Niinzi Makanze aLeza Atalaa Nyika?

1. Nkamboonzi Leza ncakalenga nyika?

Jehova wakalenga nyika kuti ibe muunzi wabantu. Nkikaako mwaalumi amwanakazi bakutanguna, Adamu aEva, tiibakalengelwa kuti bapone kabali kujulu. Leza wakali walenga kale bangelo kuti bapone kujulu. (Jobu 38:4, 7) Kunze lyaboobu, Leza wakabika Adamu mubusena bweebeka butegwa muunda waEdeni. (Matalikilo 2:15-17) Jehova wakapa Adamu antoomwe abana mbaakali kuyoozyala coolwe cakubotelwaa buumi butamani munyika.​—Bala Intembauzyo 37:29; 115:16.

Kumatalikilo, muunda waEdeni luzutu nguwo wakali paradaiso. Adamu aEva bakali kuyoozuzya nyika abana babo. Mukuya kwacindi, bakalikuyooyendelezya nyika yoonse akucita kuti ibe paradaiso. (Matalikilo 1:28) Nyika tikoyoonyonyoonwa pe. Iyookkala kili munzi wabantu.​—Bala Intembauzyo 104:5.

Yeebela kavidiyo kategwaNkamboonzi Leza Naakalenga Nyika?

2. Nkamboonzi nyika kitali paradaiso lino?

Adamu aEva tiibakamuswiilila pe Leza, akaambo kaako Jehova wakabaanda mumuunda waEdeni. Iparadaiso yakasweeka, alimwi takwe muntu wakonzya kwiibweedezya. IBbaibbele lyaamba kuti: “Inyika yapegwa mumaanza abaabi.”—Jobu 9:24.​—Bala Matalikilo 3:23, 24.

Sena Jehova wakacilwa kuzuzikizya makanze aakwe akumatalikilo kubantu na? Peepe! Ulanguzu zyoonse. Takacilwi pe. (Isaya 45:18) Uyoobweedezya nzyakali kanzide atalaa bantu.​—Bala Intembauzyo 37:11, 34.

3. Paradaiso iyoobwedezegwa biyeni?

Paradaiso iyoobwedezegwa munyika awo Jesu natazootonge kali Mwami waLeza. Jesu uyoosololela bangelo baLeza mukunyonyoona boonse abo bakazyanyaa Leza, munkondo itegwa Harmagedoni. Kuzwa wawo Jesu uyakwaanga Saatani kwamyaka iili 1 000. Bantu baLeza bayoofutuka lunyonyoono oolo nkaambo Jesu uyoobasololela akubakwabilila. Bayoobotelwaa buumi butamani munyika iili Paradaiso.​—Bala Ciyubunuzyo 20:1-3; 21:3, 4.

4. Mapenzi azoomana lili?

Leza uyoobumanisya lili bubi munyika? Jesu wakapa “citondezyo” cakuti mamanino ayooboneka biyeni ikuti aba afwifwi. Zilikucitika lino ziyosya, zili kubika bantu muntenda alimwi zitondezya kuti tilikupona mu ‘ciindi camamanino.’​—Bala Matayo 24:3, 7-14, 21, 22.

Aawo Jesu natazotonge nyika kwamyaka iili 1 000 kali kujulu uzoomanisya mapenzi oonse. (Isaya 9:6, 7; 11:9) Kunze kwakutonga kali Mwami, Jesu uyoobeleka mbuli muPaiizi Mupati alimwi uyoogwisya zibi zyababo bayanda Leza. Nkikaako Leza uyoomana kuciswa, kucembala, alufu, kwiinda muli Jesu.​—Bala Isaya 25:8; 33:24.

5. Ino mbaani batazoopone muParadaiso iilikunembo?

Bantu baswiilila Leza bayoopona muParadaiso. (1 Johane 2:17) Jesu wakatuma basikumutobela bakwe kuti bakayandule bantu baboombe myoyo alimwi babayiisye kuti batambulike kuli Leza. Mazubaano Jehova ulikubamba mamiliyoni abantu kuti bakapone muParadaiso iilikunembo aanyika. (Zefaniya 2:3) KuN’anda zyaBwami zyaBakamboni baJehova, bantu bayiiya kuti babe baalumi amawisi aalikabotu alimwi akuti banakazi amamaama babe bantu balikabotu. Bana abazyali bakomba antoomwe alimwi bayiiya mbobakonzya kugwasigwa amakani mabotu.​—Bala Mika 4:1-4.