Mibuzyo Yabasikubala

Majwi aamwaapostolo Pawulu ajanika muli 1 Bakorinto 15:29 aamba kuti amwi maKristu chiindi aakali kubbabbatizigilwa bantu bakafwa na?

Peepe, nkaambo Bbayibbele amabbuku aachiindi taakwe mpuzitondeezya kuti zintu zili boobu zyakali kuchitika.

Nzila amwi maBbayibbele njaakalisandulula aayo vesi eeyi ipa kuti bamwi bantu bayeeyele kuti muchiindi chaPawulu bamwi bantu bakali kubbabbatizigilwa bantu bakafwa. Muchikozyano, muThe Bible in Tonga (Zambia) 1963 vesi eeyi yaamba kuti: “Kuti taakwe bubuke bwabafu, ino nkaambonzi bantu nibabapatizigwa nkaambo kabafu?”

Atubone zyakaambwa abamwi basikulanga-langa makani amuBbayibbele babili. Dr Gregory Lockwood wakaamba kuti: “Takwe bumboni pe muBbayibbele naakuti mumakani aachiindi butondeezya kuti bantu bakali kubbabbatizigilwa bantu bakafwa.” Alubo Pulofesa Gordon D. Fee wakaamba kuti: “Taakwe bumboni bujanika muBbayibbele naakuti mumakani aachiindi butondeezya kuti bantu bakali kuchita zintu zili boobu. Nikuba N[[ew] T[[estament] taakwe mpiwambuula atala ankani eeyi alubo takwe bumboni pe butondeezya kuti macheechi akasaanguna kuba chiindi nikwakafwa baapostolo akali kuzichita eezi.”

Jesu wakabuzya batobeli bakwe kuti: “Kamuya mukayiisye bantu bazisi zyoonse kuti babe basikwiiya, akubabbapatizya . . . , mukabayiisye kutobela zintu zyoonse nzyondakamulailila.” (Mt. 28:19, 20) Muntu katanabbabbatizigwa weelede kwiiya, kusyoma akuswiilila Jehova aMwanaakwe. Muntu wakafwa takonzyi pe kuzichita eezi. Alubo muntu uupona takonzyi pe kumuchitila eezi.—Muk. 9:5, 10; Joh. 4:1; 1 Kor. 1:14-16.

Majwi aaPawulu aambaanzi?

Bamwi bantu bakuKkorinto teebakali kwiisyoma pe njiisyo yabubuke. (1 Kor. 15:12) Pawulu wakatondeezya kuti njiisyo yakuti takwe bubuke njakubeja. Wakazitondeezya biyeni? Wakaamba kuti buzuba “abuzuba ndijanika muntenda yalufwu.” Pesi wakachili kupona. Nikuba kuti wakali kuswaanana amapenzi, wakali aachoonzyo chakuti, kuti wafwa wakali kuyoobusigwa kali chilenge chamuuya mbuli Jesu.—1 Kor. 15:30-32, 42-44.

MaKristu bananikidwe bakuKkorinto bakeelede kuziba kuti, kuti babusigwe kuti bakapone kujulu bakeelede kuswaanana amapenzi akufwa. ‘Kubbabbatizigilwa muli Kristo Jesu’ kuswaanizya ‘kubbabbatizigwa mulufwu lwakwe.’ (Rom. 6:3) Eezi zyaamba kuti bakeelede kuswaanana amapenzi akufwa mbuli Jesu kuchitila kuti bazoobusigwe kuti bakapone kujulu.

Nikwakayinda minyaka iibili Jesu kali wabbabbatizigwa, wakabuzya baapostolo bakwe babili kuti muyoobbapatizyigwa “alubbapatizyo ndondibbapatizyigwa.” (Mk. 10:38, 39) Jesu taakali kwaamba kubbabbatizigwa mumaanzi pe. Pesi wakali kwaamba kuti kusyomeka kuli Leza kwakali kuyoopa kuti afwe. Pawulu wakaamba kuti maKristu bananikidwe bakeelede ‘kupenzegwa aamwi anguwe [Kristu] kutegwa bakapegwe bulemu antoomwe anguwe.’ (Rom. 8:16, 17; 2 Kor. 4:17) Eezi zyaamba kuti bakeelede kufwa kuchitila kuti bakabusigwe kuti bakapone kujulu.

Nzila iilikabotu yakusandulula majwi aaPawulu njakuti: “Ikuti naa bafwu tabakabusyigwi, ino nimpindu nzi njobayoojana aabo babbapatizyigwa kutegwa babe bafwu? Ikuti naa bafwu kunyina nobayoobusyigwa, ino nkaambo nzi abalo ncobali mukubbapatizyigwa kutegwa babe bafwu?”