Mbaabambidwe Masena Ngitukombela

BAKOMBI baJehova bakasimpe basungwaazigwa kuti kababunganaamwi kuchitila kuti bajane malayilile akuti basungwaazyanie. (Heb. 10:23-25) Busena bwakusaanguna maIsrayeli mbubakali kukombela Leza, bwakali kutegwa “tente lyakukombela” naakuti “itente lyakuswaanganina.” (Kul. 39:32, 40) Mukuya kwachiindi, Solomoni mwana waDavida wakazooyaka ng’anda naakuti tempele lyaLeza. (1 Bam. 9:3) Nilyakanyonyoonwa tempele mumunyaka wa607 B.C.E., maJuda akali kubunganina mumaanda aategwa masinagogi kuti bakombe Leza. Mukuya kwachiindi, tempele lyakazooyakululwa alubo lyakazooba busena bwabukombi bwakasimpe. Jesu wakali kuyiisya mumasinagogi amutempele. (Lk. 4:16; Joh. 18:20) Alubo, Jesu wakachita muswaangano aachilundu.—Mt. 5:1–7:29.

² Naakafwa Jesu, maKristu akali kubunganina mumasena alaantanganana amumaanda abamwi kuchitila kuti babale Magwalo akuliswaanizya abakombinyina. (Mil. 19: 8, 9; Rom. 16:3, 5; Kol. 4:15; Flm. 2) Chimwi chiindi, maKristu aamumwaanda wamunyaka wakusaanguna akeelede kubunganina mumasena asisinkene kuchitila kuti basikubapenzya batababoni. Nichoonzyo kuti bakombi baLeza basyomeka bachiindi bakali kukuyandisya kubunganaamwi kuchitila kuti ‘bayiisigwe aJehova.’—Is. 54:13.

³ Mazubaano, miswaangano yamaKristu ichitilwa mumasena alaantanganana amumaanda abamwi. Chiindi chiingi, maanda aabamwi abelesegwa kuchitila muswaangano wamulimu wakukambawuka. Bakwesu bazumina kuti muswaangano wamulimu wakukambawuka uchitilwe mumaandaabo balabotelwa. Bakwesu bachita oobo nga basimisigwa mubukombi.

MAANDA ABWAAMI

⁴ Busena buchitilwa miswaangano yaBakamboni baJehova butegwa niNg’anda yaBwaami. Chiindi chiingi, kuulwa busena akuyaka Ng’anda yaBwaami mpya naakuti kubambulula imwi ng’anda iiliwo kale. Chimwi chiindi mbungano zyiingi zilakonzya kubelesya Ng’anda yaBwaami iimwi. Eezi zipa kuti kutabelesegwi mali nyiingi akuti ng’anda eeyo ibelesegwe kabotu. Mumasena amwi, bakwesu babelesya maanda aakulenta. Kuti kwayakwa Ng’anda yaBwaami mpya naakuti kiiyanda kubambululwa zintu zyiingi, kuleelela kuti kuchitwe pulogilamu yakupeda Ng’anda yaBwaami. Pesi takuyandiki kuti kuchitwe pulogilamu yakupeda Ng’anda yaBwaami kuti yabambululwa zintu ziche.

⁵ Ng’anda yaBwaami tayiyandiki kuti ibe ng’anda mpati loko, iigambya. Nikuba kuti Maanda aaBwaami alasiyana, pesi woonse abelesegwa kuchita chintu chomwe. (Mil. 17:24) Kweendelana abusena, yeelede kuba busena buli kabotu bwakuchitila miswaangano yachiKristu.

⁶ Bakamboni baJehova boonse beelede kubelekelaamwi mukulangania akubambulula Ng’anda yaBwaami njibabelesya. Taakwe nikweendelezegwa ndido yamali pe. Pesi, kuli bbokesi lyakusanga zipo aawo bantu boonse basika kumiswaangano yambungano mubakonzya kusanga mali ibelesegwa kulangania Ng’anda yaBwaami. Basanga kazizwa aansi amoyo.—2 Kor. 9:7.

⁷ Boonse mumbungano balakubotelelwa kusanga mali akulipeda kusalazya Ng’anda yaBwaami. Mwaalu naakuti mubelesi uubelelekela ulakonzya kupegwa mulimu wakuchita mabambe aakusalazya Ng’anda yaBwaami. Chiindi chiingi, Ng’anda yaBwaami isalazigwa atubunga twamulimu wakukambawuka katuzulwida amulangizi wakabunga naakuti sikumugwasilizya. Ng’anda yaBwaami yeelede kutondeezya kuti mbusena bulemeka Jehova ambunga yakwe kwiinda mukukkala kiiboneka kabotu chiindi choonse.

⁸ Ikuti Ng’anda yaBwaami kayibelesegwa ambungano zyiingi, baalu bambungano eezyo bayoopanga Kkomiti Ilangania Ng’anda yaBwaami, iyoolangania kubelesegwa kwaNg’anda yaBwaami. Tubunga twabaalu tusala umwi mukwesu kuti abe mulangizi wakkomiti. Kayibelekaamwi atubunga twabaalu, Kkomiti Ilangania Ng’anda yaBwaami yeelede kubona kuti Ng’anda yaBwaami ilasalazigwa, ilikubelesegwa kabotu akuti zyoonse ziyandikana mpuzili. Nkinkaako, mbungano zibelesya Ng’anda yaBwaami iimwi zyeelede kubelekelaamwi.

⁹ Mbungano zibelesya Ng’anda yaBwaami iimwi zilakonzya kunoochinchana kunjila miswaangano. Baalu bayoobamba pulogilamu eeyi kababikkilana maanu akutondeezyania luyando lwabunyina. (Flp. 2:2-4; 1 Pet. 3:8) Taakwe mbungano yeelede kubuzya zimwi mbungano mbuzyeelede kubelesya Ng’anda yaBwaami. Chiindi mulangizi wabbazu naswaya imwi mbungano, zimwi mbungano zibelesya Ng’anda yaBwaami zilakonzya kuchincha chiindi mumviki eeyo.

¹⁰ Ng’anda yaBwaami ilakonzya kuchitilwa nkani yadilwe naakuti yamuchado, ikuti zyazumizigwa aKkomiti Yamulimu Yambungano. Baalu aaba balalanga-langa makani aaya kababelesya malayilile aazwa kuwofesi yamutabi.

¹¹ Bantu bazumizigwa kuti babelesye Ng’anda yaBwaami beelede kulijata munzila itondeezya kuti maKristu akasimpe. Taakwe chintu chichitwa kuNg’anda yaBwaami cheelede kunyongania bamwi naakuti chisampawula zina lyaJehova ambungano. (Flp. 2:14, 15) Ng’anda yaBwaami ilakonzya kubelesegwa kuchitila zikolo zyambunga zisiyene-siyene mbuli Chikolo Chamulimu waBwaami aChikolo chamaPayona, kabatobelezya malayilile aazwa kuwofesi yamutabi.

¹² Bantu boonse mumbungano beelede kutondeezya kuti balabulemeka busena mbubakombela. Nsamino yabo ambubalijata zyeelede kutondeezya kuti balabulemeka busena bwakukombela Jehova. (Muk. 5:1; 1 Tim. 2:9, 10) Kutobelezya malayilile aaya chiindi nitubelesya Ng’anda yaBwaami, kutondeezya kuti tulayilemeka miswaangano yesu yachiKristu.

¹³ Tweelede kutondeezya kuti tulibambikene chiindi chamiswaangano. Bana beelede kukkalaamwi abazyali babo. Bazyali balaabana baniini beelede kukkala mubusena mubatakonzyi kunyongania bamwi chiindi nibayanda kuzwa aanze kuti bakabawumuzye naakuti kuyoobachitila zimwi ziyandikana.

¹⁴ Bamwi bakwesu beelela balakonzya kuba balindi chiindi chamiswaangano kuNg’anda yaBwaami. Beelede kuba bantu basangalizya alubo balaamaboneno alikabotu. Mulimu ngubachita uswaanizya kujuzya beenzu, kubasangalizya, kutondeezya banonoka busena bwakukkala, kubala bantu balikumuswaangano akubona kuti mawindo alijulidwe akulayita mafeni. Ikuti kakuyandikana, balindi bayoobuzya bazyali kuti balange bana babo kuchitila kuti batasaanini muNg’anda yaBwaami naakuti aapulatifomu, miswaangano kiitanasaanguna aniyamana. Mulindi ulakonzya kubuzya muzyali wamwana uukataazya munzila yabupampu kuti amutole anze kuchitila kuti mwanaakwe atasabili baswiilizi. Mulimu ngubachita balindi upa kuti bantu boonse babotelwe amiswaangano. Kusungwaazigwa kuti balindi babe baalu ababelesi babelekela.

KUYAKA MAANDA AABWAAMI

¹⁵ Amwi maKristu aamumwaanda wamunyaka wakusaanguna akali notede kwiinda amwi, nchichicho mwaapostolo Pawulu nchaakababuzya kuti: “Zintu ziindilide nzyomujisi lino zizulizye kubulizya kwabo, ikutegwa baakuba aziindilide abalo bakazulizye kubulizya kwanu.” (2 Kor. 8:14) Nikuba mazubaano, mbunga iyanda kuti kube ‘kweelana.’ Mali iisangwa ambungano zili munyika yoonse ilaswaanizigwa antoomwe kuchitila kuti ikabelesegwe kukuyaka akubambulula Maanda aaBwaami. Mbunga yaBakamboni baJehova ambungano zyoonse zigwasigwa amabambe aaya zilabalumba bakwesu bali munyika yoonse akaambo kakusanga nkubachita.

¹⁶ Kweendelana abusena, wofesi yamutabi njiyo iisala mbungano kuti kazibelesya Ng’anda yaBwaami. Wofesi yamutabi njiyo iisala kuyooyakwa Ng’anda yaBwaami akuti ndiilili niyooyakwa alubo njiyo iisala kuti njiili yeelede kubambululwa. Ikuti kwachitika mapenzi aalichitikila, kuchitwa mabambe akuyakulula Maanda aBwaami akadilika amaanda abakwesu.

¹⁷ Wofesi yamutabi njiyo yambuuzyania abasikulipeda kuyaka kuchitila kuti ibagwasye kujana busena bwakuyakila, kubamba pulani yaNg’anda yaBwaami, mapepa aakuzumizya kuyaka, kuyaka azintu ziyanda kubambululwa. Kuyandikana basikulipeda biingi akaambo kakuti kuli Maanda aaBwaami miingi ayanda kuyakwa. Basikupupulula bakabbabbatizigwa balaachiyandisyo chakugwasilizya balakonzya kuzuzikizya mafoomu aabo akupa baKkomiti Yamulimu Yambungano. Nikuba basikupupulula batanabbabbatizigwa balakonzya kugwasilizya mukuyaka naakuti mukubambulula Ng’anda yaBwaami.

MAANDA AAKUCHITILA MISWAANGANO MIPATI

¹⁸ Mumwaanda wamunyaka wakusaanguna, maKristu akali kubungana mutubunga. Pesi, chimwi chiindi bakali kubungana kabali ‘biingi.’ (Mil. 11:26) Mazubaano, babelesi baJehova bachita miswaangano mipati yamabazu ayabbooma. Chimwi chiindi kulakonzya kubelesegwa masena aabbadalelwa pesi kuti kaatawo, kulakonzya kuyakwa busena bwakukombela butegwa Ng’anda Yakuchitila Miswaangano Mipati.

¹⁹ Chimwi chiindi, kuulwa ng’anda, akuyibambulula kuti ibe Ng’anda Yakuchitila Miswaangano Mipati. Pesi, chiindi chiingi busena bwakuyakila Ng’anda Yakuchitila Miswaangano Mipati buulwa biya. Maanda aaya alasiyana mubupati kweendelana abusena. Wofesi yamutabi isaanguna kulanga-langa mali iiyandika kayitanasala kuti maanda aali boobu awulwe naakuti abambululwe.

²⁰ Wofesi yamutabi isala bakwesu kuti balanganie akubambulula Maanda Aakuchitila Miswaangano Mipati. Kuli mabambe akuti mabazu kaasalazya akubambulula zintu ziyandikana mubusena oobo chiindi choonse. Kusalazya ooku kuchitwa tubili mumunyaka. Bakwesu balakonzya kulipeda kubeleka mulimu ooyo. Alubo, mbungano zisungwaazigwa kuti kazibeleka amoyo woonse kukugwasilizya mabambe aaya aakusalazya.—Int. 110:3; Malk. 1:10.

²¹ Chimwi chiindi Ng’anda Yakuchitila Miswaangano Mipati ilakonzya kubelesegwa kuchita zimwi zikolo akuchita miswaangano yabalangizi bamabazu. Ng’anda Yakuchitila Miswaangano Mipati mbusena bwakukombela mbuli kubede Ng’anda yaBwaami. Chiindi nituli muNg’anda Yakuchitila Miswaangano Mipati, tweelede kuzwaata akulijata munzila yabulemu mbuli mbutuchita ambutuzwaata chiindi nituli kuNg’anda yaBwaami.

²² Mumazubaano aakumamanino, bantu biingi bapya balikuza mumbunga yaLeza. Eezi zitondeezya kuti Jehova ulikulongezya mulimu ooyu. (Is. 60:8, 10, 11, 22) Nkinkaako, tweelede kugwasilizya mukubamba akusalazya masena ngitukombela. Kuchita oobo, kutondeezya kuti tulaalemeka maanda aaya ngitukombela nkaambo atugwasya kuti katusungwaazyania, mbukunga buzuba bwaJehova bwaba afwiifwi.