Makani mabotu aakalembwa aaMateyo
25 “Mpawo Bwaami bwakujulu bulakonzya kukozyanisigwa aabanakalindu* bali kkumi bakabweza malambe aabo, mpawo bazwa kuti bakaakutambule sikukwata. 2 Bali musanu babo bakali bafuba-fuba alubo bamwi bali musanu bakalichenjede.* 3 Nkaambo bafuba-fuba bakabweza malambe aabo pesi teebakabweza mafuta pe, 4 kakuli bachenjede bakabweza mafuta muzibikkilo zyabo aamwi amalambe aabo. 5 Chiindi sikukwata naakanonoka, banakalindu boonse bakaguna mpawo bakoona. 6 Aakati kamansiku, kwakamvwikka bantu bakali koompolola kabati: ‘Sikukwata wasika! Amwiinke mukamutambule.’ 7 Mpawo banakalindu boonse bakabuka mpawo bakaabamba kabotu malambe aabo. 8 Bafuba-fuba bakabuzya bachenjede kuti: ‘Amutuungwide mafuta aanu, nkaambo malambe eesu aamba kuzima.’ 9 Bachenjede bakasandula kabati: ‘Amwi mafuta ngitulaawo takootukkwana pe toonse. Amwiinke kuli baabo baawuzya, mukalyuulile.’ 10 Nibakachili kuya kukuula mafuta, sikukwata wakasika. Banakalindu bakalilibambilide bakanjila aasikukwata mupobwe lyamuchado mpawo mulyango wakajalwa. 11 Nikwakayinda chiindi, bamwi banakalindu bakasika kabati: ‘Mwaami, Mwaami, tujulile!’ 12 Pesi wakasandula kuti: ‘Ndimubuzya simpe kuti, tandimuzi pe.’
13 “Nkinkaako, amukkale kamulindide nkaambo tamubuzi pe buzuba niiba awa.
14 “Nkaambo bwaami bwakujulu buli mbuli mwaalumi wakali waamba kwiinka kunyika iili kule, wakayita bazike bakwe mpawo wakabasiila zintu zyakwe. 15 Wakusaanguna, wakamupa matalenta* aali musanu, umwi aabili mpawo umwi limwi. Wakapa umwi awumwi kweendelana anzyaakali kukonzya, mpawo wakayinka kunyika iili kule. 16 Ooyo wakapegwa matalenta aali musanu wakeenda mpawaawo, waakuchita bbizinesi angawo mpawo wakajana amwi aali musanu. 17 Munzila iikozyenie, ooyo wakapegwa aabili, wakajana amwi aabili. 18 Pesi muzike wakapegwa talenta limwi, wakeenda waakusya mpawo wasisa mali* yasimalelaakwe.
19 “Nikwakayinda chiindi chilamfu, simalelaabo wakasika mpawo wakabamba nkani zyamali ambabo. 20 Nkinkaako, ooyo wakapedwe matalenta aali musanu, wakasika kuli simalelaakwe kali aamatalenta amwi aali musanu, kati: ‘Simalelaangu, wakandisiila matalenta aali musanu, lino bona, ndakajana amwi matalenta aali musanu.’ 21 Simalelaakwe wakamubuzya kuti: ‘Wakachita kabotu, numuzike mubotu alubo uusyomeka! Wakasyomeka kuzintu ziche. Ndizookusala kuti weendelezye zintu zyiingi. Njila mukukondwa kwasimalelaako.’ 22 Mpawo ooyo wakapedwe matalenta aabili, wakasika kuli simalelaakwe, kati: ‘Simalelaangu, wakandisiila matalenta aabili, lino bona, ndakajana amwi aabili.’ 23 Simalelaakwe wakamubuzya kuti: ‘Wakachita kabotu, numuzike mubotu alubo uusyomeka! Wakasyomeka kuzintu ziche. Ndizookusala kuti weendelezye zintu zyiingi. Njila mukukondwa kwasimalelaako.’
24 “Kumamanino, muzike wakapedwe talenta limwi wakasika, mpawo wakati: ‘Simalelaangu, ndakalizi kuti uli muntu uukataazya alubo uuyanda kutebula mpaakatabyala pe akuyola mpaakatapupulula pe. 25 Nkinkaako, ndakayoowa mpawo ndakayinka ndaakusisa talenta lyako munyika. Lino nzezi zintu zyako.’ 26 Simalelaakwe wakamusandula kuti: ‘Numuzike mubi alubo mukandu,* kabi wakalizi kuti nditebula mpundakatabyala pe akuti ndiyola mpundakatapupulula? 27 Nkinkaako, wakeelede kubikka mali* yangu mubbenki, kuchitila kuti mpundali kuzoosikila, ndiijane kayili yazyala.
28 “‘Nkinkaako, amumunyange talenta eelyo mpawo mulipe ooyo uuli aamatalenta aali kkumi. 29 Nkaambo muntu woonse ulaazyo, uzoopegwa zyiingi alubo uzooba aazyiingi loko. Pesi ooyo uutakwe chintu, uzoonyangwa nichiba eecho nchalaacho. 30 Amumuwaalile aanze mumudima muzike ooyu uutagwasyi. Ooko nkuko nkwatazoolilile akulumina ntwinyo.’
31 “Mwanaamuntu aazoosika mubulemu bwakwe kali aangilozi zyoonse, uzookkala aachuuno chakwe chabwaami chabulemu. 32 Zisi zyoonse zizoobunganizigwa kunembo lyakwe alubo uzoopambula bantu mbuli mweembeli mbapambula mbelele kuzwa kumpongo. 33 Mpawo mbelele uzoozibikka kukuboko kwakwe kwachilisyo pesi mpongo uzoozibikka kuchimweensi.
34 “Mpawo Mwaami uzoobuzya aabo balikuchilisyo chakwe kuti: ‘Amuze, inywe nimwakalongezegwa aaTaata, mukone Bwaami mbumwakabambilwa kuzwa kumatalikilo aanyika. 35 Nkaambo ndakaba aanzala mpawo mwakandipa chakulya, ndakali aanyota mpawo mwakandipa maanzi aakunywa. Ndakali mweenzu mpawo mwakanditambula kabotu, 36 kanditazweete* mwakandizwaatika. Ndakachiswa mpawo mwakandilangania. Ndakali mujele mpawo mwakandiswaya.’ 37 Mpawo baluleme bazoomusandula kabati: ‘Mwaami, ndiilili nitwakakubona kuli aanzala mpawo twakupa chakulya naakuti kuli aanyota mpawo twakupa maanzi aakunywa? 38 Ndiilili nitwakakubona kuli mweenzu mpawo twakutambula kabotu naakuti kutazweete mpawo twakuzwaatika? 39 Ndiilili nitwakakubona kuchisidwe naakuti kuli mujele mpawo twakuswaya?’ 40 Mwaami uzoobasandula kuti: ‘Kwaamba choonzyo, ndimubuzya kuti, nzimwakachita kuli umwi wabaniini wabakombima aaba, kuli mbuli kuti mwakazichitila ndime.’
41 “Mpawo uzoobuzya balikuchimweensi chakwe kuti: ‘Amuzwe kulindime, inywe nimutukidwe, muye mumulilo uutamani uubambilidwe Dyabbulosi angilozi zyakwe. 42 Nkaambo ndakaba aanzala pesi teemwakandipa chakulya pe, ndakali aanyota pesi teemwakandipa maanzi aakunywa pe. 43 Ndakali mweenzu pesi teemwakanditambula kabotu pe, teendakazweete pesi teemwakandizwaatika pe, ndakali kuchiswa alubo ndakali mujele pesi teemwakandilangania pe.’ 44 Mpawo ambabo bazoomusandula kuti: ‘Mwaami, ndiilili nitwakakubona kuli aanzala naakuti kuli aanyota naakuti kuli mweenzu naakuti kutazweete naakuti kuchisidwe naakuti kuli mujele mpawo twaleka kukubelekela?’ 45 Mpawo uzoobasandula kuti: ‘Kwaamba choonzyo, ndimubuzya kuti, mbuli mbumwakatachitila umwi wabaniini aaba, kuli mbuli kuti teemwakachitila ndime pe.’ 46 Bantu aaba bazoonyonyoonwa kukabe kutamani,* pesi baluleme bazootambula buumi butamani.”