Rahabu Wakasyoma muli Jehova

Atucitaanga tuli kumuunzi wakuJeriko. Ooyu muunzi uli munyika yaKanana, ooku kukkala bantu batakombi Jehova. Ooku nkuko kukkala mwanakazi utegwa Rahabu.

Ciindi Rahabu naakacili musimbi, wakamvwa lwaano lwakuti Musa wakaanzanya biyeni Lwizi Lusalala akuti wakabagwisya biyeni baIsrayeli kuEgepita. Alubo wakamvwa kuti Jehova wakabagwasya biyeni baIsrayeli kuti bazunde basinkondonyina. Lino wamvwa kuti baIsrayeli balibungene afwiifwi amuunzi waJeriko!

Limwi zuba kumagolezya, baalumi babili baIsrayeli bayinka kuJeriko kukulanga-langa nyika. Basikaa n’anda yaRahabu. Rahabu wabatambula kuti banjile mun’anda alimwi bakkale. Mubusiku mbuboobo, mwami waJeriko waziba kuti kuli basikulanga-langa muunzi banjila, alimwi balikun’anda yaRahabu. Nkinkaako, mwami watuma baalumi kuti bakabajate. Rahabu wasisa basikulanga-langa muunzi babili atalaa kaluli kan’anda yakwe akubuzya baalumi bakatumidwaa mwami kuti: ‘Basikulanga-langa muunzi balaano pesi bazwa kale mumuunzi. Ikuti mwayinka lino, mulabajana munzila!’ Pesi ulizi na kuti nkamboonzi Rahabu naliikukwabilila basikulanga-langa muunzi?— Nkaambo usyoma muli Jehova alimwi ulizi kuti Leza uyoopa baIsrayeli nyika yaKanana.

Kabatanazwa mun’anda yaRahabu, basikulanga-langa muunzi bamusyomezya kuti we abamumpuli yakwe bayoofutuka ciindi muunzi waJeriko waakunyonyoonwa. Ulizi na kuti bamubuzya kuti aciteenzi?— Bati: ‘Bweza ntambo iisalala alimwi uyilengelezyaa windo. Ikuti wacitoobu boonse balimun’anda yako balafutuka.’ Rahabu wacita mbuli mbubamulayilila basikulanga-langa muunzi. Ulizi na kuti niinzi citacitike kunembo?—

Nikwayiinda mazuba mace, baIsrayeli bazyunguluka muunzi waJeriko kabawumwide. Kwamazuba aali musanu awumwi bali kuzyunguluka muunzi kamwi abuzuba. Pesi mubuzuba bwamusanu atubili bazyunguluka muunzi ziindi zili musanu atubili. Mpawo boonse boompolola aloompololo lupati. Jehova wacita kuti bwaanda bwamuunzi waJeriko buwe. Pesi n’anda ilaa ntambo iisalala ilengeledaa windo iciimvwi! Uliibwene na mucifwanikisyo?— Rahabu abamumpuli yakwe bafutuka!

Wiiyaanzi kuzwa kuli Rahabu?— Rahabu wakasyoma muli Jehova nkaambo kazintu zyoonse zibotezya nzyaakayiiya atalaa nguwe. Ayebo uliikwiiya zintu zyiingi zibotezya atalaa Jehova. Ulamusyoma na Jehova mbuli mbwaakacita Rahabu?— Tulizizi kuti ulamusyoma!