Makaniinzi Mabotu Atalaa Bukombi?

1. Sena bukombi boonse buli kabotu na?

Muzikombelo zyoonse kuli bantu bayanda kukomba Leza camoyo woonse. Makani mabotu ngaakuti Leza ulababona alimwi ulaandaba ambabo. Pesi, ciyusisya ncakuti zikombelo zyabubelesegwa mukucita zintu zibi. (2 baKorinto 4:3, 4; 11:13-15) Kweendelana atwambo tumwayigwa, zimwi zikombelo zilanjilila mukulwana kuyoosya, mukunyonyoonwa kwazisi naa kwamisyobo, munkondo, alimwi amukutajatwa kabotu kwabana. Eezi zilabacisa aabo bayanda kukomba Leza camoyo woonse!​—Bala Matayo 24:3-5, 11, 12.

Cikombelo cakasimpe cilamubotezya Leza, pesi cakubeja tacimubotezyi pe. Ciyiisya atalaa makani atayeeme muBbaibbele abikkilizya injiisyo zyakubeja atalaa Leza alimwi atalaa bantu bafwide. Nikuba boobo Jehova uyanda kuti bantu bazibe kasimpe atalaa nguwe.​—Bala Ezekiele 18:4; 1 Timoteo 2:3-5.

2. Makaniinzi mabotu atalaa bukombi?

Kulabotezya kuziba kuti Leza teenwi azikombelo zicitaanga zilamuyanda, pesi kazitondezya kuyanda nyika yaSaatani. (Jakobo 4:4) IJwi lyaLeza lyaamba bukombi bwakubeja boonse kuti ndi “Babuloni Mpati.” Ciindi Babuloni wakali muunzi aawo bukombi bwakubeja mpubwakatalikila nikwakamana Zambangulwe lyamucindi caNowa. Lino lino, Leza uyoonyonyoona bukombi bweena bantu akubadyamiizya.​—Bala Ciyubunuzyo 17:1, 2, 5, 16, 17; 18:8.

Alubo kulaamwi makani mabotu. Jehova tabalubide bantu babombe myoyo bajanika mubukombi bwakubeja nyika yoonse. Ulikubaswaanizya antoomwe kwiinda mukubayiisya kasimpe.​—Bala Mika 4:2, 5.

3. Bantu bayanda kukomba Leza camoyo woonse beelede kucitaanzi?

Jehova ulabayanda aabo bayanda kasimpe, abayanda kucita zibotu. Ulabasungwaazya kuti bazwe mubukombi bwakubeja. Bantu bayanda Leza balacinca nzila yakupona kuti bamubotezye.​—Bala Ciyubunuzyo 18:4.

Mumwaanda wakutalika aabo bakalaa ciyandisyo cakukomba Leza, bakawatambula camoyo woonse makani mabotu ngibakamvwa kubaapostolo. Bakiiya nzila mpya yakupona kuzwa kuli Jehova. Inzila iibotezya yakupona, ilaamakanze, alimwi ilaabulangilizi. Cikozyanyo cibotu cakutobelezya nkaambo bakatambula makani mabotu kwiinda mukutondezya kuti Jehova ngunguwe uyandika loko mubuumi bwabo.​—Bala 1 baTesalonika 1:8, 9; 2:13.

Jehova ulabatambula amaboko obilwe mumpuli yakwe yabakombi aabo bazwa mubukombi bwakubeja. Ikuti watambula kutamba kwaJehova kwaluyando, uyooba mweenzumaakwe, uyoojana impuli impya ilaaa luyando yabakombima baJehova alimwi uyoojana buumi butamani.​—Bala Marko 10:29, 30; 2 baKorinto 6:17, 18.

4. Leza uyokweeta biyeni kubotelwa munyika yoonse?

Makani mabotu ngaakuti, bukombi bwakubeja buyoobeteekwa. Eezi ziyoopa kuti bantu baangununwe mukudyaamizigwa. Bukombi bwakubeja tabukoyoyeena bantu alimwi tabuko aanzanisya bantu lubo. Bantu boonse banoli bauumi bayooswaanizigwa mukukomba Leza omwe biyo wakasimpe.​—Bala Ciyubunuzyo 18:20, 21; 21:3, 4.