“Kamubayeeya Basolozi Banu”

MAJWI amwaapostolo Pawulu aajanika mulugwalo lwa Bahebrayo 13:7, alakonzya kusandululwa kuti: “Kamubayeeya aabo bamweendelezya.” Kuzwa muPentekkoste ya 33 C.E., baapostolo basyomeka baMwaami Jesu Kristu mbabo bakali kabunga keendelezya kakali kupa malayilile kumbungano yakusaanguna yamaKristu. (Mil. 6:2-4) Mumunyaka wa 49 C.E., kabunga keendelezya kakali kakomena alimwi kakali kuswaanizya bamwi bakatali baapostolo baJesu. Chiindi nikwakali kwaambuulwa nkani yakupalulwa, kabunga keendelezya kakali kuswaanizya ‘baapostolo abaalu bakuJerusalemu.’ (Mil. 15:1, 2) Kakali amulimu wakulangania maKristu munyika yoonse. Bakatumizya magwalo amilawu zyakasimya mbungano alimwi zyakapa kuti basikwiiya babe amuzeezo uumwi. Mbungano zyakali kulemeka akuswiilila malayilile aakali kuzwa kukabunga keendelezya alimwi eezi zyakapa kuti bazwidilile akuti Jehova abalongezye.—Mil. 8:1, 14, 15; 15:22-31; 16: 4, 5; Heb. 13:17

² Baapostolo nibakafwa, kwakaba basiluleyo. (2 Tes. 2:3-12) Mbuli mbaakambide Jesu muchikozyano chakwe chamayila amasokwe. Mayila (maKristu aananikidwe) akabyalwaamwi amasokwe (maKristu aakubeja). Kwaminyaka myiingi, nkamu eezi zyakalekelwa kuti zikomenaamwi kusikila kuchiindi chakutebula, kwaamba “mamanino aabweende bwazintu.” (Mt. 13:24-30, 36-43) MaKristu aananikidwe akali kulongezegwa aJesu nikuba kuti teekwakali kabunga keendelezya naakuti imwi nzila Jesu njaakali kubelesya kuti ape batobeli bakwe malayilile. (Mt. 28:20) Nikuba boobo, Jesu wakaamba kuti kuchiindi chakutebula zintu zyakali kuyoochincha.

³ ‘Ngwani muzike uuchenjede alimwi uusyomeka?’ Jesu wakabuzya mubuzyo ooyu chiindi naakali kupandulula “citondeezyo” chakali atala “amamanino aabweende bwazintu.” (Mt. 24:3, 42-47) Jesu wakatondeezya kuti muzike uusyomekede wakali kuyoobeleka changuzu kupa babelesi baLeza chakulya chigwasya mubukombi “kuciindi ceelede.” Mumwaanda wamunyaka wakusaanguna, Jesu wakabelesya kabunga kabantu kutali muntu uumwi kuti ayendelezye, muchiindi eechino chamamanino, Jesu uliikubelesya muzike uuchenjede kuti ayendelezye kutali muntu uumwi.

NGWANI ‘MUZIKE UUCHENJEDE ALIMWI UUSYOMEKA?’

⁴ Ngwani Jesu ngwakabikka kuti alanganie batobeli bakwe? Kuleelela kuti abelesye maKristu aananikidwe amuuya uusalala achili aanyika. Bbayibbele libaamba kuti “mbapaizi bami” bakapegwa mulimu wakuti, ‘baambilizye koonse-koonse bulemu” bwayooyo wakabiita kuzwa mumudima akubanjizya mumumuni wakwe uutaliboteli.’ (1 Pet. 2:9; Malk. 2:7; Ciy. 12:17) MaKristu oonse aananikidwe amuuya apanga muzike uusyomekede na? Peepe. Chiindi Jesu naakachita chigambyo chakupa chakulya kunkamu yabaalumi basika ku 5 000 kakutabalwi banakazi abana, wakapa basikwiiya bakwe mpawo basikwiiya bakazoopa bantu. (Mt. 14:19) Wakasanina bantu biingi kabelesya bantu bache. Nikuba mazubaano, njiyo nzila njalikubelesya.

⁵ Nkinkaako, “mubanzi [mulangizi] uusyomeka, uucenjede,” upangwa akabunga kabaalumi bananikidwe amuuya uusalala bachita mulimu wakubamba chakulya chigwasya mubukombi kuchiindi chakubawo kwaKristu. (Lk. 12:42) Mazubaano, baalumi aaba bapanga ‘muzike uuchenjede alimwi uusyomeka’ babelekaamwi kumawofesi mapati aBakamboni baJehova. Baalumi aaba bananikidwe, bategwa Nkabunga Keendelezya kaBakamboni baJehova.

⁶ Kristu ubelesya kabunga aaka kuti kapupulule makani alaatala akuzuzikizigwa kwabupolofita buli muBbayibbele akupa malayilile ayelede atala ambotukonzya kubelesya malayilile aazwa muBbayibbele mubuumi. Tujana chakulya eechi chitugwasya mubukombi kwiinda mumbungano zyaBakamboni baJehova. (Is. 43:10; Gal. 6:16) Chiindi, mubelesi uusyomeka wakali muntu uulangania ng’anda. Nkinkaako, muzike uusyomekede wakapegwa mulimu wakulangania bamung’anda yaJesu. Aboobo, muzike uusyomeka ulangania kubelesegwa kwazintu zisiyene-siyene zili mbuli mulimu wakukambawuka, miswaangano yamabazu ayabbooma, kusalwa kwabalangizi babeleka mumabazu aasiyene-siyene mumbunga, akupupululwa kwamabbuku apandulula Bbayibbele, zyoonse eezi zigwasya ‘Bamung’anda.’—Mt. 24:45.

⁷ Nkinkaako, ‘bamung’anda’ mbaani? Mbaabo basaninwa. Kumasaangunino, bananike mbabo bakali ‘bamung’anda’. Mukuya kwachiindi ‘bamung’anda’ bakazooswaanizya nkamu mpati “yambelele zimbi.” (Joh. 10:16) Tubunga ootu toonse tujana chakulya chipegwa amuzike uusyomekede.

⁸ Chiindi chamapenzi mapati, Jesu nataze kuzoobeteka nyika eeyi iizwide bubi, uyoobikka muzike uusyomekede kuti abe mupati “wakulanganya lubono lwakwe loonse.” (Mt. 24:46, 47) Aabo bapanga muzike uusyomekede bayooba achilongezyo chakupona kujulu. Bayooyendelezyaamwi aKristu kujulu kabali 144 000. Nikuba kuti takunooli muzike uuchenjede alimwi uusyomekede aanyika, Jehova aJesu bayoopa bantu batakeendelezegwe aBwami bwaMesiya malayilile kababelesya “basilutwe.”—Int. 45:16.

NKAMBOONZI NITWEELEDE ‘KUBASWIILILA AABO BATUZULWIDA’?

⁹ Kuli twaambo twiingi tupa kuti ‘tubaswiilile aabo bazulwida akati kesu’ akubasyoma. Kuchita oobo kutugwasya biyeni? Mwaapostolo Pawulu wakati: “Nkaambo balanganya ndinywe kabali baabo ibayoobuzyigwa makani, ikutegwa kabacita oobu cakukondwa ikutali cakuusa pe, nkaambo eeci inga camuletela mapenzi.” (Heb. 13:17) Tweelede kwaaswiilila malayilile ngitujana kuli baabo batweendelezya nkaambo balatulangania akutukwabilila kuti tukkale katusimide mubukombi.

¹⁰ Lugwalo lwa 1 Bakorinto 16:14 lwaamba kuti: “Amucite zintu zyoonse caluyando.” Nkinkaako, kugwasya babelesi baLeza nkubachita kuyeeme muluyando. Lugwalo lwa 1 Bakorinto 13:4-8 lwaamba kuti: ‘Luyando lulamoyo mulamfu alimwi lulaaluzyalo. Luyando talukwe munyono, talulidundi, talulisumpuli, talukwe cisapi, talubikkili buyo maano kuzintu nzyoluyanda, talunyemi-nyemi, talubikkilili. Talukkomanini kutalulama, pele lukkomanina kasimpe. Lulajatila zintu zyoonse, lulasyoma zintu zyoonse, lulalangila zintu zyoonse, lulaliyumya muzintu zyoonse. Luyando talumani.’ Tulakonzya kubusyoma busolozi oobu nkaambo kugwasya babelesi baJehova nkubachita koonse kuyeeme muluyando. Kuyungizya waawo, kusala ooku kutondeezya kuti Jehova ulatuyanda.

¹¹ Jehova ubelesya bantu batamaninide kuti beendelezye mumbungano, mbuli mbakachita mumwaanda wamunyaka wakusaanguna. Alubo, chiindi Jehova wakabelesya bantu batamaninide kuti azuzikizye makanze aakwe. Muchikozyano, Nowa wakayaka bwaato alimwi wakakambawuka atala alunyonyooko lwakali kuza. (Matl. 6:13, 14, 22; 2 Pet. 2:5) Musa wakasalwa kuti agwisye babelesi baJehova munyika yaEgepita. (Kul. 3:10) Alubo, bantu batamaninide bakabelesegwa kuti balembe Bbayibbele. (2 Tim. 3:16; 2 Pet. 1:21) Nikuba kuti Jehova ubelesya bantu batamaninide kuti batuzulwide mumulimu wakukambawuka akuchita basikwiiya, eezi tazitulesyi kusyoma mbunga yaLeza. Nikuba boobo, kulatusimya kuziba kuti Jehova nguwe ulikulongezya mbunga kuti ichite zyoonse nziichita. Muzike uusyomekede utondeezya kuti muuya uusalala nguwo ubazulwida chiindi choonse nikuba muzyiimo zikataazya. Mazubaano, mbunga yaJehova ilaanyika, ilikujana zilongezyo zyiingi. Nkinkaako, tweelede kubelekelaamwi akabunga keendelezya akukasyoma amoyo woonse.

MBOTUTONDEEZYA KWAASYOMA MABAMBE AJEHOVA

¹² Bantu bapedwe mikuli mumbungano batondeezya kuti balayisyoma mbunga kwiinda mukulipeda kuchita milimu njibapedwe. (Mil. 20:28) Tulakambawuka kung’anda ang’anda, katuchita kubweedulula akwiiya abantu Bbayibbele chabusungu nkaambo tuli bakambawusi baBwaami. (Mt. 24:14; 28:19, 20) Tulalibambila alimwi tuliinka kumiswaangano yesu yabuKristu kuswaanizya amiswaangano yamabazu ayabbooma kuchitila kuti tugwasigwe achakulya chitugwasya mubukombi nchitupegwa amuzike uusyomekede. Tulasungwaazyania chiindi nitulaamwi abakwesu kumiswaangano eeyi yabuKristu.—Heb. 10:24, 25.

¹³ Tutondeezya kuti tulayisyoma mbunga chiindi nitusanga zintu nzitulaazyo. (Tus. 3:9, 10) Tulafwambaana kubagwasya bakwesu kuti twabona kuti bayanda lugwasyo. (Gal. 6:10; 1 Tim. 6:18) Tuchita oobo akaambo kaluyando lwabunyina akuti tutondeezye Jehova ambunga yakwe kuti tulalumba kuba mumbunga yakwe.—Joh. 13:35.

¹⁴ Alubo, tutondeezya kuti tulayisyoma mbunga kwiinda mukulemeka kusala nkwiichita. Eezi ziswaanizya kuswiilila malayilile ngitujana kuli baabo bapedwe mulimu wakutulangania, mbuli balangizi bamabazu abaalu bali mumbungano. Bakwesu aaba mbaamwi beelede kulemekwa nkambo ‘mbaazulwida akati kesu’. (Heb. 13:7,17) Nikuba kuti chimwi chiindi amwi makani tatwaamvwisisisyi kabotu, pesi tulaaswiilila nkaambo tulizi kuti alatugwasya. Eezi zipa kuti Jehova atulongezye akaambo kakuswiilila Jwi lyakwe ambunga yakwe. Zyoonse eezi zitondeezya kuti tulamulemeka Mwaami wesu Jesu Kristu.

¹⁵ Nisimpe, tweelede kumusyoma amoyo woonse muzike uuchenjede alimwi uusyomekede. Saatani, leza wabweende oobu, uliikweezya amanguzu oonse kusampawula zina lyaLeza ambunga yakwe. (2 Kor. 4:4) Tweelede kuchenjela kuti tutachegwi mutukole twaSaatani tujaya. (2 Kor. 2:11) Saatani uyanda kuti babelesi baJehova batabi abweenzinyina aLeza nkaambo ulizi kuti “ujisi buyo kaindi kaniini,” kuti awalilwe mumulindi. (Ciy. 12:12) Nikuba boobo, atwiinkilile kunembo kuba abweenzinyina buli kabotu aJehova nikuba kuti Saatani ulikweezya changuzu kutunyongania mubukombi. Atumusyome Jehova anzila njabelesya kuti alanganie babelesi bakwe. Kuchita oobo kupa kuti tujatane munyika yoonse.