MUNYIKA YAZUKILA AAMAPENZI

3 | Kwabilila Bweenzinyokwe Mbulaabo Abamwi

NKAMBOONZI NIKUYANDIKANA

Chiindi kukataazikana nikuyungizya akaambo kamapenzi aali munyika, bantu biingi ngatabachikwe ndaba pe abamwi.

Bamwi ngabalitantamuna kubeenzinyina.
Bakwetene nga tabachikkazyani kabotu pe.
Bazyali ngatabachikwe ndaba pe azintu zikataazya bana babo.

Nzweelede Kuziba

Kuti tupone buumi bulikabotu tuyandikana kugwasigwa aabeenzuma, ikapati muchiindi chamapenzi.
Kubija kwazintu kulikupa kuti mumpuli mube mapenzi aasiyene-siyene.
Manyuzi aatali kabotu alakonzya kupa kuti bana banu bakataazikane loko kwiinda mbumuyeeyela.

Nzukonzya Kuchita Lino

Bbayibbele lyaamba kuti: “Mulongwe mwini-mwini ulatondezya luyando ciindi coonse, alimwi ngomunyoko wakazyalilwa kuti akugwasye muziindi zyamapenzi.”—Tusimpi 17:17.

Yeeya umwi muntu uukonzya kukugwasya muchiindi chamapenzi. Kuziba kuti kuli umwi muntu uukonzya kukugwasya kulakonzya kukusimya kuti ulangane aazyiimo ziyumu.

NZUKONZYA KUCHITA—Malayilile Aagwasya

Muchiindi chili boobu chiyumu, chita zintu eezi

SIMYA LUKWATANO LWAKO

Simya lukwatano lwako

Bbayibbele lyaamba kuti: “Bobilo bali kabotu kwiinda omwe . . . Nkaambo ikuti umwi wabo wawa, ooyo umwi ulakonzya kumugwasya mweenzinyina kuti aimikile.” (Mukambausi 4:9, 10) Bakwetene tabeelede kulwana pe naakuti kukazyania, pesi beelede kubelekelaamwi mbuli mbiichita timu yabbora.

Utamaninsizyi bukali bwako kumuntu ngukwetenaawe, yezya kuba aamoyo mulamfu.
Amweezye kuti mumviki mwaambuule atala amapenzi ngimulaawo. Mweelede kulwana penzi kutali kuti mulwane chanu-chanu.
Amujane chiindi chakuchita zintu zimunoneezya moonse kamuli babili.
Amuyeezyanie ziindi zibotu nzimwakalaamwi, mbuli kulanga mafoto aamuchado wanu naakuti zimwi zintu zibotu nzimwakachita kamulaamwi.

“Bantu bakwetene balakonzya kutazuminana kuli zimwi zintu, pesi eezi tazyaambi kuti tabakonzyi pe kubelekelaamwi. Balakonzya kusala chakuchita kabalaamwi mpawo babelekele kuti chintu eecho chizwidilile.”—David.

KKALA KUMVWANANA AABEENZINYOKWE

Kkala kumvwanana aabeenzinyokwe

Utabi muntu uuyanda kugwasigwa luzutu abeenzinyokwe pesi weelede kuyanduula nzila mbukonzya kubagwasya anduwe. Kuti wasimya bamwi, nga ulikulisimya anduwe.
Wambuula aabeenzinyokwe buzuba abuzuba kuti umvwe kuti balikupona biyeni.
Buzya beenzinyokwe bakaswaanana aamapenzi ngulikuswaana kuti umvwe kuti bakaazunda biyeni.

“Mapenzi alakonzya kukozyanisigwa aamvula mpati iilaaguwo. Mvula nilikuwa ulakonzya kukachilwa kubona kabotu, pesi beenzinyokwe balakonzya kukugwasya kuti uzibe mpubede anzila njweelede kubelesya kuti ukasike nkuyanda kwiinka. Chiindi nibalikuyanda kukugwasya atala apenzi ndulaalyo, balakonzya kukubuzya zintu nzuzi kale. Beenzinyokwe balakuyanda ambabo balizizi kuti ulabayanda.” —Nicole.

BA MUZYALI UULIKABOTU

Ba muzyali uulikabotu

Bbayibbele lyaamba kuti: “Weelede kufwambaana kuswiilila, kumuka kwaambaula.” (Jakobo 1:19) Bana balakonzya kutaangunuka kwaamba zintu zibayoosya azipa kuti bakataazikane. Pesi kuti waswiilila kuli aamoyo mulamfu, ziyoobagwasya kuti baangunuke kwaambuula.

Jula mweenya wakuti bana baangunuke kwaamba mbubalimvwa. Bamwi bana balimvwa kabaangunukide kwaambuula chiindi nibalyiibide, mbuli nimuli mumoota naakuti nimuyobweendeenda kwiinda kuti mwaambuule kamulangene.
Gwasya bana bako kuti batapambanisigwi aamanyuzi aatali kabotu.
Buzya bana bako atala azintu nzwaakachita kuti mpuli yanu ikkale kayikwabililidwe.
Lemba aansi zintu nzimutazoochite kuti kwabuka penzi lyachibukila mbuta, mpawo uzipulakatizye kulaamwi abana bako.

“Ambuula aabana bako alubo ubalekele baambe mbubalimvwa. Balakonzya kusisa zintu zipa kuti bayoowe, bakataazikane naakuti banyeme. Weelede kubabuzya kuti anduwe nga walimvwa munzila eeyi, mpawo ubabuzye mbunga wazizunda.”—Bethany.