Detoronomi
1 Aaya ngiimajwi Mozesi ngaakabuzya ma-Israyeli woonse muchilawu chaJodani munkanda, muntandabale iili kunembo aaSufi, aakati kaParani, Tofeli, Labbani, Hazeroti, aDizihabbu. 2 Kuzwa kuHorebbu kusika kuKkadeshi-bbaneya, musinzo wamazuba aali 11 kuti kubelesya nzila yakuChilundu chaSeyiri. 3 Mumunyaka wachi 40 mumweezi wachi 11 mubuzuba bwakusaanguna bwamweezi ooyo, Mozesi wakabuzya ma-Israyeli majwi woonse Jehova ngaakamulayilila kuti ababuzye. 4 Eezi wakazichita naakazwaakuzunda Sihoni mwaami wama-Amori, wakali kukkala kuHeshibboni a-Ogi mwaami waBbashani wakali kukkala mu-Ashitaroti, mu-Edireyi. 5 Muchilawu chaJodani munyika yaMowabbu, Mozesi wakasaanguna kupandulula Mulawu kati:
6 “Nitwakali kuHorebbu, Jehova Leza wesu wakatubuzya kuti, ‘Mwakkalisya muchilawu eechi chili aazilundu. 7 Amunyampuke muye kuchilawu chili aazilundu chama-Amori, mutozye kuli basimayakilane babo boonse bali mu-Arabba, chilawu chili aazilundu, Shefela, Negebbu akunkomwe yalwizi, nyika yamaKkenani aLebbanoni* kusikila kumulonga mupati, nkukwaamba mulonga waYufurati. 8 Amubone, ndamupa nyika eeyi, amwiinke mukabweze nyika Jehova njaakakonkezya kupa mawuso, nkukwaamba Abbrahamu, Izakka aJakkobo abana babo bakali kuzoobatobela.’
9 “Aachiindi eecho, ndakamubuzya kuti, ‘Tandikonzyi pe kumunyampula andilikke. 10 Jehova Leza wanu wamuvuzya alubo sunu muli biingi loko mbuli nyenyeezi zyakujulu. 11 Jehova, Leza wamasianyookulu amuvuzye kwaziindi zyiindulwidwe tuli chuulu alubo amulongezye mbuli mbaakamusyomezya. 12 Nga ndilawunyampula biyeni andilikke mukuli wanu akukazyania kwanu? 13 Amusale baalumi basongo, bachenjede alubo bali aaluzibo aakati kamisyobo yanu mpawo ndilababikka kuti babe basilutwe banu.’ 14 Mwakandisandula kuti: ‘Nzuwatubuzya kuti tuchite zilikabotu.’ 15 Nkinkaako, ndakabweza basilutwe bamisyobo yanu, baalumi basongo alubo bali aaluzibo akubabikka kuti babe basilutwe babantu bali zyuulu, bali myaanda, bali makumi aali musanu, abamakumi abamwi kuti babagwasilizye.
16 “Aachiindi eecho, babetesi banu ndakabalayilila kuti, ‘Kuti kwaba kaambo aakati kababbululu banu, mweelede kubeteka munzila iiluleme aakati kamuntu abbululu wakwe naakuti amuzwakule. 17 Tamweelede kusaluula pe chiindi nimubeteka. Muniini mweelede kumubeteka munzila iikozyenie amupati. Tamweelede kuyoowa bantu pe nkaambo kubeteka nkukwaLeza. Kuti kwaba kaambo kamuyumina, mukeete kulindime ndikamvwe.’ 18 Aachiindi eecho, ndakamulayilila zintu zyoonse nzimwakeelede kuchita.
19 “Twakanyampuka kuHorebbu akwiinda munkanda iilya mpati alubo iiyoosya njimwakabona munzila iitozya kuchilawu chili aazilundu chama-Amori mbuli mbaakali watulayilila Jehova Leza wesu, mpawo twakasika kuKkadeshi-bbaneya. 20 Mpawo ndakamubuzya kuti, ‘Mwasika kuchilawu chili aazilundu chama-Amori, Jehova Leza wesu njalikutupa. 21 Amubone, Jehova Leza wanu wamupa nyika, amwiinke mukayibweze, mbuli mbaakamubuzya Jehova Leza wamasianyookulu. Mutayoowi pe alubo mutazazami.’
22 “Nikuba oobo, moonse mwakandizida akundibuzya kuti, ‘Atusaangune kutuma bantu bakalange kuti nyika eeyo yiimvwi biyeni, kuchitila kuti bazootubuzye nzila njitweelede kubelesya akuti myuunzi yiimvwi biyeni. 23 Muzeezo ooyo wakandibotela, nkinkaako, ndakasala baalumi bali 12 kuzwa kumisyobo yanu yoonse. 24 Bakazwa bayinka kuchilawu chili aazilundu mpawo bakasika muKalonga ka-Eshikkolo akwiilanga-langa. 25 Mpawo bakachela imwi michelo yanyika eeyo bayiyeta kulindiswe alubo bakatubuzya kuti, ‘Nyika njalikutupa Jehova Leza wesu nimbotu.’ 26 Pesi mwakakaka kutanta, mwakakaka kuswiilila malayilile aaJehova Leza wanu. 27 Mwakali kung’ung’una mumatente aanu kamuti, ‘Choonzyo Jehova ulatuzonda, nchaakatugwisya munyika ya-Ijipita kuti azootubikke mumaboko aama-Amori kuti batunyonyoone. 28 Ani ooko nkutuya kuli biyeni? Beenzuma bakatumana manguzu* nibakati, “Bantu bankuko mbapati alubo mbalamfu kwiinda ndiswe alubo myuunzi yabo mipati alubo iliyakilidwe kusika kujulu,* alubo twakabona bana bama-Anakki.”’
29 “Nkinkaako, ndakamubuzya kuti, ‘Mutazazami alubo mutayoowi pe akaambo kambabo. 30 Jehova Leza wanu uzooyinka kunembo lyanu alubo uzoomulwanina mbuli mbumwakalibonena ku-Ijipita. 31 Alubo munkanda mwakabona Jehova Leza wanu mbaakamunyampula kundawu zyoonse kusika mwasika aano, mbuli wisi mbanyampula mwaanakwe.’ 32 Nikuba kuti mwakazibona zyoonse eezi, teemwakaba aalusyomo pe muli Jehova Leza wanu, 33 ooyo wakali kweenda kunembo lyanu kuti akalange-lange ndawu njimwakali kuyookkempela. Wakali kulibonia mumulilo mansiku amujoba sikati, kuchitila kuti amutondeezye nzila njimwakeelede kweenda mulinjiyo.
34 “Aachiindi eecho, Jehova wakazimvwa nzimwakali kwaamba alubo wakanyema akukonka kati, 35 ‘Taakwe naba uumwi wazyalani eeli bbi utazoobone nyika mbotu njindakakonkezya kupa mawuso, 36 kunze kwaKkalebbu mwana waJefune. Uzooyibona alubo ndizoomupa aamwi abana bakwe nyika njaakeenda aalinjiyo, nkaambo wakatobela Jehova amoyo woonse.* 37 (Andime Jehova wakandinyemena akaambo kandinywe alubo wakandibuzya kuti, “Ayebo tuzoonjili pe mulinjiyo. 38 Joshuwa mwana waNuni wiimvwi kunembo lyako nguwe uutazoonjile munyika eeyo. Musimye,* nkaambo nguwe uutazoope kuti ma-Israyeli bayikone.”) 39 Mukuyungizya, bana banu mbimwakali kwaamba kuti bazoobwezegwa alubo batazi chibotu achibi, mbimbabo batazoonjile alubo ndizoobapa njiyo. 40 Pesi inywe amubweede muye kunkanda kamubelesya nzila yakuLwizi Lusalala.’
41 “Mpawo mwakati kulindime, ‘Twabisizya Jehova, lino tulayinka tukalwane mbuli mbaakatulayilila Jehova Leza wesu!’ Nkinkaako, umwi awumwi wanu wakabweza zilwanisyo zyakwe zyankondo, nkaambo mwakali kubonaanga nchintu chuuba kutanta chilundu. 42 Pesi Jehova wakandibuzya kuti, ‘Babuzye kuti: “Mutayinki pe kuyoolwana, nkaambo tandinooli aandinywe pe. Kuti mwiinke, ndaba zyanu, muyoozundwa abasinkondonyokwe.” 43 Ndakamubuzya pesi teemwakaswiilila pe. Mwakawukaka mulawu waJehova alubo mwakalisumpula kwiinda mukweezya kutanta chilundu. 44 Mpawo ma-Amori bakali kukkala muchilundu eecho bakasika kuti bazooswaanane aandinywe mpawo bakamwaandilila mbuli nzuki alubo mwakamwayikizyania muSeyiri kuyoosika kuHoma. 45 Nkinkaako, mwakaboola akusaanguna kulila kunembo lyaJehova, pesi Jehova taakamuswiilila pe alubo taakaba aandaba pe andinywe. 46 Eezi nzizyo zyakapa kuti mukkale muKkadeshi kwamazuba miingi.