Mbomukonzya Kuyiisya Mwaneenu

Ciindi Jehova naakatalisya mabambe aampuli, wakapa bazyali mulimu wakuti balanganye bana babo. (BaKolose 3:20) Mukuli wako mbuli muzyali kuti uyiisye mwanaako kuti ayande Jehova alimwi kuti azobe mwana uuzi nzyayelede kucita naakomena. (2 Timoteo 1:5; 3:15) Welede kuziba zili mumoyo wamwanaako. Masimpe ngakuti cikozyanyo cako cilikabotu cilayandikana loko. Ikuti watalika kubikka Jwi lyaJehova mumoyo wako, uyookonzya kuzwidilila kuliyiisya kumwanaako.​—Intembauzyo 40:8.

1 CITA KUTI CIBE CUUBA KUBANA BAKO KUTI BAAMBULAA NDUWE

NZILYAAMBA BBAIBBELE: ‘Baa mutwe muuba, umuke kwaamba.’ (Jakobo 1:19.) Ncoyanda nkuti bana bako balimvwe kabaangunukide kwaambulaa nduwe. Beelede kuziziba kuti ulilipedelede kubaswiilila ciindi nobayanda kwaambula. Cita kuti kube luumuno mumpuli kuti cuubile bana bako kwaambula mbobalimvwa. (Jakobo 3:18) Ikuti bayeeya kuti ulabanyemena alimwi ulabayeeyela zitali nzizyo pe, takwe nibanga balaangunuka kwaambula mbobalimvwa. Baamoyo mulamfu kubana bako alimwi ciindi coonse kubabuzya kuti ulabayanda.​—Matayo 3:17; 1 BaKorinto 8:1.

NZYOKONZYA KUCITA:

• Ciindi bana bako nobayanda kwaambulaa nduwe, libambile kubaswiilila

• Ciindi coonse weelede kwaambulaa bana bako, kutali ciindi nokuli mapenzi luzutu

2 YEZYA KUMVWISISISYA NZYOBALII KWAMBUULA

NZILYAAMBA BBAIBBELE: ‘Uubika moyo wakwe kumakani ulazwidilila.’ (Tusimpi 16:20) Cimwi ciindi, kuti umvwisisisye nzila njobalimvwaayo bana bako, taweelede kubikkila maanu kumajwi ngibabelesya luzutu. Kiingi-kiingi bacikula baliinzizya kukwaambula tumwi twaambo naa kwaambula zintu nzibatayandi kwaambula. “Na muntu wavuwa katana kumvwa mbufubafuba bwakwe ansoni.” (Tusimpi 18:13) Utafwambaani kunyema.​—Tusimpi 19:11.

NZYOKONZYA KUCITA:

• Yezya kutabanjila munkanwa naa kutabanyemena bana bako, nikuba kuti bambuula makani aalibiyeni

• Yeeya mbowakali kulimvwa azintu nzyowakali kubonaanga zilayandikana kulinduwe ciindi nowakalaa minyaka yeelene ayabana bako

3 AMUTONDEZYE KUTI MULIJISINI

NZILYAAMBA BBAIBBELE: “Swiilila, mwanaangu, lulayo lwauso, alimwi utataalazyi mulao wabanyoko.” (Tusimpi 1:8) Jehova wakapa bazyali mulimu wakulanganya bana babo. Weelede kuyiisya bana bako kuti kabakulemeka akukuswiilila. (BaEfeso 6:1-3) Bana balakonzya kuzibona kuti bazyali babo tabakwe “lukamantano lwamoyo omwe alwamiyeeyo yomwe.” (1 BaKorinto 1:10) Ikuti teemwazuminana, amweezye kutatondezya kutamvwanana kumeso abana benu nkaambo eeci cilakonzya kubalesya kumulemeka mbuli bazyali.

NZYOKONZYA KUCITA:

• Amwaambuule akuzuminana mbomukonzya kulaya bana benu

• Ikuti kamulaamizeezo iisiyene yakuyiisya bana benu, yezya kumvwisisya maboneno ayooyo ngokwetenaawe

4 AMUBAA MABAMBE

NZILYAAMBA BBAIBBELE: “Iyisya mwana aende munzila iielede.” (Tusimpi 22:6) Kuzwidilila kwiisya bana takulicitikili pe akulikke. Mweelede kubaa mabambe akuyiisya bana benu aaswaanizya kubalaya. (Intembauzyo 127:4; Tusimpi 13:1) Lulayo talwaambi cisubulo pe ciindi coonse, pesi lubikkilizya kugwasya bana kuti bamvwisisisye kuti nkamboonzi nikuli milawu. (Tusimpi 28:7) Alubo, amubayiisye kuti bayande Jwi lyaJehova akuti bamvwisisisye nzyolyaamba. (Intembauzyo 1:2) Eezi ziyoobagwasya kuti babaa miyeeyo iili kabotu.​—BaHebrayo 5:14.

NZYOKONZYA KUCITA:

• Baa coonzyo cakuti bana bako babona Leza mbuli Muntu ngobakonzya kusyoma

• Bagwasye kuti babone alimwi batantamuke zintu zibi, zili mbuli zeeziya zijanika aaIntaneti akuma social networks. Bayiisye mbobakonzya kutantamuka bantu banga balabapa kuti babaa mizeezo yakoonana