Mukayintu Wakali Kuchikala

Niyakiinda Pasika, Jesu abasikwiiya bakwe bakiinda kuSamariya kababweeda kuGalilaya. Jesu wakiimikila afwiifwi akuSikka, aachikala chaJakkobo. Naakakkede mpawaawo, basikwiiya bakwe bakiinka kuyoowula chakulya.

Kwakasika mukayintu kuzooteka maanzi. Jesu wakati kulinguwe: ‘Ndipe, maanzi akunywa.’ Mpawo mukayintu wakati: ‘Nkamboonzi nuwambuula andime? Ndili muSamariya. MaJuda amaSamariya tabaambuuzyani pe.’ Mpawo Jesu wakati: ‘Kaansinga walindizi, walikunoondikumbila maanzi, mpawo ndalikunookupa maanzi aapa buumi.’ Mukayintu wakati: ‘Wambaanzi? Tukwe chakutesya.’ Jesu wakati: ‘Muntu uunywa maanzi ngendiyoomupa takabi anyota lubo.’ Mukayintu wakati: ‘O Mwami, kondipa maanzi aayo.’

Mpawo Jesu wakamubuzya kuti: ‘Koya ukayite mulumaako.’ Mukayintu wakati: ‘Nsikwe mulumi pe.’ Jesu wakati: ‘Ulikwaamba masimpe. Wakakwetwe kwaziindi zili musanu alimwi ooyo ngukkede aawe lino taali mulumaako pe.’ Mukayintu wakati: ‘Ndaziba kuti ulimusinsimi. Bantu bakulindiswe basyoma kuti tweelede kukomba Leza kuchilundu eechi, pesi maJuda baamba kuti tweelede kukombela kuJerusalemu luzutu. Ndibonaanga azoosika Mesiya, uzootuyiisya mbutweelede kukomba.’ Mpawo Jesu wakamubuzya majwi ngaakatayinabuzya muntu aakuti: ‘Ndime Mesiya.’

Mukayintu wakachijaana kumuunzi akubuzya maSamariya kuti: ‘Ndibonaanga ndamujana Mesiya. Wandibuzya zintu zyoonse nzindakachita. Atweende mukamubone.’ Bakiinka amukayintu ooyu kuchikala mpawo bakaswiilila Jesu kalikuyiisya.

MaSamariya bakakumbila Jesu kuti akkale kulimbabo. Kwamazuba aabili, wakayiisya bantu alubo bantu biingi bakamusyoma. Bakabuzya mukayintu wakuSamariya kuti: ‘Twalimvwida, lino twaziba kuti ooyu ngumunununi wabantu.’