Mbomukonzya Kubelesya Mali

Toonse tuliiyanda mali kuti tusanine mpuli zyesu. (Tusimpi 30:8) Kuyungizya waawo, ‘mali ilakwabilila.’ (Mukambausi 7:12) Mbuli bantu bakwetene, cilakonzya kumuyumina kuti mwaambule atalaa mali, pesi mutazumizyi mali kuti yeete mapenzi mulukwatano lwanu. (BaEfeso 4:32) Bantu bakwetene beelede kusyomana akubelekelaamwi ciindi nobasala mbobeelede kubelesya mali.

1 AMUBAMBE CABUSONGO

NZILYAAMBA BBAIBBELE: “Ino nguuli akati kanu, uuyanda kuyaka n’anda ndamfu, uutasaanguni kukala sansi, abale mali ngati yasye n’anda, abone na ulijisi aakwiizyulizya?” (Luka 14:28) Cilayandika kuti mubambe kamulaamwi mbomuyoobelesya mali yanu. (Amosi 3:3) Amwaambuzyanye atalaa zintu nzyomuyanda kuula amali njomutabelesye. (Tusimpi 31:16) Nikuba kuti mulaa mali yakuula cimwi cintu, tazyaambi kuti mucuule pe cintu eeco. Amweezye kutabaa zikwelete. Amubelesye mali njimulayo luzutu.​—Tusimpi 21:5; 22:7.

NZYOKONZYA KUCITA:

• Ikuti kamulaa mali yasyala nowamana mweezi, mwelede kwaambula kamulaamwi kuti muliibelesya biyeni

• Ikuti mali yenu kiitakkwani kuula zimwi zintu nzimuyanda, amucite mabambe akucesya zyakuula. Mucikozyanyo, mulakonzya kulijikila cakulya ikutali kulya cakulya cakuula

2 ZWIDAA NTANGANANA ALIMWI BONA ZINTU MBULI MBUZIBEDE

NZILYAAMBA BBAIBBELE: ‘Nkaambo tubona zintu zyoonse cakusyomeka nikuba kumeso aaMwami nikuba kumeso aabantu.’ (2 BaKorinto 8:21.) Muzwidaa ntanganana ngokwetenaawe kumali njujana alimwi njubelesya.

Welede kwaambuzyanya angokwetenaawe ciindi nosala kucita zintu zipati atalaa mali njojana. (Tusimpi 13:10) Kwaambuzyanya atalaa mali kuyoogwasya kuti kube luumuno mulukwatano lwenu. Bona mali njujana mbuli mali yampuli ikutali yako awulikke.​—1 Timoteo 5:8.

NZYOKONZYA KUCITA:

• Amuzuminane mali njatabelesye umwi awumwi wanu katabuzizye umwi pe

• Mutalindili kuti mali yeete penzi, mpawo nomutayande kwaambula atalaa mali