8 Chikozyano

CHAMBAANZI?

Bazyali bali chikozyano chilikabotu bapona kweendelana anzibayiisya bana babo. Muchikozyano, tazikonzeki pe kuti mwanaako asyomeke, kuti chimwi chiindi wakakumvwa kwaamba kuti, “Mubuzye kuti tandiwo pe,” kuti kutayandi kwaambuula awumwi muntu uuli aanze.

“Bantu biingi baamba kuti, ‘Chita nzindaamba kutali nzindichita.’ Kwaambila bana munzila iili boobo takugwasyi pe. Bana batobelezya zintu nzitwaamba anzituchita alubo tulakonzya kubona kuti maponeno eesu asiyana anzitubayiisya kuti twalanga mbubachita.”—David.

NZILYAAMBA BBAYIBBELE: “Yebo okambauka kutabba, sa ulabba?”—BaRoma 2:21.

NKAMBOONZI NIKUYANDIKANA?

Bana abachikula chiindi chiingi batobelezya zichitwa abazyali babo kwiinda zichitwa abasela lyabo. Eezi zyaamba kuti nduwe weelede kuyiisya bana bako zintu zilikabotu pesi eezi zilakonzeka kuti wapona kweendelana anzubayiisya.

“Tulakonzya kubuzya bana besu kuchita chimwi chintu kwaziindi zyiingi akukataazikana kuti balikuswiilila na pesi kuti teetwachita kweendelana anzitwaamba kwachiindi chomwe biyo, bana besu balazibona. Bana balazibona zyoonse nzituchita nikuba katutayeeyeli pe.”—Nicole.

NZILYAAMBA BBAYIBBELE: ‘Busongo buzwa kujulu . . . teebwakuupa-wupa ameso.’—Jakobo 3:17.

NZUKONZYA KUCHITA

Lilange-lange mbuchita. Uyandisya zyakulikondelezya zili biyeni? Umujata biyeni ngukwetenaawe abana bako? Mbantu bali biyeni mbumvwananaabo? Ubabikkila maanu na bamwi? Maponeno aako atondeezya kuti uyanda kuti bana bako bazoopone mbuuli nduwe na?

“Ime amulumaangu, bana besu tatubapi milawu njitutatobelezyi.”—Christine.

Kumbila lulekelelo kuti wabisya. Bana banu balizi kuti chimwi chiindi mulabisya. Kwaamba kuti “undilekelele” kumuntu ngukwetenaawe akubana bako chiindi nwaabisya, ziyoogwasya bana banu kuti bazibe mbukuyandikana kusyomeka akulibombya.

“Bana besu beelede kutumvwa katuzumina akukumbila lulekelelo kuti twabisya. Kuti teetwachita oobo tabanoowambi pe kuti babisya.”—Robin.