Balangizi Balangania Butanga

CHIINDI Jesu naakali kukambawuka, wakatondeezya kuti ‘ngusikweembela mubotu.’ (Joh. 10:11) Naakabona bantu biingi bakali kumutobela, “wakabafwida luzyalo, nkaambo bakali kupenzyegwa alimwi bakalimwaikide mbuli mbelele zitakwe mweembezi.” (Mt. 9:36) Petro abamwi baapostolo bakalubona luyando ndwaakatondeezya bantu. Jesu wakalisiyene abeembezi bakubeja bakuIsrayeli, nkaambo teebakali kulangania kabotu butanga muzintu zyabukombi alubo mbelele zyakali mwayikide. (Ezk. 34:7, 8) Nzila Jesu njakayiisyaayo anjaakalangania ayo mbelele kusikila mukupeda buumi bwakwe nkaambo kanzizyo, yakali chikozyano chili kabotu kubaapostolo kuti bakonzye kugwasya bantu balaalusyomo kuti babweede kuli Jehova, ‘mweembezi wabo asikulingula myuuya yabo.’—1 Pet. 2:25.

² Chimwi chiindi Jesu kalikwaambuula aPetro wakamutondeezya mbokwakali kuyandikana kweembela akusanina mbelele. (Joh. 21:15-17) Zilaantanganana kuti Petro wakaatambula majwi aaJesu, nkaambo wakabuzya baalu bamumbungano yamaKristu amumwaanda wakusaanguna kuti: “Amweembele butanga bwa Leza ibuli mumaanza aanu, amubeleke mbomuli balangizi, ikutali cakusinikizyigwa buya pe, pele cakuliyandila kumbele lya Leza; ikutali akaambo kakuyanda kujana mpindu cabumpelenge, pele caluyandisisyo; ikutali kuba mbuli basimalelo kuli baabo ibali ndukono lwa Leza, pele mube zikozyanyo kubutanga.” (1 Pet. 5:1-3) Majwi aPetro achibeleka ambulisunu kubalangizi mumbungano. Baalu batobelezya chikozyano chaJesu kwiinda mukuba zikozyano zilikabotu kumbelele akuyizulwida kabotu mbungano.—Heb. 13:7.

³ Tulalumba kuba abalangizi basalwa amuuya uusalala mumbungano. Tujana zilongezyo zyiingi loko akaambo kakutulangania nkubachita. Muchikozyano, balangizi balatusungwaazya alimwi babikkila maanu kuli umwi awumwi mumbungano. Mviki amviki, balazulwida kumiswaangano yambungano kuchitila kuti boonse bali mumbungano bagwasigwe. (Rom. 12:8) Balatukwabilila kuzintu zitali kabotu, akubantu batali kabotu. (Is. 32:2; Tit. 1:9-11) Kusungwaala kwabo mumulimu wakukambawuka kupa kuti andiswe tube basungu mumulimu wakukambawuka makani mabotu. (Heb. 13:15-17) Jehova uyaka mbungano kabelesya “zipego” eezi kubantu.—Ef. 4:8, 11, 12.

ZYEELELO ZYABALANGIZI

⁴ Baalumi basalwa kuti babe balangizi beelede kuba azyeelelo zijanika muBbayibbele kuchitila kuti bakonzye kulangania kabotu mbungano. Baambwa kuti basalwa amuuya uusalala ikuti kabapona kweendelana azyeelelo zizwa muJwi lyaLeza. (Mil. 20:28) Zyeelelo zizwa muMagwalo zyabalangizi zilisumpukide nkaambo kuba mulangizi mulimu mupati loko. Nikuba boobo, tazyaambi kuti zyeelelo eezi nzilemu loko zyakuti mukwesu uuyanda kubelekela Jehova takonzyi kweelela. Balangizi beelede kuboneka kuti babelesya malayilile aazwa muBbayibbele mubuumi bwabo.

⁵ Mwaapostolo Pawulu wakaamba zyeelelo zizwa muMagwalo zyabalangizi mulugwalo lwakusaanguna ndwakalembela Timoteyo amulugwalo ndwakalembela Tito. Lugwalo lwa 1 Timoteo 3:1-7 lwaamba kuti: “Ikuti naa muntu uyanda kuba mulangizi, uyanda mulimo mubotu. Aboobo mulangizi weelede kuba muntu uutakwe kampenda, mulumi uukwete mukaintu omwe, uutaciindizyi muzilengwa, uulibatamika, mulondo, uusamausya beenzu, uukonzya kuyiisya kabotu, ikutali mukolwi, ikutali sinkondo, pele uunyoneka, ikutali sinkazi, ikutali simuyanda mali, weelede kuba muntu uubeendelezya kabotu bamuŋanda yakwe, uujisi bana balibombya cakumaninina (nkaambo ikuti muntu katacizyi kweendelezya bamuŋanda yakwe mwini, ino mbuti mbwakonzya kulanganya mbungano ya Leza?), ikutali wakasanduka caino-ino, ikuyoowa kuti inga walitukumuna akubetekwa mbubonya mbuli Diabolosi. Kunze lyaboobo, weelede kuti kajisi mpuwo mbotu kubantu bakunze, ikutegwa bantu batamusampauli akuti atacegwi mukakole ka Diabolosi.”

⁶ Pawulu wakalembela Tito kuti: “Ndakakusiya mu Krete ikutegwa ululamike zintu zinyongene alimwi akusala baalu mumunzi amunzi, mbubonya mbondakakulailila ikuti kakuli mwaalumi uuli woonse uunyina butongo, mulumi wamukaintu omwe, uujisi bana basyoma ibatapedwe mulandu uuli woonse wabukkale bwabutaka naa ibatamvwi kulaigwa. Nkaambo mbwali mubanzi wa Leza, imulangizi weelede kuba muntu uutakwe butongo buli boonse, ikutali muntu uutanyoneki, ikutali muntu uufwambaana kukalala, ikutali mukolwi, ikutali sinkondo, ikutali uuyanda kujana mpindu cabumpelenge, pele abe muntu uusamausya beenzu, uuyandisya bubotu, uulibatamika, uululeme, uusyomeka, uulilesya, uukakatila kumajwi aasyomeka kujatikizya luzyibo lwakwe mukuyiisya, kutegwa acikonzye kukulwaizya bamwi anjiisyo mbotu alimwi akusinsa baabo ibakazya.”—Tito 1:5-9.

⁷ Bakwesu tabeelede kuyoowa kubelekela kuba balangizi nikuba kuti zyeelelo zizwa muMagwalo zyakuba balangizi zilakonzya kubonekaanga nziyumu. Kuti bapona kweendelana azyeelelo zyabalangizi zizwa muMagwalo, basungwaazya bamwi mumbungano kuchita oobo. Pawulu wakalemba kuti ‘zipo’ eezi zyakapegwa kuchitila kuti “kabalulamika basalali, bacite mulimo wakugwasya bamwi, bayake mubili wa Kristo, kusikila toonse tukakamantane mulusyomo amuluzyibo lwini-lwini lwa Mwana wa Leza, tukabe bantu bapati, tukasike aciimo cizulide ica Kristo.”—Ef. 4:8, 12, 13.

⁸ Balangizi tabali bana baniini pe naa baalumi bapya mumbungano. Pesi maKristu asimide mubukombi alaaluzibo atala aBbayibbele alimwi atondeezya kuti alayiyanda mbungano. Tabayoowi kululamika bachita zibi alubo bakwabilila mbelele kubantu bakonzya kuzinyongania. (Is. 32:2) Bantu boonse mumbungano babona kuti balangizi mbaalumi basimide mubukombi bayanda butanga bwaLeza.

⁹ Baalumi basalwa kuti babe balangizi batondeezya kuti balaabusongo mubuumi bwabo. Ikuti kakwete, mulangizi weelede kutobelezya malayilile alukwatano aazwa muMagwalo chaamba kuti weelede kuba amwanakazi omwe luzutu alimwi uubeendelezya kabotu bamung’anda yakwe. Ikuti mulangizi kalaa bana basyoma alubo balibombya alimwi batajisi mulandu wakukolwa nikuba kutaba bana batalayiki, bamwi mumbungano balakonzya kukumbila lugwasyo kulinguwe lulaatala ampuli ambobeelede kupona maKristu. Mulangizi weelede kuba muntu uutakwe kampenda, alubo weelede kuba muntu uuli ampuwo mbotu nikuba kubantu batakombi. Takweelede kuba chintu chitali kabotu chaambwa atala anguwe chikonzya kunyongania mpuwo yambungano. Teelede kuba muntu wakapegwa lulayo lino-lino akaambo kakuchita chibi chipati. Alubo bamwi mumbungano beelede kumvwa kabaangunukide kutobelezya chikozyano chakwe alimwi kababotelwa kuti ulabalangania mubukombi.— 1 Kor. 11:1; 16:15, 16.

¹⁰ Baalumi aaba baleelela kuchita milimu yambungano yakali kuchitwa abaalu bakuIsrayeli aabo bakategwa ‘mbasongo, balichenjede alimwi bali amaanu.’ (Dt. 1:13) Nikuba kuti baalu tabamaninide, pesi balizibidwe mumbungano akubantu baanze kuti mbaalumi bayoowa Leza alimwi bapona kweendelana amalayilile aaLeza. Balakonzya kuyiisya kabaangunukide mumbungano akaambo kakuti tabakwe mulandu.—Rom. 3:23.

¹¹ Baalumi beelela kuba balangizi tabeelede kwiinzilizya muzintu nzibachita alubo beelede kubajata kabotu bamwi. Tabalisumpuli pe. Pesi muzintu zyoonse nzibachita mubuumi bwabo zilatondeezya kuti balaa maboneno alikabotu alubo balalijata. Kulijata kwabo balakutondeezya munzila njibasalaayo kumakani aakunywa bukande azyakulikondelezya. Balalijata mumakani aakunywa bukande kuchitila kuti batajaninwi mulandu wabukolwi. Ikuti baba bakolwi balakonzya kukachilwa kulyeendelezya kabotu akubikkila maanu mukulangania mbungano.

¹² Mulangizi mumbungano weelede kuba mwaalumi uubambikene. Bube bwakwe bubotu ulabutondeezya munzila njalijataayo, mumpuli yakwe amuzintu nzyachita mubuumi. Alubo tabalili kukuchita milimu; ulabamba zintu nzyayanda kuchita. Ubelesya malayilile aazwa kuli Leza chiindi choonse.

¹³ Mulangizi weelede kuba muntu umvwisisisya. Weelede kuba aluumuno abaalunyina bamukabunga kabaalu akubelekelaamwi ambabo. Weelede kulibona munzila iili kabotu alimwi tayelede kulangilila bamwi kuti bachite zyiindilide kwiinda nzibakonzya kuchita. Akaambo kakuti mulangizi mutontozi, nkinkaako, tali mumvwa zyakwe alimwi taliboni kuti nzyayeeya zili kabotu kwiinda baalunyina. Weelede kuziba kuti bamwi bali abube buli kabotu akuti balakonzya kuchita kabotu muli zimwi mbazu mwatakonzyi. Mwaalu ulakonzya kutondeezya kuti mutontonzi kwiinda mukusala kweendelana aMagwalo alimwi akutobelezya chikozyano chaJesu Kristu. (Flp. 2:2-8) Mwaalu tayelede kuba muntu uuyanda zyakulwana, pesi weelede kulemeka bamwi kababona mbuli kuti mbapati kuli nguwe. Tayelede kuba simumvwazyakwe, uuyanda kuti chiindi choonse kakumvwigwa nguwe. Tali unyetuka-nyetuka , pesi weelede kubeleka muluumuno abamwi.

¹⁴ Mukwesu uyanda kuba mulangizi mumbungano weelede kulibatamika. Eezi zyaamba kuti ulaamaboneno aali kabotu atala abamwi alubo tabayeeyeli zitali kabotu. Ulaazi alubo ulaabelesya malayilile aazwa kuli Jehova. Muntu ulibatamika ulalutambula lulayo alubo ulazumina kuzulwidwa. Tali sikuupa-wupa aameso.

¹⁵ Pawulu wakayeezya Tito kuti mulangizi weelede kuba muntu uuyandisya bubotu. Weelede kuba muntu ululeme alubo usyomeka. Bube oobu ulabutondeezya kwiinda munzila njabajataayo bamwi, akuchita zintu zili kabotu. Ulalipeda kuli Jehova amoyo woonse alimwi ukakatila kunjiisyo ziluleme. Ulabamba nsiswa. Utambula beenzu, ulalipeda kugwasya bamwi alubo mwaabi.—Mil. 20:33-35.

¹⁶ Mulangizi weelede kuba ukonzya kuyiisya kabotu kuchitila kuti achite kabotu mumulimu wakwe. Kweendelana amajwi Pawulu ngaakalembela Tito, mulangizi weelede kuba “uukakatila kumajwi aasyomeka kujatikizya luzyibo lwakwe mukuyiisya, kutegwa acikonzye kukulwaizya bamwi anjiisyo mbotu alimwi akusinsa baabo ibakazya” (Tit. 1:9) Ulakonzya kwaambuuzyania abamwi, kupa bumboni, kuzunda kukazyania akubelesya Magwalo munzila iipa kuti bantu basyome. Mulangizi uyiisya kabotu muziindi zili kabotu amuziindi zyamapenzi. (2 Tim. 4:2) Ulakonzya kugwasya abo bachita zibi munzila ibombede akusungwaazya bazumbuuzya, kuti babe alusyomo lusimide. Kuyiisya munzila iimvwisisika ziindi zyoonse kutondeezya kuti uleelela kuba mulangizi.

¹⁷ Baalu beelede kusungwaala mumulimu wakukambawuka. Beelede kutobelezya chikozyano chaJesu, nkaambo wakali kubikka mulimu wakukambawuka mubusena bwakusaanguna. Jesu wakali kubabikkila maanu basikwiiya bakwe akubagwasya kuti babe bakambawusi basungu. (Mk. 1:38; Lk. 8:1) Kusungwaala kwabaalu mumulimu wakukambawuka nikuba kuti balaamilimu myiingi yakuchita, kulakonzya kusungwaazya bali mumbungano kuti babe basungu. Alubo, chiindi baalu nibayinkaamwi ampuli zyabo naa abamumbungano mumulimu wakukambawuka, ‘balasungwaazyania.’—Rom. 1:11, 12.

¹⁸ Zyeelelo eezi zilakonzya kubonekaanga nziyumu kuti mulangizi azizuzikizye. Nisimpe kuti taakwe mulangizi uukonzya kutobelezya malayilile aasumpukide aazwa muBbayibbele chakumanina, pesi mwaalu teelede kukachilwa kuzuzikizya zyeelelo eezi zyakuti bamumbungano bayeeye kuti tayeleli kuba mwaalu. Baalu bali abube busiyene. Alubo bamwi balakonzya kuchita kabotu muli zimwi mbazu bamwi mubatakonzyi. Pesi kuba abube busiyene kupa kuti kabunga kabaalu kayilanganie kabotu mbungano yaLeza.

¹⁹ Chiindi baalu bali mukabunga kabaalu nibalumbayizya umwi mukwesu kuti abe mwaalu, beelede kuyeeya majwi akaambwa amwaapostolo Pawulu akuti: “Ndaambila nyoonse ooko kuti mutayeeyi kuti mulayandika kapati kwiinda bwini mbomubede, pele kamuyeeya kabotu kweelana alusyomo umwi aumwi wanu ndwaakamupa Leza.” (Rom. 12:3) Baalu tabeelede kulisumpula pe. Chiindi nibalanga-langa umwi mukwesu kuti uleelela na kuba mwaalu, tabeelede kulibona ‘kabayindilide kululama.’ (Muk. 7:16) Kuziba zyeelelo eezi zyamuMagwalo kulakonzya kugwasya kabunga kabaalu chiindi nibalanga-langa umwi mukwesu kuti ulazizuzikizya na zyeelelo eezi. Kuziba kuti bantu tabamaninide, kuba amaboneno aali kabotu akutalisumpula, kuyoogwasya baalu kuti batondeezye kuti balazilemeka zyeelelo zyaJehova, akuti bayanda kuti mbungano igwasigwe chiindi nibalumbayizya umwi mukwesu kuti abe mwaalu. Beelede kukomba akukumbila kuzulwidwa amuuya uusalala chiindi nibalumbayizya mukwesu. Mulimu ooyu mupati, nkinkaako, chiindi nibawuchita beelede kuyeeya nchenjezyo yaPawulu yakuti: ‘Utanoofwambaani kubika muntu maanza.’—1 Tim. 5:21, 22.

MICHELO YAMUUYA

²⁰ Baalu batondeezya kuti bazulwidwa amuuya uusalala alimwi batondeezya michelo yayo mubuumi bwabo. Pawulu wakalemba michelo yamuuya iili musanu atune iswaanizya ‘luyandano, lukkomano, luumuno, kuba amoyo mulamfu, luzyalo, bubotu, lusyomo, kubomba moyo, kulilesya.’ (Gal. 5:22, 23) Nchilongezyo kuba abaalu bali boobo nkaambo bagwasya abo bali mumbungano kuti bakombe Leza kabajisini. Maponeno aabo azintu nzibachita zitondeezya kuti basalwa amuuya uusalala.—Mil. 20:28.

MBANTU BAJISINI

²¹ Kulayandikana kuti baalu babelekelaamwi kuchitila kuti kube kujatana mumbungano. Nikuba kuti bali abube busiyene amaboneno aasiyene, pesi bakkala kabajisini nkaambo balayilemeka mizeezo yawumwi awumwi. Balayitambula mizeezo yabamwi, kuti zyasalwa abamwi kazitatyoli milawu iili muBbayibbele. Kutambula mizeezo yabamwi kutondeezya kuti muntu uli “abusongo buzwa kujulu” buli mbuli ‘luumuno, akunyoneka.’ (Jak. 3:17, 18) Baalu tabeelede kulisumpula alimwi taakwe uyelede kulibona kali mupati kwiinda bamwi. Baalu batondeezya kuti babelekelaamwi aJehova ikuti kabajisini mukulangania mbungano.—1 Kor., chaand. 12; Kol. 2:19.

KUBELEKELA KUBA MWAALU

²² Baalumi basimide mubukombi beelede kubelekela kuba baalu. (1 Tim. 3:1) Nikuba boobo, kuba mwaalu kuyanda kulipeda. Kuba mwaalu kuswaanizya kulipeda kubelekela bakwesu akubalangania muzintu zyabukombi. Kuti muntu kayanda kuba mwaalu, weelede kuzuzikizya zyeelelo zijanika muMagwalo.

IKUTI BUUMI BWACHINCHA

²³ Mwaalu uubelekela Jehova chakusyomeka ulakonzya kuchiswa naa kulemana. Chimwi chiindi, ulakonzya kukachilwa kuchita milimu yakuba mwaalu akaambo kakuchembaala. Nikuba boobo, weelede kulemekwa mbuli mwaalu. Teelede kuleka kuba mwaalu akaambo kakuti tachikonzyi kuchita imwi milimu. Weelede kulemekwa alakwe mbuli mbubalemekwa baalu babeleka changuzu mukulangania butanga.

²⁴ Ikuti mukwesu wabona kuti zyiimo zyakwe tazichimuzumizyi kuti ayinkilile kunembo kali mwaalu, ulakonzya kuleka. (1 Pet. 5:2) Pesi weelede kulemekwa. Ulakonzya kuchita zyiingi mumbungano nikuba katachichiti milimu iichitwa abaalu.

MILIMU YABAALU MUMBUNGANO

²⁵ Baalu balaamilimu iisiyene-siyene mumbungano. Kuli mulangizi wakabunga kabaalu, mulembi, mulangizi wamulimu wakukambawuka, sikuchitisya Chiiyo chaNgaziyakulinda aMuswaangano waBuumi aMulimu Wesu. Alubo baalu babeleka kabali balangizi batubunga twabasikupupulula. Baalu aaba, tababikkilidwe chiindi chakuleka mukuli wabo. Pesi kuti umwi mukwesu walonga naa katachikonzyi kuchita milimu yakwe akaambo kakuchiswa naa katacheeleli kweendelana azyeelelo zili muMagwalo, kulakonzya kusalwa umwi mwaalu uutachite milimu yakwe. Mumbungano muli baalu bache, baalu balakonzya kuchita milimu myiingi kusikila nikutazoobe bamwi baalu.

²⁶ Mulangizi wakabunga kabaalu, ubeleka kali sichuuno mumiswaangano yakabunga kabaalu. Nikuba boobo, ulalibombya kwiinda mubelekaamwi abaalunyina mukulangania butanga bwaLeza. (Rom. 12:10; 1 Pet. 5:2, 3) Weelede kubamba zintu munzila iili kabotu akuzulwida kabotu.—Rom. 12:8.

²⁷ Mulembi, uchita mulimu wakubamba malekkodi aambungano, akubuzya baalu atala azimwi zintu zichitika mumbungano. Ikuti kakuyandikana, umwi mwaalu naa mubelesi uubelekela ulakonzya kumugwasya kuchita mulimu ooyu.

²⁸ Mulangizi wamulimu, ulangania mabambe alaatala amulimu wakukambawuka. Uchita mabambe aakuswaya kabunga kamwi mumweezi. Mumbungano muli tubunga tuche, kabunga akamwi ulakonzya kukaswaya tubili mumunyaka. Mukabunga nkaswayide, uchitisya muswaangano wamulimu, uzwaamwi abamukabunga aako akuswaya zyiiyo zyabo.

MULANGIZI WAKABUNGA

²⁹ Chimwi chilongezyo mumbungano nchakuba mulangizi wakabunga. Mulimu wakwe uswaanizya, (1) kubabikkila maanu muzintu zyabukombi bali mukabunga kamulimu wakukambawuka; (2) kugwasya bali mukabunga kuti basungwaale mumulimu wakukambawuka; (3) akugwasya babelesi babelekela bali mukabunga kuti babe azyeelelo ziyandikana mumbungano. Kabunga kabaalu nkako kasala mukwesu weelela kuchita milimu eeyi.

³⁰ Ikuti kachikonzeka, mulangizi wakabunga weelede kuti kali mwaalu nkaambo mukuli ooyu mupati. Mubelesi uubelekela ulakonzya kuuchita kusikila kuzoojanike mwaalu utazoowuchite. Mubelesi uubelekela, uuchita mulimu ooyu utegwa mubelesi wakabunga, nkaambo teemwaalu pe mumbungano. Pesi ubelekelaamwi abaalu.

³¹ Chimwi chintu chipati chichitwa amulangizi wakabunga, nkusungwaala mumulimu wakukambawuka. Kukambawuka chabusungu nkwachita kuyoosungwaazya bali mukabunga nkalangania. Mulangizi weelede kuchita mabambe aakukambawuka aakonzya kuchitwa amuntu woonse kuchitila kuti basikupupulula bagwasigwe. (Lk. 10:1-16) Mulangizi wakabunga weelede kubona kuti basikupupulula bapegwa busena bwakubeleka. Weelede kuchitisya muswaangano wamulimu akubuzya basikupupulula nkubeelede kubelekela. Kuti katawo, weelede kukumbila umwi mwaalu, naa mubelesi uubelekela. Ikuti kabatawo, mulangizi ulakonzya kukumbila umwi sikupupulula weelela kuti achitisye muswaangano wakukambawuka.

³² Mulangizi wakabunga weelede kulibambila akubuzya bali mukabunga nkalangania atala akuswaya kwamulangizi wamulimu wakukambawuka kuchitila kuti bazogwasikane. Bali mukabunga, balakonzya kugwasilizya kuti babuzigwa kakuchili chiindi.

³³ Tubunga twamulimu tatweelede kuba tupati loko. Eezi zigwasya mulangizi wakabunga kuti abazibe kabotu bali mukabunga nkalangania. Ulababikkila maanu boonse nkaambo mweembezi ulaaluyando. Ulabagwasya boonse kuti basungwaale mumulimu wakukambawuka akuti kabatola lubazu kumiswaangano yambungano. Alubo ugwasya bantu boonse kuti basime mubukombi. Ulakonzya kuswaya bachiswa naa bakataazikene. Ulakonzya kusungwaazya bamwi kuti babe azyeelelo ziyandikana kuchitila kuti bakonzye kugwasya mbungano. Chiindi chiingi, mulangizi ulangania bali mukabunga nkabelekela. Nikuba boobo, akaambo kakuti mwaalu alimwi mweembezi, ulababikkila maanu boonse bali mumbungano abayanda lugwasyo.—Mil. 20:17, 28.

³⁴ Umwi mulimu wamulangizi wakabunga kamulimu ngwakubweza malipoti amulimu wakukambawuka wabantu bali mukabunga nkalangania. Malipoti aaya apegwa mulembi. Basikupupulula balakonzya kugwasyania amulangizi wakabunga kwiinda mukumupa malipoti aabo chakufwambaana. Malipoti aabo balakonzya kwaapa mulangizi, naa kwawaala mukabbokesi kabikkilwa malipoti akukambawuka kali muNg’anda yaBwaami.

KKOMITI YAMULIMU YAMBUNGANO

³⁵ Kkomiti Yamulimu Yambungano ilangania milimu iisiyene-siyene. Iswaanizya mulangizi wakabunga kabaalu, mulembi amulangizi wamulimu wakukambawuka. Muchikozyano, bakkomiti eeyi mbabo bazumizya michado naa nkani yadilwe kuti zichitilwe muNg’anda yaBwaami alimwi mbabo babikka basikupupulula mutubunga twakukambawuka. Alubo, balanga-langa mafoomu abaabo bayanda kuba mapayona achiindi choonse naakuti akugwasilizya aamwi mafoomu. Kkomiti yamulimu ibelekelaamwi akabunga kabaalu.

³⁶ Wofesi yamutabi ipa malayilile kubakwesu aaba, kuli sikuchitisya Chiiyo chaNgaziyakulinda, kumulangizi waMuswaangano waBuumi Amulimu Wesu abamwi bali mukabunga kabaalu.

³⁷ Mumbungano imwi ayimwi, baalu bali mukabunga kabaalu bachita miswaangano kuti bazoowambuuzyanie atala aziyandikana zyambungano. Kuyungizya kumiswaangano njibachita nikuli mulangizi wabbazu, bachita miswaangano iimbi nikwayinda myeezi iitatu kuzwa mulangizi wabbazu naakaswayide. Nikuba boobo, baalu balakonzya kuchita muswaangano kufumbwa chiindi.

LIBOMBYE

³⁸ Nikuba kuti baalu mbantu batamaninide, pesi bamumbungano basungwaazigwa kuti kabalibombya kuli mbabo, nkaambo mabambe aaya azwa kuli Jehova. Bayoolyaambilila kuli nguwe akaambo kamilimu yabo. Bayiminina Jehova abweendelezi bwakwe. Lugwalo lwa BaHebrayo 13:17 lwaamba kuti: ‘Kamubaswiilila aabo basololela akati kanu alimwi kamulibombya, nkaambo balanganya ndinywe kabali baabo ibayoobuzyigwa makani, ikutegwa kabacita oobu cakukondwa ikutali cakuusa pe, nkaambo eeci inga camuletela mapenzi.’ Mbukunga Jehova ubelesya muuya uusalala kusala mukwesu, alubo ulawubelesya kugwisya mulangizi kuti katachitondeezyi michelo yamuuya alimwi katachiponi kweendelana azyeelelo zizwa muMagwalo.

³⁹ Tweelede kubalumba kaka bakwesu babeleka changuzu alimwi bali chikozyano chili kabotu mumbungano! Pawulu wakalembela mbungano yakuTesalonikka kuti: “Lino bakwesu tumulomba kuti, kamubalemeka aabo ibabeleka canguzu akati kanu alimwi ibamweendelezya mu Mwami akumupa lulayo; akubalemeka kapati muluyando akaambo kamulimo ngobacita” (1 Tes. 5:12,13) Kubeleka changuzu nkubachita baalu, kupa kuti tubotelwe mukukomba Leza. Mulugwalo lwakusaanguna Pawulu ndwakalembela Timoteyo, wakaamba zintu zyakeelede kuchitilwa baalu bamumbungano. Wakati: ‘Ibaalu beendelezya kabotu beelede kubonwa kuti baleelela kupegwa bulemu kapati, ikapati aabo ibabeleka canguzu mukwaambuula akuyiisya.’—1 Tim. 5:17.

IMWI MILIMU IICHITWA ABAALU MUMBUNGA

⁴⁰ Chimwi chiindi, kusalwa baalu kuti babeleke muTubunga Tuswaya Bachiswa. Bamwi babeleka muKkomiti Yakwaambuuzyania Abasilisi (Hospital Liaison Committees) kuti babasungwaazye kubelesya busilisi buyandwa aBakamboni baJehova kakutabelesegwi bulowa. Bamwi baalu babeleka kuyaka akubamba Maanda aBwaami, Maanda Amiswaangano Mipati naa kubeleka muKkomiti Yamuswaangano waBbooma. Bantu boonse mumbunga balayilumba milimu yoonse njibachita bakwesu aaba. Nisimpe kuti ‘tweelede kubalemeka bantu bali boobo.’—Flp. 2:29.

MULANGIZI WABBAZU

⁴¹ Kabunga Keendelezya kachita mabambe akusala baalu beelela kuti babeleke kabali balangizi bamabazu. Babuzigwa aWofesi yamutabi kuti kabaswaya mbungano zili mumabazu, tubili amunyaka. Alubo, baswaya mapayona aali mutubunga tuniini. Balalibambila nyendo zyabo akuzibya mbungano kakuchili chiindi kuchitila kuti boonse bazoogwasigwe akuswaya nkubachita.

⁴² Mulangizi wakabunga kabaalu uchita mabambe akuti mbungano izoogwasigwe akuswaya kwamulangizi wabbazu. (Rom. 1:11, 12) Chiindi mulangizi wakabunga kabaalu naziba atala abuzuba mbwasika mulangizi wabbazu amukayintu wakwe, ikuti kakwete, uchita mabambe aakuyanduula aakukkala azimwi ziyandikana kagwasyania abamwi bakwesu. Uba achoonzyo chakuti boonse mumbungano amulangizi wabbazu balaazi mabambe aayo.

⁴³ Mulangizi wabbazu ulaambuula amulangizi wakabunga kabaalu atala apulogilamu yamiswaangano yambungano, ayamulimu wakukambawuka. Eezi zilachitwa kweendelana amalayilile aazwa kumulangizi wabbazu akumalayilile ngatambula aazwa kuwofesi yamutabi. Bamumbungano boonse beelede kubuzigwa chiindi abusena buyoochitilwa miswaangano yambungano, muswaangano wamapayona, muswaangano wabaalu ababelesi babelekela abusena bwakuchitila muswaangano wamulimu wakukambawuka.

⁴⁴ Muli Bwabili, mulangizi wabbazu uyoolanga-langa maKkadi aaMbungano Abasikupupulula, malekkodi akunjila miswaangano, malekkodi aambungano aabusena bwakubelekela azyama-akkawunsi. Eezi ziyoomugwasya kuti azibe ziyandwa ambungano ambakonzya kugwasya aabo babamba malekkodi aaya. Mulangizi wakabunga kabaalu weelede kuba achoonzyo chakuti mulangizi wabbazu wajana malekkodi chakufwambaana.

⁴⁵ Naswayide mbungano, mulangizi wabbazu ulakubotelelwa kwaambuuzyania abakwesu abachizi bamumbungano, chimwi chiindi kumiswaangano yambungano, kukukambawuka, nibali kulya naa kufumbwa chiindi. Kuyungizya waawo, ulaba amuswaangano abaalu ababelesi babelekela kuchitila kuti aabilane ambabo malayilile aazwa muMagwalo akubasungwaazya, kuchitila kuti bakonzye kweembela butanga munzila iili kabotu. (Tus. 27:23; Mil. 20:26-32; 1 Tim. 4:11-16) Alubo, uba amuswaangano amapayona kuchitila kuti abasungwaazye mumulimu wabo akubagwasya atala abuyumu-yumu mbubaswaana mukukambawuka.

⁴⁶ Mviki naswayide, mulangizi wabbazu ulakonzya kugwasya, ikuti kakuli amwi makani akataazya mumbungano. Ikuti kaambo teekamana mumviki eeyo, ulakonzya kusungwaazya baalu abali munkani eeyo kuti bayanduulisisye Magwalo aakonzya kubagwasya munkani eeyo. Ikuti kakweelela kuzibisigwa mutabi, mulangizi wabbazu ulakonzya kulemba lipoti kumutabi atala ankani eeyo kagwasyania abaalu.

⁴⁷ Mulangizi wabbazu ulayinjila miswaangano yoonse yambungano chiindi naswayide mbungano. Miswaangano eeyi ilakonzya kuchincha kweendelana amalayilile aazwa kuwofesi yamutabi. Uyoopa nkani zisungwaazya, ziyiisya azisimya mbungano. Usungwaazya bali mumbungano kuti bayande Jehova, Jesu Kristu ambunga.

⁴⁸ Alubo, mulangizi wabbazu ulabasungwaazya basikupupulula kuti basungwaale mukukambawuka akubapa malayilile aakonzya kubagwasya. Bamwi mumbungano balakonzya kuchincha mabambe kuchitila kuti bajane chiindi chiingi chakukambawuka mumviki kwiinda mukuba mapayona aagwasilizya mumweezi mulangizi naswayide. Kufumbwa uyanda kukambawuka anguwe naa amukayintu wakwe, ulakonzya kulembesya. Mulangizi wabbazu naakuti mukayintu wakwe balakonzya kukugwasya kubantu mbuyiyaabo Bbayibbele naakuti kukuchita kubweedulula. Uyooyiya zyiingi kuti walipeda kubeleka changuzu mviki mulangizi naswayide mbungano yanu.—Tus. 27:17.

⁴⁹ Munyaka amunyaka, kuchitwa mabambe aamiswaangano yabbazu iibili. Mulangizi wabbazu nguwe uubamba miswaangano eeyi. Mulangizi wabbazu usala mulangizi wamuswaangano amuntu uugwasilizya mulangizi wamuswaangano. Beelede kubelekaamwi anguwe mukulanga-langa zitachitwe aamuswaangano. Eezi ziyoogwasya mulangizi wabbazu kuti abikkile maanu kupulogilamu yamuswaangano ooyo. Alubo usala bamwi baalumi beelela kuti babeleke mumadipatimenti aasiyene-siyene. Alubo usala umwi mukwesu kuti alange-lange mbuyabelesegwa mali mumuswaangano umwi awumwi. Umwi muswaangano wabbazu uba aamwiiminini wawofesi yamutabi. Amwi mabazu alaanzaanisigwa akaambo kamusinzo naakuti akaambo kabusena buniini bwakunjilila muswaangano.

⁵⁰ Mweezi amweezi, mulangizi wabbazu utumizya lipoti yakwe yamulimu wakukambawuka kuwofesi yamutabi. Ikuti zimwi mbungano teezyamupa zimwi ziyandikana mbuli mali yakugadya, chakulya, aakukkala azimwi ziyandikana mumulimu wakwe, ulalembela kuwofesi yamutabi. Balangizi bamabazu balaachonzyo chakuti, ikuti babikka Bwaami bwaJehova mubusena bwakusaanguna mubuumi bwabo, zimwi nzibayanda bayoozijana mbuli mbaakasyomezya Jesu. (Lk. 12:31) Bamumbungano beelede kutondeezya kuti balabotelwa abaalu aaba babeleka changuzu kwiinda mukubatamba mumaandaabo.—3 Joh. 5-8.

KKOMITI YAMUTABI

⁵¹ Munyika yoonse, mutabi umwi awumwi waBakamboni baJehova, weendelezegwa aKkomiti yaMutabi ipangwa abaalu batatu basimide mubukombi naakuti biindaawo. Kkomiti eeyi ibeleka kulangania mulimu uuchitwa munyika eeyo naakuti mulimu uuchitwa muli zimwi nyika. Umwi uuli mukabunga kaKkomiti yaMutabi, ubeleka kali mulangizi waKkomiti yaMutabi.

⁵² Kkomiti Yamutabi ilangania makani alaatala ambungano zyoonse zilanganisigwa amutabi ooyo. Kkomiti eeyi ilangania mulimu wakukambawuka makani mabotu aaBwaami aziyandwa ambungano amabazu zili mubusena mwiibelekela. Alubo, Kkomiti Yamutabi ilangania mulimu uuchitwa amamishinali, mapayona aayandikana, achiindi choonse aakugwasilizya. Chiindi chamiswaangano mipati, kkomiti eeyi ichita mabambe asiyene-siyene akupa bantu milimu iisiyene-siyene kuchitila kuti, ‘zintu zyoonse zicitwe kabotu-kabotu alimwi kweelana abubambe.’—1 Kor. 14:40.

⁵³ Muli zimwi nyika, kuli Kkomiti Yanyika yeendelezegwa aKkomiti Yamutabi iili kuli imwi nyika. Nkinkaako, Kkomiti Yanyika ilakonzya kulangania mulimu uuchitwa munyika mwiibelekela. Kkomiti Yanyika ilangania makani alaatala azyaBbeteli, ziyandikana mumawofesi, zimwi zitumizigwa kumutabi, malipoti, amulimu wakukambawuka uuchitwa munyika eeyo. Kkomiti Yanyika ibelekaamwi aKkomiti Yamutabi kukusumpula mulimu waBwaami uuchitwa munyika eeyo.

⁵⁴ Bakwesu babeleka muKkomiti Yamutabi amuKkomiti Yanyika basalwa aKabunga Keendelezya.

BAYIMININI BAMAWOFESI MAPATI

⁵⁵ Chiindi achiindi, bamuKabunga Keendelezya bachita mabambe aakuti kube bakwesu beelela bataswaye mitabi iisiyene-siyene munyika yoonse. Mukwesu uuchita mulimu ooyu utegwa mwiiminini wamawofesi mapati. Mulimu wakwe uswaanizya kusungwaazya mpuli yaaBbeteli akugwasya baKkomiti yaMutabi kuti kabali abuyumu-yumu naakuti kabali amibuzyo aatala amulimu wakukambawuka akuchita basikwiiya. Ikuti kakuyandikana, mukwesu ooyu ulakonzya kuchita muswaangano abamwi balangizi bamabazu amamishinali babelekela munyika mwaswayide. Ulakonzya kwaambuulaabo atala abuyumu-yumu mbubaswaana akubasungwaazya atala amulimu ngubachita wakukambawuka makani alaatala aBwaami awakuchita basikwiiya.

⁵⁶ Mwiiminini wamawofesi mapati uyandisya kuziba atala azyakachitwa mumulimu wakukambawuka makani alaatala aBwaami azimwi zichitwa mumbungano. Ikuti kalaachiindi, ulakonzya kuswaya mawofesi aabusanduluzi aali kule. Alubo chiindi naswayide umwi mutabi, ulakonzya kweezya amanguzu oonse kuti achite mulimu wakukambawuka makani alaatala aBwaami.

KWEENDELEZYA CHALUYANDO

⁵⁷ Tujana zintu zyiingi loko zitugwasya kuzwa kubakwesu bachiKristu babeleka changuzu mukutulangania chaluyando. Tuyootondeezya kuti tulalibombya kuli Silutwe wambungano Jesu Kristu, ikuti twayinkilila kunembo kubalemeka balangizi bapedwe mulimu wakweembela butanga. (1 Kor. 16:15-18; Ef. 1:22, 23) Eezi zipa kuti muuya waLeza uzulwide mumbungano zyoonse akuti Jwi lyaLeza lizulwide mulimu uuchitwa munyika yoonse.—Int. 119:105.