Mbutukonzya Kukambawuka Katubelesya Matract

Kuzwa muJanuary 2018, aapeji lyakusaanguna lyakabbuku kaBuumi Bwesu BwachiKristu Amulimu Wesu kwakasaanguna kubikkwa zikozyano zyakwaambuuzyania. Twakasungwaazigwa kuti tubikkile maanu kukwaambuzyania aabantu kutali kubapa mabbuku luzutu. Tuvidiyo twazikozyano zyakwaambuuzyania tulikugwasya basikupupulula kuti babone mbubeelede kukambawuka kababelesya Bbayibbele luzutu. Eezi zyaamba kuti tatucheelede kwaabelesya na mabbuku nituchita bukambawusi bwaang’anda ang’anda? Peepe. Muchikozyano, kukambawukila muntu katubelesya matract njiimwi nzila iizwidilila. Tulakonzya kubelesya nzila iitobela kuti katuyanda kubelesya tract:

1. Buzya mubuzyo mpawo umukumbile kuti asale nsandulo zijanika aatract.

2. Mutondeezye nsandulo iizwa muBbayibbele ilaapeji 2. Kuti kakuchili chiindi mwaambuuzyanie amwi makani aajanika mukati aatract.

3. Mupe tract mwining’anda alubo umusungwaazye kuti alibale najana mweenya.

4. Kutanayenda mutondeezye aalembedwe kuti “Nzyonga Ulayeeya” mpawo uchite mabambe aakuti muzoosandule mubuzyo uulembedwe kamubelesya Bbayibbele.

Nwaabweeda, amusandule mubuzyo ngumwakasiyide mpawo usiye mubuzyo ngumutazoosandule chiindi chiza. Ulakonzya kumusiila mubuzyo uujanika aawebbusayiti yesu naakuti kubelesya mubuzyo uujanika mubbuku libikkidwe kusule aatract. Kuti kakweelela ulakonzya kumutondeezya kabbuku kategwa Makani Mabotu Aazwa Kuli Leza! naakuti limwi bbuku lijanika Muzibelesyo Nzitubelesya Kuyiisya Bantu.