MAKANI AAKUYUNGIZYA
Maboneno AaBbayibbele Atalaa Kulekana Akwaanzaana
Jehova uyanda kuti bantu bakwetene bakkale kabasyomekede mulukwatano lwabo. Chiindi naakali kujatanisya mwanakazi amwaalumi wakusaanguna, Jehova wakaamba kuti: ‘Mwaalumi . . . akakatile kumwanakazi wakwe, babe nyama yomwe buyo.’ Alubo, Jesu Kristu wakazooyindulula majwi aayo mpawo wakayungizya kuti: “Nkaambo kaako, abo mbaakakakatizya Leza muntu atabapambukanyi.” (Matalikilo 2:24; Matayo 19:3-6) Aboobo, Jehova aJesu babona lukwatano mbuli chintu chiteelede kumana kunze kwakuti umwi mulukwatano wafwa. (1 BaKorinto 7:39) Mbukunga lukwatano lulasalala, kulekana tekaambo kakusaana ankako pe. Masimpe, Jehova tayandi bantu balekana kakutakwe kaambo kazwa muMagwalo.—Malaki 2:15, 16.
Ntuutuli twaambo tuli muMagwalo tukonzya kupa kuti bantu balekane? Jehova ulabusula bumambe abwaamu. (Matalikilo 39:9; 2 Samuele 11:26, 27; Intembauzyo 51:4) Masimpe, ubona bwaamu mbuli chintu chisesemya zyakuti bantu balakonzya kulekana kuti umwi wachita bwaamu. (Kuti ujane amwi makani alaatalaa bwaamu akuti buswaanizyaanzi, langa Chaandano 9 mupalagilafu 7.) Ikuti umwi wachita bwaamu mulukwatano, Jehova uzumizya ooyo utabisizye kuti alisalile kuti uyoolekana na anguwe, naa kuti uyooyinkilila kunembo kakwetenaawe. (Matayo 19:9) Nikuba boobo, kuti ooyo utabisizye mulukwatano wasala kulekana ayooyo wabisya unooli taabisya pe kuli Jehova. Nikuba boobo, mbungano yamaKristu tisungwaazyi kuti bantu balekane pe. Masimpe, chimwi chiindi ooyo uusyomekede ulakonzya kusala kukkalaa mweenzinyina wakachita bwaamu, kapati kuti wabona kuti weempwa kazizwa aansi aamoyo. Nikuba boobo, kuti kakuli twaambo tuzwa muMagwalo tuzumizya kulekana, bakwetene beelede kulisalila zyakuchita alimwi beelede kutambula kufumbwa buyumu-yumu bukonzya kubawo.—BaGalatiya 6:5.
Kuli zimwi zyiimo zikatazya zikonzya kupa kuti amwi maKristu asale kwaanzaana naa kulekana ayooyo ngobakwetenaawe nikuba kuti katachitide bwaamu. Muzyiimo zili boobo, Bbayibbele lyaamba kuti ooyo wasala kusiya mweenzinyina “uleelede kukkala katakwete, nanka kuyanzana” ayooyo ngwakwetenaawe. (1 BaKorinto 7:11) MuKristu ooyu teelede kukwata muntu uumbi pe. (Matayo 5:32) Atulange-lange tumwi twaambo tukonzya kupa kuti bamwi basale kwaanzaana.
Kutasanina mpuli achaali. Mpuli ilakonzya kubula zimwi zintu zyakunyama ziyandikana akaambo kakuti mwaalumi tali kubasanina pe nikuba kuti kakonzya kuchita oobo. Bbayibbele lyaamba kuti: “Na muntu tabambi . . . bamun’anda yakwe, oyo ulisowede lusyomo lwakwe, ulaindilila akuliyooyo uutazumina.” (1 Timoteo 5:8) Ikuti mwaalumi katachinchi michito yakwe, mwanakazi ulakonzya kusala kulikwabilila akukwabilila bana bakwe kwiinda mukusala kwaanzaana zilaamulawu. Masimpe, baalu bamumbungano balakonzya kulanga-langa kuti nchachoonzyo na kuti muKristu ooyo talikusanina mpuli yakwe. Ikuti kwajanika kuti mwaalumi talikusanina mpuli yakwe ulakonzya kugwisigwa mumbungano.
Kujata chalunya naa kuuma. Ikuti umwi mulukwatano kamujata chalunya ooyo ngwakwetenaawe naa kamuuma, unooli ulikubikka buumi bwamweenzinyina mumapenzi. Ikuti ulaalunya kali muKristu, baalu beelede kulanga-langa kaambo aaka kuti nkachoonzyo na. Kulutila alunya kulakonzya kupa kuti muntu agwisigwe mumbungano.—BaGalatiya 5:19-21.
Kukasya kukomba. Umwi mulukwatano ulakonzya kukasya mweenzinyina kutola lubazu mubukombi bwakasimpe naa kumusinikizya kuti atyole milawu yaLeza. Muzyiimo zili boobo, ooyo ukasigwa kukomba ulakonzya kulisalila kuti kwaanzaana zilaamulawu ninzila yakutondeezya “kumvwa Leza kwiinda bantu.”—Incito 5:29.
Muzyiimo zikatazya loko zyaambwa aajulu, taakwe muntu weelede kusinikizya muntu utabisizye kuti aanzaane naa kuti ayinkilile kunembo kali mulukwatano amuntu wakabisya. Nikuba kuti maKristu aasimide kuzintu zyabukombi abaalu balakonzya kumupa lugwasyo luzwa muBbayibbele, pesi tabakonzyi kuziba zyoonse zichitika akati kamwaalumi amwanakazaakwe. Jehova luzutu nguwe ukonzya kuzibona eezi. Ikuti mwanakazi naa mwaalumi muKristu kalikubejelezya kuti ulikuswaananaa buyumu-yumu mulukwatano lwakwe kayanda kuti balekana, unooli ulikutondeezya kutalemeka lukwatano akutalemeka Leza. Nkinkaako, Jehova ulakonzya kubona kufumbwa chipa kuti bantu baanzaane nikuba kuti umwi weezya biyeni kusisa chintu eecho. Masimpe “zyoonse zilivumbulwidwe, zili antangalala, kulinguwe oyo ngutujisizi makani.” (BaHebrayo 4:13) Pesi kuti kwaba chiimo chikatazya loko, takwe muntu weelede kupa mulandu muKristu wasala kwaanzaana. Kumamanino, toonse “tweelede kulyaambilila makani esu kubusyu bwaLeza.”—BaRoma 14:10-12.