MUNYIKA YAZUKILA AAMAPENZI

1 | Kwabilila Buumi Bwako

NKAMBOONZI NIKUYANDIKANA

Mapenzi alakonzya kupambanisya buumi bwesu munzila zisiyene-siyene.

Mapenzi apa kuti bantu bakataazikane akuti bamane manguzu. Alubo kukataazikana zyiindilide kulakonzya kupa kuti muntu afwambaane kujatwa aamalwazi.
Malwazi amapenzi aalichitikila alakonzya kupa kuti basichibbadela bakachilwe kusilika bantu akaambo kakuti nga mbiingi loko bantu bachiswa alubo misamu nga yacheya.
Mapenzi aaya apa kuti bantu kubayumine kujana mali iiyandikana yakuti bawule chakulya akuula misamu yabusilisi.

Nzweelede Kuziba

Kuchiswa loko akukataazikana kulakonzya kupa kuti uchinke kutachichiti zintu zipa kuti upone buumi bulikabotu. Eezi nga zyazoopa kuti wiindilile kuchiswa.
Kuti bulwazi teebwasilikwa, bulakonzya kukomena alubo bulakonzya kupa kuti ubone kkomba.
Kuti wakkala kuli aamubili uusimide, ziyookugwasya kuti usale munzila iilikabotu chiindi nwaaswaana penzi.
Ulakonzya kukwabilila buumi bwako, kufumbwa kuti ulinotede na naakuti pe.

Nzukonzya Kuchita Lino

Muntu musongo kuti wabona mapenzi ulaatantamuka. Malayilile aaya, alakonzya kubelesegwa kunkani zyakukwabilila buumi. Kuti waba muntu musanambi ulakonzya kutantamuka malwazi. Kulitabilila kulagwasya kwiinda kulindila kuti uzoochiswe mpawo uyanduule busilisi.

“Kukkala katuli kkilini akusalazya mputukkala, kutugwasya kuti tutamochi mali katuyanduula madokotela akuula misamu.”—Andreas.a

a Amwi mazina ngitwabelesya mumagazini eeyi akachinchwa.

NZUKONZYA KUCHITA—Malayilile Aagwasya

Chiindi zintu nizyayuma, kwabilila buumi bwako kwiinda mukuchita zintu eezi

BA MUSANAMBI

Ba musanambi

Bbayibbele lyaamba kuti: “Muntu uucenjede abona mapenzi ulayuba.” (Tusimpi 22:3) Yezya kubona zintu zikonzya kukweetela malwazi mpawo uzitantamuke.

Samba kumaboko chiindi choonse ansipa, kapati kutanajata chakulya naakuti nwaazwa kukubelesya chimbuzi.
Kkala kusalazya mung’anda akufafaza masena aajatwa twiingi amusamu uujeya majemusi.
Kuti kazichita, utaliswaanizyi aabantu bali aabulwazi butabukila.

LYA CHAKULYA CHIYAKA MUBILI

Lya chakulya chiyaka mubili

Bbayibbele lyaamba kuti: “Kunyina muntu wakasulide kale mubili wakwe mwini, pele ulausanina akuubamba kabotu.” (Baefeso 5:29) Tutondeezya kuti tulawuyanda mubili wesu kwiinda mukubikkila maanu kuzintu nzitulya.

Nywa maanzi miingi.
Lya michelo iisiyene-siyene azisyu.
Utalyi chakulya chilaamafuta miingi, munyo mwiingi naakuti chuka nyingi.
Utafwepi polya, kunywa bukande zyiindilide naakuti kubelesya misamu iikola.

“Nga tweezya kulya chakulya chiyaka mubili kuti tutanoochiswi-chiswi. Eezi zitugwasya kuti tutamaninsizyi kamali kache nkitujana kukuyanduula busilisi. Tusala kubelesya kamali kesu kuula chakulya chiyaka mubili.”—Carlos

JANA CHIINDI CHAKUPUMUNA ACHAKUNYANYAASYA MUBILI

Ekisesayiza

Bbayibbele lyaamba kuti: “Kulyookezya kusyoonto nkubotu kwiinda kulijaya kubeleka mulimo muyumu akutandaanya muwo.” (Mukambausi 4:6) Tweelede kubeleka mpawo tulipe chiindi chakupumuna.

Jana chiindi chakunyanyaasya mubili. Ulakonzya kusaanguna kuchita oobo kwiinda mukujana chiindi chakweendeenda. Kunyanyaasya mubili kulakonzya kukugwasya kazitakwe ndaba kuti wachembaala, ulilemene naakuti ukkala kuchiswa-chiswa.
Jana chiindi chakulyookezya

Jana chiindi chikkwene chakupumuna. Mapenzi aakonzya kuba kumatalikilo kuti kutajani chiindi chikkwene chakoona, ngakukataazikana akutabeleka kabotu kwaboongo. Mukuya kwachiindi, kutajana chiindi chikkwene chakupumuna kulakonzya kweeta malwazi mapati mumubili.
Libikkile chiindi chakoona achakubuka mpawo weezye koona akubuka aachiindi nchwaalibikkila.
Uteebeli TV naakuti kusaanisya fooni kulaabulo.
Utalyi zintu zilemu naakuti kunywa bukande chiindi nuyanda kuya kukoona.

“Ndakabona kuti kujana chiindi chikkwene chakoona kulagwasya. Kuti teendoona kabotu, nga ndabuka mutwe amubili kazilookuchisa. Pesi kuti ndajana chiindi chikkwene chakoona, ngandabuka kandilaamanguzu alubo nkuche-kuche kuchiswa.”—Justin.