Kufwa kwaJesu kuGolgota

Bapayizi bapati bakatola Jesu kunkuta yamweendelezi mupati. Pilato wakababuzya kuti: ‘Mulanduunzi ngwaakachita mwaalumi ooyu?’ Bakati: ‘Ulyaamba kuba mwaami!’ Pilato wakabuzya Jesu kuti: “Nduwe Mwami waba-Juda na?” Jesu wakati: “Bwami bwangu tabuli bwaansi ano.”

Pilato wakati Jesu atolwe kumweendelezi wakuGalilaya, Herodi, kuchitila kuti akamubuzye-buzye. Herodi taakajana mulandu kuli Jesu, nkinkaako, wakati abweede kuli Pilato. Pilato wakabuzya bantu kuti: ‘Ime aHerodi taakwe mulandu ngutwajana kumwaalumi ooyu. Ndilamwaangununa.’ Pesi nkamu yabantu yakati: ‘Ngajayigwe! Ngajayigwe!’ Basilumamba bakawuma Jesu achimboko, bakamuswida mate akumuuma amfayindi. Bakaluka musini wamamvwa akumuzwaatika mumutwe, akumuseka kabati: ‘Wapona, Mwaami wamaJuda.’ Pilato wakababuzya lubo bantu kuti: ‘Taakwe mulandu ngundajana kumwaalumi ooyu.’ Pesi bakati: ‘Komugankamina aachisamu.’ Nkinkaako, Pilato wakazumizya bantu kuti bajaye Jesu.

Basilumamba bakatola Jesu kuGolgota, mpawo bakamugankamina achisamu, mpawo bakachibusya chisamu eecho. Jesu wakakomba kati: ‘Taata ubalekelele nkaambo tabazi nchobachita.’ Bantu bakaweela Jesu kabati: ‘Seluka aachisamu kuti kuli Mwana waLeza, ulifutule!’

Umwi sizibi wakagankamidwe afwiifwi aJesu wakati: “Ukandiyeeye, Mwami, waakusika mubwami bwako.” Jesu wakamusyomezya kuti: “Tunooli ayebo mu-Paradaiso.” Sikati, kwakaba mudima kwama-awa aatatu munyika yoonse. Bamwi basikwiiya bakwe bakayimvwi afwiifwi achisamu, kuswaanizya aMariya, banyina aJesu. Jesu wakabuzya Johane kuti alanganie Mariya mbuli mbanga ulalangania banyina.

Kumamanino Jesu wakati: “Kulimanide.” Wakakotamisya mutwe mpawo wakayoya kamamanino. Kuchiindi eecho, kwakachitika muzuzumo wanyika mupati. Mulembo wakali mutempele, wakali kwaanzanisya Busena Busalala Abusena Busalalisya wakadeluka akuba zipaanzi zibili. Mupati wabasilumamba wakati: ‘Nisimpe, oyu wali Mwana waLeza.’