Nkamboonzi Leza Ncaazumizya Bubi aMapenzi?

1. Bubi bwakatalika biyeni?

Bubi bwakatalika aawo Saatani nakabeja kakutalika. Kumatalikilo Saatani wakali mungelo umaninide, pesi “takkede mubwini.” (Johane 8:44) Wakayanda kukombwa ooku kweelede Leza alikke. Saatani wakabejela mwanakazi wakutalika Eva, alimwi wakamweena kuti amuswiilile kutali kuli Leza. Adamu wakajatana aEva mukutaswiilila Leza. Kusala kwaAdamu kwakeetelezya mapenzi alufu.​—Bala Matalikilo 3:1-6, 19.

Aawo Saatani naakabuzya Eva kuti ataswiilili Leza, wakali kutalika kubukila bweendelezi bwaLeza naa cuuno cakwe mbuli Mupati kampatila. Bantu biingi bajatanaa Saatani mukukaka Leza kuba Mweendelezi wabo. Akambo kaako, Saatani waba “mweendelezi wanyika.”​—Bala Johane 14:30; 1 Johane 5:19.

2. Sena zilenge zyaLeza tii zyakalimaninide na?

Milimu yoonse yaLeza iilimaninide. Jehova Leza wakalenga bantu abangelo kabakonzya kumuswiilila cakumaninina. (Deuteronomo 32:4, 5) Leza wakatulenga katulaa lwaangunuko lwakulisalila kucita zintu zibotu naa kucita zintu zibi. Oolu lwaangunuko lupa kuti tukonzye kutondezya luyando kuli Leza.​—Bala Jakobo 1:13-15; 1 Johane 5:3.

3. Nkamboonzi Leza ncaali kuzumizya bubi kusikila lino?

Kwacindi cifwifwi, Jehova wazumina kuti bantu babukile bweendelezi bwakwe. Nkamboonzi? Kuti atondezye kuti kulyeendelezya kwabantu takugwasyi kakutali nguwe weendelezya. (Mukambausi 7:29; 8:9) Kwamyaka iili 6 000 yakiinda, bukamboni buli aantanganana. Bantu beendelezya bakacilwa kumanisya nkondo, kutyolwa kwamulawo, kutalulamisya, naa malwazi.​—Bala Jeremiya 10:23; baRoma 9:17.

Kusiyana abweendelezi bwabantu, bweendelezi bwaLeza bugwasya aabo babutambula. (Isaya 48:17, 18) Lino-lino Jehova uyoonyonyoona mfulumende zyoonse zyabantu. Aabo basala kweendelezegwaa Leza mbaabo abalikke batakakkale munyika.—Isaya 11:9; Bala Daniele 2:44.

Yeebela kavidiyo kategwa Nkamboonzi Leza Nazumizya Bubi aMapenzi?

4. Kutafwambaana kubweza ntaamu kwaLeza kutupa cindi cakucitaanzi?

Saatani wakaamba kuti bantu bakomba Jehova kuti kabajana zintu, kakutali kuti balamuyanda pe. Kujana wayanda kutondezya kuti ooku nkubeja na? Ulakonzya kucita oobo! Kutafwaambana kubweeza ntaamu kwaLeza kutupa cindi cakutondezya kuti tusala kweendelezegwaa Leza naa kuti abantu. Inzila njituponaayo itondezya mbotusala.​—Bala Jobu 1:8-12; Tusimpi 27:11.

5. Tusala biyeni Leza kuba Mweendelezi wesu?

Tusala kuti Mweendelezi wesu nguLeza kwiinda mukuyandula akukomba mubukombi bwakasimpe buyeeme muBbaibbele, iJwi lyaLeza. (Johane 4:23) Tukaka kuti Saatani abe mweendelezi wesu kwiinda mukutatola lubazu mutwaambo twacisi, amunkondo, mbuli mbwakacita Jesu.​—Bala Johane 17:14.

Saatani ubelesya nguzu zyakwe mukusungwaazya incito zibi zyakutalilemeka zijaya. Zimwi nzubo abeenzuma balakonzya kutukazya naa kutuseka ikuti twakaka incito eezyo. (1 Petro 4:3, 4) Nkikaako tweelede kusala. Uyooliswanizya abantu bayanda Leza na? Sena tuyooswiilila milawo yakwe yabucenjezu ayaluyando na? Ikuti twacita oobu, tunooli twatondezya kuti Saatani wakalikubeja naakati takwe muntu ukonzya kukomba Leza kali mubuyumu-yumu.​—Bala 1 baKorinto 6:9, 10; 15:33.

Luyando lwaLeza kubantu lutondezya kuti bubi amapenzi zizoomana. Aabo basyoma eezi bayoobotelwaa buumi aanyika kukabe kutamani.​—Bala Johane 3:16.