Davida Taakali Kuyoowa Pe

Niinzi ncucita kuti wayoowa?— Amwi ngawaya kuli baamaako naa kuli ndeendaako kuti bakugwasye. Pesi kuli umwi muntu uunga ulakonzya kukugwasya, alimwi ulaamanguzu loko kwiinda muntu woonse. Ulimwizi na kuti ngwani muntu ooyo?— NguJehova. Atwiiye atalaa mulombe uutegwa Davida kuzwa muBbaibbele. Wakalizi kuti Jehova unoomugwasya ciindi coonse, nkinkaako taakali kuyoowa pe.

Kuzwa ciindi Davida naakali mwana, bazyali bakwe bakamuyiisya kuti ayande Jehova. Eezi zyakagwasya Davida kuti atayoowi nikuba kuciindi naakali kucitikilwaa zintu ziyoosya. Wakalizi kuti Jehova wakali Mwenzinyina alimwi wakali kuyoomugwasya. Limwi zuba Davida kalikweembela mbelele, kwakasika mulavu mpawo wakaluma mbelele yomwe! Ulizi na kuti Davida wakacitaanzi? Wakaandila mulavu ooyu alimwi wakamujata kucilezu mpawo wakamujeya. Alubo aawo munyama uutegwa bbeya naakali kuyanda kuluma mbelele, Davida wakamujaya munyama ooyo. Ubonaanga ngwani loko wakali kugwasya Davida?— NguJehova.

Kwakali acimwi ciindi aawo Davida mpaakatondezya busicamba. BaIsrayeli bakali kulwanaa baFilisti. Umwi silumamba wabaFilisti wakali mwaalumi mulamfu loko, alimwi kalibbabbani. Izina lyakwe wakali Goliati. Bbabbani eelyo lyakali kusampula basilumamba babaIsrayeli aJehova. Goliati wakaambila basilumamba babaIsrayeli kuti baze bazoolwanaa nguwe. Pesi baIsrayeli boonse bakali kuyoowa kulwaanaawe. Ciindi Davida naakamvwa nkani eeyi, wakabuzya Goliati kuti: ‘Ndiyookulwana! Jehova uyoondigwasya, alimwi ndiyookuzunda!’ Ubonaanga Davida wakalaa busicamba na?— Masimpe, wakalaa busicamba. Ulayanda na kuziba kuti niinzi cakazoocitika kunembo?

Davida wakabweza nkwilipo yakwe amabwe aalimusanu aabulungene. Inkwilipo ibelesegwa kutuluzya mabwe. Mpawo wakiinka kuyoolwanaa Goliati. Goliati naakabona buniini bwaDavida, wakatalika kumusampula. Pesi Davida wakamwaambila kuti: ‘Waza kulindime kujisi panga, pesi mebo ndiza kulinduwe muzina lyaJehova!’ Mpawo Davida wakabikka bbwe munkwilipo yakwe. Wakacijaana kaya kuli Goliati alimwi wakamutululaa bbwe. Eelyo bbwe lyakawuma Goliati aankumu! Bbabbani eelyo lyakawidaansi, mpawo lyakafwa! BaFilisti bakayoowa alimwi boonse bakacija. Ino cakakonzeka biyeni kuti mulombe uli mbuli Davida akonzye kuzunda bbabbani?— Nkaambo wakagwasigwaa Jehova, alimwi Jehova wakalaamanguzu kwiinda bbabbani eelyo!

Wiiyaanzi kulwaano lwaDavida?— Jehova ulaamanguzu kwiinda bantu boonse, alimwi mweenzinyokwe. Ayebo ciindi wayoowa, utalubi kuti Jehova ulakonzya kukugwasya kubaa busicamba.