Bankala Bakapegwa Mabbisikisi
NICK uukkala kuOregon kuU.S.A wakaamba kuti: “Kumasaangunino aa2014 ndakasaanguna kweendeenda atunkala twangu tubili mudolopo mundakali kukkala. Ndakali kubona Bakamboni kabakambawuka kababelesya tungolo. Bakamboni aabo bakali kuzwaata kabotu, bakali kujuzya bantu alubo bakali kumweta-mweta.
“Bakali aandaba abantu kuswaanizya atunkala twangu. Limwi zuba Elaine naakali kukambawuka aakangolo wakapa tunkala twangu tubili mabbisikisi. Kuzwa aachiindi eecho, chiindi choonse nindakali kwiinda aakangolo, tunkala twangu twakali kuchijaana kuti tukapegwe mabbisikisi.
“Kwakayinda myeezi myiingi, bankala bangu bakali kunonenwa amabbisikisi ngibakali kupegwa andime ndakali kubotelwa kwaambuula aaBakamboni aabo. Pesi ndakali kuyoowa kumvwanana ambabo. Ndakali ndaba aaminyaka yiinda ku70 alubo teendakalikwe choonzyo pe atala azintu nzibakali kusyoma Bakamboni. Akaambo kakuti zintu zyakali kuchitika kuzikombelo teezyakali kundibotezya pe, ndakasala kuti kandibala Bbayibbele kandili aandikke.
“Aachiindi eecho, ndakabonana aabamwi Bakamboni bakali kukambawuka mumasena aasiyene-siyene mudolopo oomo kababelesya tungolo. Bakamboni aabo bakali kubotelwa kwaambuula aabantu. Bakasandula mibuzyo yangu yoonse kababelesya Bbayibbele alubo eezi zyakapa kuti ndibasyome.
“Limwi zuba Elaine wakandibuzya kuti: ‘Ulazisyoma na kuti banyama nchipo chizwa kuli Leza?’ Ndakamusandula kuti, ‘Iiyi, ndilazisyoma.’ Wakandibalila lugwalo lwa Isaya 11:6-9. Kuzwa waawo, ndakayanda kwiiya zyiingi atala aBbayibbele pesi teendakali kuyanda pe kutambula mabbuku aabo.
“Mumazuba aakatobela ndakali kubotelwa azintu nzitwakali kwaambuuzyania aElaine amulumaakwe Brent. Bakandibuzya kuti ndilakonzya kubala bbuku lyaMatayo kusikila kubbuku lyaMilimo kuchitila kuti ndimvwisisisye zintu nzindakeelede kuchita kuti ndibe muKristu wachoonzyo. Ndakachita oobo. Mu2016 ndakazumina kwiiya Bbayibbele aBrent aElaine.
“Ndakali kuchilangilila aameso aasalala chiiyo chesu nchitwakali kuchita mviki amviki amiswaangano yambungano. Ndakali kubotelwa loko anzindakali kwiiya muBbayibbele. Nikwakayinda munyaka amyeezi ndakabbabbatizigwa. Lino ndili aaminyaka iili 79, ndilabotelwa kuti ndakajana chikombelo chakasimpe. Jehova wakandigwasya kuti ndibe aakati kampuli yabakombi bakwe bali munyika yoonse.”