaambo ulizi kuti muntu uuli boobo wapambuka munzila, ulikubisya akuti ulikulipa mulandu.
12 Nindazootuma Atemasi naakuti Tikkikko kulinduwe, chita zyoonse nzukonzya kuti usike kulindime kuNikkopoli nkaambo nkuko nkundasala kukkala muchiindi champeyo. 13 Pa Zenasi, ooyo uuzi Mulawu a-Apolo zyoonse nzibayanda, kuchitila kuti kutabi chintu nchibabula mulweendo lwabo. 14 Pesi bantu besu abayiye kuchita milimu mibotu, kuchitila kuti bagwasilizye chiindi nikuyandikana lugwasyo chakufwambaana, kuchitila kuti batabi bantu batazyali michelo.
15 Bantu boonse mbindilaabo balikukujuzya. Undijuzizye aabo batuyanda loko mulusyomo.
Luzyalo lupati alube aandinywe moonse.