Ulasyoma Zili?

Zintu zili kujulu azili aanyika kuswaanizya azintu zyoonse zipona zyakalengwa biya na naakuti zyakabawo azilikke? Majwi aakaambwa aabasyabusongo babili baambwa aajulu amajwi aali muli Matalikilo 1:1 atupa nsandulo zibili zisiyene atala amubuzyo ooyu. Bamwi basyoma kuti zintu eezi zyakabawo azilikke mpawo bamwi basyoma kuti zyakalengwa biya. Pesi bamwi tabakwe choonzyo pe kuti zyakalengwa biya na naakuti zyakabawo azilikke. Bantu balakazyania atala ankani eeyi mumabbuku amumapulogilamu aaTV.

Kulakonzeka kuti maticha bakakuyiisya kuti zintu zili kujulu azili aanyika zyakabawo azilikke, taakwe wakazilenga pe. Pesi maticha aabo bakakutondeezya na bumboni butondeezya kuti taakwe Mulengi pe? Amwi wakamvwa bapati bazikombelo kabayiisya kuti kuli Mulengi. Pesi bakaamba na bumboni butondeezya kuti nzibakali kuyiisya nzyachoonzyo naakuti bakaamba kuti weelede kuzisyoma luzutu nkaambo nzizyo ziyiisigwa muzikombelo?

Wakali wayeeya atala ankani eeyi na? Kuti kakuli boobo, amwi wakayeeya kuti taakwe muntu pe uukonzya kukupa nsandulo yachoonzyo iili atala akuti Mulengi mpali na choonzyo. Alubo amwi waabulibuzya kuti: Kuziba nsandulo yamubuzyo ooyu kundigwasyaanzi?

Magazini eeyi, ilasaanguna kwaamba bumboni bwakapa kuti bantu biingi basyome kuti kuli Mulengi. Alubo ilapandulula mbukonzya kugwasigwa kuti waziba kuti zintu zyakalengwa biya na naakuti pe.