Mibuzyo Yabasikubala

Jesu wakali kwaambaanzi chiindi naakati: “Mutayeeyi kuti ndakaboola kuleta luumuno”?

Jesu wakayiisya bantu kuti babe aaluumuno kuli umwi awumwi. Aali chimwi chiindi, wakabuzya baapostolo bakwe kuti: “Mutayeeyi kuti ndakaboola kuleta luumuno anyika; ndakaboola kuleta panga ikutali luumuno. Nkaambo ndakaboola kuleta lwaandaano akati kamwana musankwa abausyi, mwana musimbi abanyina, amukamwana abanyinazyala.” (Mt. 10:34, 35) Jesu wakali kwaambaanzi?

Jesu taakali kuyanda kwaanzaania mpuli pesi wakalizi kuti zintu nzyaakayiisya zyakali kuyoopa kuti zimwi mpuli zyaanzaane. Nkinkaako, aabo bayanda kuba basikwiiya baKristu akubbabbatizigwa, beelede kuziba kuti kusala munzila eeyi kulakonzya kweeta buyumu-yumu oobu. Kuti bakazigwa amuntu ngubakwetenaawe uutakombi naakuti abamwi bamumpuli, zilakonzya kubayumina kuti bakkale kabasyomeka kuzintu nzibakayiisigwa aaKristu.

Bbayibbele lisungwaazya maKristu kuti bakkale “muluumuno abantu boonse.” (Rom. 12:18) Pesi njiisyo zyaJesu zilakonzya kuba mbuli “panga” kuli zimwi mpuli. Eezi zilachitika kuti umwi wamumpuli watambula njiisyo zyaJesu mpawo bamwi bazikaka. Aali boobu, babbululu naakuti bamumpuli yamuntu ooyo, nga baba “basinkondo” baooyo uunga watambula kasimpe.—Mt. 10:36.

Basikwiiya baKristu bakkala mumpuli zinjila zikombelo zisiyene, chimwi chiindi baswaana zyiimo zibasunka kuti batatondeezyi kuti balamuyanda Jehova aJesu. Muchikozyano, babbululu batakombi balakonzya kubasungwaazya kuti basekelele mapobwe aateendelani aamagwalo. Kuti baswaana chiimo chili boobu ngwani ngubeelede kubotezya? Jesu wakaamba kuti: “Kufwumbwa muntu uuyandisya bausyi naa banyina kwiinda ndime teelede kuba wangu.” (Mt. 10:37) Jesu taakali kwaamba kuti tweelede kubayanda mbichaani bazyali besu kuchitila kuti tube basikwiiya bakwe. Pesi wakali kwaamba kuti tweelede kubikka zintu ziyandikana mubusena bwakusaanguna mubuumi bwesu. Kuti bamumpuli batakombi batukazya akaambo kakuti tukomba Jehova, tulazumanana kubayanda, pesi tutondeezya kuti tuyanda Leza kwiinda mbabo.

Nichoonzyo kuti kukazigwa aabamumpuli kulachisa. Pesi basikwiiya baJesu beelede kuyeeya majwi aakwe aakuti: “Kufwumbwa muntu uutazumini kunyamuna cisamu cakwe cakupenzyezya akunditobela, teelede kuba wangu.” (Mt. 10:38) Mulaamwi majwi, maKristu babona kukazigwa aabamumpuli mbuli mapenzi ngibeelede kuswaana basikwiiya baKristu. Alubo kulijata kwabo kulikabotu kuyoopa kuti bamumpuli batakombi bachinche maponeno aabo akuti bayande kwiiya kasimpe kamuBbayibbele.—1 Pet. 3:1, 2.