Mulengi Wesu Utupa Busongo Bupa Kuti Tubotelwe Mumpuli

Nibaalumi, Amuyande Banakazi Banu

“Balumi . . . beelede kuyanda bakaintu babo mbuli mbobayanda mibili yabo beni. Mwaalumi uuyanda mukaintu wakwe ulaliyanda mwini nkaambo kunyina muntu wakasulide kale mubili wakwe mwini, pele ulausanina akuubamba kabotu.”—BAEFESO 5:28, 29.

Mwaalumi nguumutwe wampuli. (Baefeso 5:23) Pesi mwaalumi uulikabotu takwe lunya pe alubo tamanikizyi mwanakazi wakwe kuti achite zintu zyoonse nzyayanda. Ulamuyanda alubo umuchitila zintu zibotu zyoonse nzyayanda. Uleezya kuchita zintu zibotezya mwanakazi wakwe kutali kuchita zintu zibotezya nguwe alikke. (Bafilipi 2:4) Ubuzya mwanakazi wakwe mbalimvwa anzyayeeya alubo ulamuswiilila chiindi naambuula. Tamunyemeni “cakuzwa munzila,” tamuumi alubo tamupopoteli pe.—Bakolose 3:19.

Nibanakazi, Amulemeke Balumi Banu

“Mukaintu . . . weelede kumulemeka kapati mulumaakwe.”—BAEFESO 5:33.

Kuti mwanakazi walemeka mulumaakwe akumugwasilizya muzintu nzyasala, nga ulikupa kuti mumpuli mube luumuno. Kuti mulumaakwe walubizya, tamufubaazyi pe pesi unoozumanana kuba aamoyo mutete alubo unoomulemeka. (1 Petro 3:4) Kuti mwanakazi kayanda kubuzya mulumaakwe chimwi chintu chilikumukataazya, usala chiindi chilikabotu chakwaambuulaawe. Alubo eezi ulazichita munzila yabulemu.—Mukambausi 3:7.

Syomeka Kumuntu Ngukwetenaawe

‘Mwaalumi . . . uyookakatila kumukaintu wakwe, alimwi bayooba mubili omwe.’—MATALIKILO 2:24.

Kuti mwaalumi amwanakazi bakwatana ngababa nyama yomwe. Bantu bakwetene beelede kubeleka changuzu kuti lukwatano lwabo lukkale kalusimide kwiinda mukujana chiindi chakwaambuulaamwi kababuzyania zintu zizwa aansi aamyoyo yabo akuchitilana tuntu tuniini tutondeezya kuti balayandana. Beelede kusyomeka kuli umwi awumwi kwiinda mukutoonana aamuntu ngubatakwetenaawe. Muntu woonana aamuntu ngwatakwetenaawe upa kuti ngwakwetenaawe amvwe kuchisa loko. Eezi zipa kuti batanoosyomani alubo zilakonzya kupa kuti balekane.—Bahebrayo 13:4.

Nibazyali, Amuyiisye Bana Banu

“Koyiisya mwana inzila njayelede kweendela; noliba leelyo aakukomena takazwi mulinjiyo pe.”—TUSIMPI 22:6.

Leza wakapa bazyali mulimu wakuyiisya bana babo. Eezi ziswaanizya kubayiisya kuti babe aabuntu bubotu akuti babe chikozyano chilikabotu kubana babo. (Deuteronomo 6:6, 7) Kuti mwana wachita zintu zitali kabotu, muzyali uuli aabusongo tafwambaani pe kumunyemena. Pesi ulafwambaana ‘kuswiilila, ulanonoka kwaambaula, ulanonoka kukalala.’ (Jakobo 1:19) Kuti muzyali wabona kuti mwana uyanda kululamikwa, tayelede kumunyemena pe pesi weelede kumululamika munzila yaluyando.

Nibana, Amulemeke Bazyali Banu

“Nobana, amumvwide bazyali banu . . . ‘Lemeka bauso abanyoko.’”—BAEFESO 6:1, 2.

Bana beelede kuswiilila bazyali babo alubo beelede kubalemeka. Kuti bana balemeka bazyali babo, ngabalikupa kuti bamumpuli boonse babotelwe alubo ngabalikupa kuti mumpuli mube luumuno. Bana bakomena batondeezya kuti balabalemeka bazyali babo kwiinda mukubagwasilizya muzintu nzibayanda. Eezi ziswaanizya kubona kuti maanda aabazyali babo aali muchiimo chilikabotu naakuti kubapa mali.—1 Timoteyo 5:3, 4.