3 Kulemekana

CHAMBAANZI?

Kuti bakwetene kabalemekana, banootondeezyania luyando nikuba chiindi nibatamvwanani. Bbuku litegwa Ten Lessons to Transform Your Marriage lyaamba kuti: “Tabachiti zintu zikonzya kupa kuti batamvwanani mulukwatano lwabo. Pesi balaambuuzyania atala ambubakonzya kumana kutamvwanana. Balaswiilizyania alubo bachita zintu zibagwasya.”

NZILYAAMBA BBAYIBBELE: ‘Luyando . . . talulilangilili chintu.’—1 BaKorinto 13:4, 5.

“Ndilamulemeka mukayintu wangu kwiinda mukuchita zintu zitondeezya kuti ulayandikana alubo tandichiti zintu zipa kuti tutamvwanani mulukwatano lwesu.”—Micah.

NKAMBOONZI NIKUYANDIKANA?

Basikuyanduulisisya baamba kuti, kwaambuula munzila iitakwe bulemu kupa kuti bantu bakwetene kabatukilana akubona ngubakwetenaawe katagwasyi pe—alubo zipa kuti balekane.

“Kubelesya majwi aakuninda amajwi aatali kabotu zipa kuti muntu ngukwetenaawe achisigwe moyo, atakusyomi akuti mutamvwanani mulukwatano.”—Brian.

NZUKONZYA KUCHITA

LILANGE-LANGE

Langisisya mbwaambuula anzumuchitila ngukwetenaawe kwamviki. Mpawo ulibuzye kuti:

• Ndakamwaambwida tungane ngundikwetenaawe alubo ndakamulumbayizya tungane?

• Nziizili zintu nzindakachita zitondeezya kuti ndamulemeka ngundikwetenaawe?

WAMBUUZYANIA MIBUZYO IITOBELA ANGUKWETENAAWE

• Ngaali majwi amichito ziyoomugwasya kuti umwi awumwi alimvwe kuti ulalemekwa?

• Ngaali majwi amichito zipa kuti umwi awumwi alimvwe kuti talemekwi pe?

ZIKONZYA KUMUGWASYA

• Lemba nzila zitatu nzuyanda kuti ngukwetenaawe kakutondeezya kuti ulakulemeka. Buzya ngukwetenaawe kuti alakwe alembe. Amuchinchaane nzimwalemba mpawo mubelekele azintu nzimwalemba.

• Lemba zintu zikubotezya zichitwa angukwetenaawe. Mpawo umubuzye mbulimvwa atala azintu eezyo.

“Nditondeezya kuti ndilamulemeka mulumaangu kwiinda mukuchita zintu zitondeezya kuti ulayandikana alubo ndileezya kuchita zintu zipa kuti abotelwe. Tazyaambi kuti ndimuchitila zintu zipati luzutu pesi ndichita zintu ziniini zitondeezya kuti ndamuleka amoyo woonse.”—Megan.

Mibuzyo eeyi teeyakuti ulibone kuti ulalemeka pesi njakukugwasya kuti ubone kuti ulamulemeka na ngukwetenaawe.

NZILYAAMBA BBAYIBBELE: “Amulisamike moyo waluzyalo, buuya, lulifwiinsyo, lubombo, abusicamba.”—BaKolose 3:12.