Baalu Bayigwasya Biyeni Mbungano?

Mumbunga yesu tatukwe beendelezi babbadalwa pe. Mbuli mbungano yamaKristu niyakatalika, beendelezi beelela bakasalwa kuti “balele mbungano ya-Mwami.” (Incito 20:28) Ibaalu aaba mbaalumi basimide alimwi balaaluzibo atala amagwalo baleendelezya mumbungano akweembela ‘kutali cakusinikizigwa pe pele cakuliyandila kumbele lya Leza, kutali akaambo kakuyanda kujana mpindu cabumpelenge pele caluyandisyo.’ (1 Petro 5:1-3) Mulimu nzi ngubatucitila?

Balatukwabilila alimwi balandaba andiswe. Baalu balazulwida akukwabilila mbungano mumakani aakukomba. Kabayeeya kuti Jehova wakabasyoma akubapa mutolo ooyu, baalu tabalisumpuli aakati kabo pesi balabagwasya mumeendelo aabo akujana kubotelwa. (2 baKorinto 1:24) Mbuli mweembeli mbwabeleka canguzu kukubikkila maanu kumbelele zyakwe, abalabo baalu baleezya kuziba umwi awumwi mumbungano.​—Tusimpi 27:23.

Batuyiisya kucita kuyanda kwaLeza. Mviki amviki baalu beendelezya miswaangano yambungano kuti basimye lusyomo lwesu. (Incito 15:32) Baalumi aaba balipedelede abalabo baleendelezya mumulimu wakukambawuka, kababeleka andiswe alimwi kabatuyiisya mumbazu zyoonse zyamumulimu.

Basungwaazya umwi awumwi. Ikuti batukwabilile muzintu zyakumuuya, baalu bamumbungano balatuswaya kumaanda eesu naa kuN’anda zyaBwaami ikuti batuumbulizye kababelesya Magwalo.​—Jakobo 5:14, 15.

Mukuyungizya mumulimu wamumbungano, baalu balaa milimu yakusanina mpuli zyabo iziyanda ciindi cabo. Bakwesu aaba tweelede kubalemeka.​—1 baTesalonika 5:12, 13.

• Baalu bamumbungano babeleka nzi?

• Munzila nzi baalu aaba mubatondeezya kuyanda umwi awumwi?