Jesu Wakaponia Muntu Mubuzuba bwaSabata

BaFarisi bakali kumuzonda Jesu alimwi bakali kuyanduula nzila yakumujata. Bakali kwaamba kuti teelede kuponia bantu mubuzuba bwaSabata. Mubuzuba bwaSabata, Jesu wakajana moofu wakali kukumbila lugwasyo kubantu mumugwagwa. Wakabuzya basikwiiya bakwe kuti: ‘Amulange, mubone manguzu aaLeza mbayoogwasya mwaalumi ooyu.’ Jesu wakatola bulongo akubuswaanizya amate mpawo wakabunanika kumeso amwaalumi ooyo. Jesu wakamubuzya kuti: ‘Yinka ukasambe kumeso kukaziba kaSilowamu.’ Mwaalumi ooyo wakachita nzyakabuzigwa mpawo, wakabona.

Bantu bakagamba alimwi bakabuzya kuti: ‘Ooyu nguwe na mwaalumi wakali kukkala kakumbila lugwasyo naa kuti ngumwi ukozyene anguwe?’ Pesi we wakati: ‘Ndime, ndakazyalwa kentaboni.’ Bantu bakamubuzya kuti: ‘Zyakeenda biyeni kuti utalike kubona?’ Naakababuzya mbaakaponesegwa, bakamutola kubaFarisi.

Mwaalumi ooyo wakabuzya baFarisi kuti: ‘Jesu wakandinanika bulongo mumeso mpawo wakandibuzya kuti ndikasambe kumeso. Nindakachita oobo, meso aangu akabona.’ BaFarisi bakati: ‘Manguzu aJesu tazwi kuli Leza pe nkaambo wamuponia mubuzuba bwaSabata.’ Pesi bamwi bakati: ‘Kaansinga manguzu aakwe taazwi kuli Leza, taali kunookonzya pe kumuponia.’

BaFarisi bakiita bazyali bakwe akubabuzya kuti: ‘Zyakeenda biyeni kuti mwaneenu atalike kubona?’ Bazyali bakwe bakayoowa baFarisi nkaambo baFarisi bakaambide kuti kufumbwa usyoma Jesu uyootandwa muchikombelo. Bakati: ‘Tatuzi pe. Amubuzye nguwe.’ BaFarisi bakamubuzisisya mwaalumi ooyo pesi wakababuzya kuti: ‘Ndamubuzya zyoonse nzindizi. Nkamboonzi nimuchibuzya lubo?’ BaFarisi bakanyema mpawo bakamutanda.

Jesu wakayanduula mwaalumi ooyo alimwi wakamubuzya kuti: ‘Ulamusyoma na Mesiya?’ Mwaalumi ooyo wakati: ‘Ndilakonzya kumusyoma kuti ndamuziba.’ Jesu wakati: ‘Ndime Mesiya.’ Eezi tazitondeezyi na kuti Jesu wakali aluzyalo? Wakamuponia mwaalumi ooyo alubo wakamugwasya kuti abe alusyomo.