Nkamboonzi Nituswaana Mapenzi, Kuchembaala aKufwa?

Bazyali Besu Bakusaanguna Mbabo Bakatweetela Mapenzi

“Aboobo mbubonya cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse.”—BAROMA 5:12.

Leza wakalenga bazyali besu bakusaanguna, Adamu aEva kabatakwe chibi. Alubo wakababikka aanyika mumuunda waEdeni wakali paradayizi. Wakababuzya kuti balakonzya kulya michelo yaminsamu yoonse kunze kwawumwi luzutu. Pesi Adamu aEva bakasala kulya muchelo wamunsamu wakakasidwe, ooku kwakali kubisya. (Matalikilo 2:15-17; 3:1-19) Akaambo kakuti teebakaswiilila, Leza wakabaanda mumuunda alubo buumi bwakasaanguna kubayumina. Mukuya kwachiindi, bakazooba aabana, ambabo bana babo bakasaanguna kupona buumi buyumu. Adamu aEva bakachembaala mpawo bakazoofwa. (Matalikilo 3:23; 5:5) Tulachiswa, kuchembaala akufwa akaambo kakuti tuzwa kuli Adamu aEva.

Bangelo Babi Ambabo Bapa Kuti Tuswaanane Aamapenzi

“Nyika yoonse ili mumaanza aamubi.”—1 JOHANE 5:19.

‘Mubi’ ooyu nguSaatani. Saatani mungelo mubi wakapapila Leza. (Johane 8:44; Ciyubunuzyo 12:9) Mukuya kwachiindi, bamwi bangelo bakaba kubbazu lyaSaatani. Bangelo aaba bategwa madimoni. Alubo bangelo aaba babelesya manguzu aabo kuti beene bantu akuti bataswiilili Mulengi. Beena bantu biingi kuti bachite zintu zibi. (Intembauzyo 106:35-38; 1 Timoteyo 4:1) Saatani amadimoni aakwe balabotelwa nibapa kuti bantu baswaanane aamapenzi.

Chimwi Chiindi Ndiswe Tulyeetela Mapenzi Akaambo Kazintu Zibi Nzitusala

“Kufwumbwa cintu muntu ncasyanga, ncencico eeco ncayootebula.”—BAGALATIYA 6:7.

Chiindi chiingi tuswaanana aamapenzi akaambo kachibi nchitwakajana kubazyali besu bakusaanguna alubo tuswaanana aamapenzi akaambo kakuti nyika ilikweendelezegwa aaSaatani. Pesi chimwi chiindi bantu balakonzya kulyeetela mapenzi. Biyeni? Kuti muntu wachita zintu zitali kabotu naakuti wasala munzila iitali kabotu, ulatebula zintu zibi. Kuli lumwi lubazu, kuti muntu wachita zintu zili kabotu ulatebula zintu zibotu. Muchikozyano, kuti mwaalumi kasyomeka, kabeleka changuzu, kayanda mpuli yakwe ulatebula zintu zibotu alubo ulapa kuti mpuli yakwe ibotelwe. Pesi kuti muntu kayanda zyakubbeja, kali sibukande naakuti kali mukandu ulakonzya kupa kuti afwabe kuswaanizya ampuli yakwe. Nkinkaako, mbusongo kuswiilila Mulengi wesu nkaambo uyanda kuti tutebule zintu zyiingi zibotu kuswaanizya “luumuno lunji.”—Intembauzyo 119:165.

Tuswaana Mapenzi Nkaambo Tulikupona “Kumazuba Aamamanino”

“Kumazuba aamamanino . . . , bantu bayooba basikuliyanda, bayandisya mali, . . . batamvwidi bazyali, . . . batalilesyi, bakali, batayandi bubotu.”—2 TIMOTEYO 3:1-5.

Mazubaano bantu biingi balikutondeezya buntu bwaambidwe mumavesi aaya. Nzibalikuchita zitondeezya kuti tulikupona “kumazuba aamamanino.” Magwalo atondeezya kuti kumazuba aakumamanino kwakali kuzooba nkondo, kubulika kwachakulya, mizuzumo yanyika mipati amalwazi. (Matayo 24:3, 7, 8; Luka 21:10, 11) Zintu eezi zili kutweetela mapenzi miingi alubo zilikujaya bantu biingi.