Makani Aakalembwa aaLukka
13 Aachiindi eecho, bamwi bantu bakaliwo bakamubuzya atala abantu bakuGalili, Pilato mbaakaswaanizya ganzi lyabo azipayizyo zyabo. 2 Pesi wakabasandula kuti: “Mubonaanga chakapa kuti bantu bakuGalili bachitikilwe mapenzi aaya nchakuti bakali babi loko na kwiinda bantu boonse bamuGalili? 3 Teembubo pe. Pesi ndimubuzya kuti, kuti teemwasanduka, andinywe moonse muzoonyonyoonwa mbuli mbabo. 4 Naakuti bantu bali 18 bakalimbwa ngazi kuSilowamu mpawo bafwa, mubonaanga bakali aamulandu mupati loko na kwiinda bantu boonse bakkala muJerusalema? 5 Teembubo pe. Pesi ndimubuzya kuti, kuti teemwasanduka, andinywe moonse muzoonyonyoonwa mbuli mbabo.”
6 Mpawo wakababuzya chikozyanisyo eechi, wakati: “Umwi mwaalumi wakali aamukuyu wakabyedwe mumuunda wakwe wamisaansa. Mpawo wakasika kuti azoolange nkuyu, pesi taakwe nchaakajana pe. 7 Mpawo wakabuzya mubelesi wamumuunda wamisaansa kuti: ‘Lino ndaba aaminyaka iitatu kandiza kuzoolanga nkuyu mumunsamu ooyu pesi taakwe nchindilikujana pe. Ugonke! Ulikumaninsya ndawu.’ 8 Mpawo mubelesi wakasandula kuti, ‘Simalelaangu, usiye lubo kwamunyaka uumwi ndijane buulimina akuubikka manyuwa. 9 Kuti wazyala michelo, zilikabotu pesi kuti waleka, uzoowugonke.’”
10 MuSabata, wakali kuyiisya muli chimwi chikombelo. 11 Lino bona! Kwakali umwi mwanakazi wakali aamuuya wakapede kuti achiswe* kwaminyaka iili 18 alubo wakali gogomene katakonzyi pe koololoka. 12 Jesu naakamubona, wakamwiita mpawo wakamubuzya kuti: “Yoomwanakazi, waangununwa kubulwazi bwako.” 13 Mpawo wakamubikka maboko, mpawo mwanakazi ooyo wakoololoka mpawaawo alubo wakasaanguna kulumbayizya Leza. 14 Pesi mweendelezi wachikombelo wakanyema loko nkaambo Jesu wakasilika muSabata. Nkinkaako, wakabuzya bantu kuti: “Kuli mazuba aali musanu alimwi aakubeleka, nkinkaako, amuze muzoosilikwe mumazuba aayo, kutali mubuzuba bwaSabata.” 15 Pesi Mwaami wakamusandula kuti: “Nibasikuupa-wupa, ngwani aakati kanu uutaangununi ng’ombe yakwe naakuti donki lyakwe muSabata kuti ayitole kukunywa maanzi? 16 Ani mwanakazi ooyu, mwana wa-Abbrahamu, Saatani ngwaakaangide kwaminyaka iili 18, teelede kwaangununwa na kubulwazi bwakwe mubuzuba bwaSabata?” 17 Jesu naakaamba zintu eezi, bantu boonse bakali kumukazya bakafwa bweeme, pesi nkamu yoonse yabantu yakabotelwa loko akaambo kazintu zyoonse zibotu nzyaakachita.
18 Nkinkaako, wakati: “Bwaami bwaLeza buli mbuliinzi, alubo kujana ndabukosyanisyaanzi? 19 Buli mbuli nseke yamasitadi muntu njaakabweza mpawo wayibyala mumuunda wakwe. Mpawo yakamena, yakomena yaba munsamu alubo bayuni bakujulu bakayaka zitendele aamitabi yawo.”
20 Alubo wakati: “Bwaami bwaLeza kujana ndabukozyanisyaanzi? 21 Buli mbuli bumena, mbwaakabweza mwanakazi akubukanda mufulawa iizuzya zipimyo zipati zitatu,* kusikila yoonse yafufumuka.”
22 Naakali kuya kuJerusalema, wakali kuya bunjila mumyuunzi amutuunzi kayabuyiisya. 23 Mpawo umwi mwaalumi wakati kulinguwe: “Mwaami, aabo balikufutulwa mbache na?” Mpawo wakati kulimbabo: 24 “Amulwisye changuzu kuti munjile mukalyango kamanikide nkaambo ndimubuzya kuti, biingi bazooyanda kunjila pesi bazookachilwa. 25 Kuti mwining’anda wanyampuka mpawo wakkiya kumulyango, inywe muzooyimikila aanze kamuli kukonkomona kumulyango kumwi kamuti, ‘Mwaami tujulile.’ Pesi uzoomusandula kuti: ‘Tandizi pe kuti muzwa kuli.’ 26 Mpawo muzoosaanguna kwaamba kuti: ‘Twakali kulya akunywa kunembo lyako alubo wakali kuyiisya mumigwagwa yesu mipati.’ 27 Pesi uzoomusandula kuti, ‘Tandizi pe kuti muzwa kuli. Amuzwe kulindime, inywe moonse nibasikuchita zitaluleme!’ 28 Ooko nkuko nkumutazoolilile akulumina ntwinyo mwazoobona Abbrahamu a-Izakka aJakkobo abapolofita boonse kabali muBwaami bwaLeza pesi inywe kamuli mwawaalilwa aanze. 29 Mukuyungizya, bantu bazoosika kabazwa kubuzwezuba akububbila akunyika akumusanza alubo bazookkala aatebbulu muBwaami bwaLeza. 30 Amubone, kuli bakumamanino batazoobe bakusaanguna alubo kuli bakusaanguna batazoobe bakumamanino.”
31 Ku-awa njiyeeyo, bamwi baFarisi bakasika mpawo bakamubuzya kuti: “Zwa mundawu eeyi weende, nkaambo Herodi uyanda kukujaya.” 32 Pesi wakababuzya kuti: “Amwiinke mukabuzye mwaaba ooyo kuti, ‘Sunu ajuunza ndinooponia bachiswa akutanda madimoni pesi mubuzuba bwachitatu ndinooli ndamaninsya.’ 33 Nikuba oobo, ndeelede kwiinkilila kunembo alweendo lwangu sunu ajuunza azoona, nkaambo tazichiti pe kuti mupolofita ajayilwe kunze aamuunzi waJerusalema. 34 Jerusalema, Jerusalema, numujayi wabapolofita asikubatulula mabwe aabo bakatumwa kulinduwe. Kwaziindi zyiingi, ndakali kuyanda kubabunganizyaamwi bana bako, mbuli nkuku mbiifukatila twana twayo mumababa aayo! Pesi mwakakaka. 35 Amubone! Mwatakatilwa ng’anda. Ndimubuzya kuti, tamuzoondiboni lubo pe kusikila muzoowambe kuti, ‘Ulilongezedwe ooyo uuza muzina lyaJehova!’”*