Leza Ngwani?

1, 2. Njiili mibuzyo iibuzigwa loko abantu?

BANA babuzya mibuzyo myiingi loko. Ulakonzya kubapandulwida, pesi chiindi chiingi balabuzya kuti, ‘Nkaamboonzi?’ Nikuba kuti uleezya kubapa nsandulo, balabuzya lubo kuti, ‘Pesi nkaamboonzi?’

² Nikuba kuti tuli bapati naa tuli baniini, toonse tulaa mibuzyo. Tulakonzya kuba amibuzyo atala anzitutalye, nzitutazwaate naa nzitutakawule. Tulakonzya kuba amibuzyo iiyandikana iilaatala abuumi bwajuunza. Pesi kuti katutazijani nsandulo nzimvwisisika zyamibuzyo eeyi, tulakonzya kuleka kuziyanduula.

3. Nkaamboonzi bantu biingi nibayeeya kuti tabakonzyi pe kujana nsandulo zyamibuzyo iiyandikana?

³ IBbayibbele lilaazyo na nsandulo zyamibuzyo iiyandikana njitubuzya? Bamwi bantu bayeeya oobo, pesi bayeeya kuti iBbayibbele talimvwisisiki pe. Bayeeya kuti mbayiisi naa bapati bazikombelo balaansandulo. Bamwi balaansoni naa bweeme kuzumina kuti taakwe nchiibazi. Ani we uyeeyaanzi?

4, 5. Mibuzyoonzi iiyandikana njulaayo? Nkaamboonzi nweelede kwiinkilila kunembo kuyanduula nsandulo?

⁴ Nichoonzyo kuti ulaziyanda nsandulo zyamibuzyo mbuli yakuti: Ndiponenaanzi? Niinzi chitakachitike kuli ndime ndazoofwa? Leza uli biyeni? Muyiisi uuzibikene Jesu, wakati: “Amukumbile, mulapegwa. Amuyandaule, mulajana. Amukonkomone, mulajulilwa.” (Matayo 7:7) Utalengwaani pe kusikila uzijane nsandulo nzukonzya kusyoma.

⁵ Nisimpe, ikuti ‘wiinkilila kunembo kuyanduula,’ nsandulo ulazijana muBbayibbele. (Tusimpi 2:1-5) Insandulo eezi tazikataazyi pe kuzimvwisisisya. Nzulikwiiya zilakupa kubotelwa mubuumi alimwi akubaa makanze mubuumi bwajuunza. Kwalino atwaambuule atala amubuzyo wakataazya bantu biingi.

LEZA ULAANDABA NA ANDISWE NAA KUTI NGUSILUNYA?

6. Nkaamboonzi bantu biingi nibayeeya kuti Leza takwe ndaba akufwaba kwabo?

⁶ Bantu biingi bayeeya kuti Leza takwe ndaba andiswe. Bayeeya kuti kaansinga Leza ulalangania, nikunga nyika ili kabotu. Munyika tubona nkondo, kusulayikana, amachise aali koonse-koonse. Bantu balachiswa, balafwaba, alimwi balafwa. Bamwi nga balibuzya kuti, ‘Ikuti Leza kalaandaba andiswe, nkaamboonzi natalesyi kufwaba koonse ooku?’

7. (a) Munzilaanzi bayiisi bazikombelo mubayiisya bantu kuti Leza ulaalunya? (b) Nkaamboonzi nitusinizya kuti Leza tali nguwe weelede kusolwa kuzintu zibi zichitika?

⁷ Bayiisi bazikombelo chimwi chiindi bapa kuti bantu basyome kuti Leza ulaalunya. Ikuti kwachitika chintu chibi, baamba kuti nkuyanda kwaLeza. Baamba kuti wali kuyanda kuti zichitike. Do nkabaamba oobu, anga balokusola Leza. Pesi iBbayibbele liyiisya kuti Leza taakwe nali kasensa kabubi. Lugwalo lwaJakobo 1:13 lutwaambila kuti Leza tasunki muntu pe azintu zibi. Lwaamba kuti: “Na muntu watepaulwa, ataambi kuti, ‘Ndatepaulwa kuli-Leza,’ nkaambo Leza tatepauliki kucibi, alimwi walo mwini tatepauli muntu pe.” Eezi zyaamba kuti nikuba kuti Leza talesyi zintu zibi kuti kazichitika, pesi taakwe nachita kuti zichitike. (Bala Jobu 34:10-12.) Atubelesye chikozyano.

8, 9. Nkaamboonzi nikuli kubisya kusola Leza akaambo kamapenzi eesu? Pa chikozyano.

⁸ Yeeyela mulombe uukkala abazyali bakwe. Wisi umuyanda loko mulombe ooyu, alimwi wakamuyiisya mbwanga ulakonzya kusala kabotu. Mpawo mulombe ooyu wakapapila wisi akutalika kuzwaa ng’anda. Wakachita zintu zibi, akunjila mumapenzi. Kujana twapa wisi na mulandu kuli zyakachitika akaambo kakuti taakamukasya pe kuzwa aang’anda? Peepe! (Luka 15:11-13) Mbuli ndeende ooyu, Leza teewakakasya bantu nobakasala kumupapila akuchita zintu zibi. Aboobo, kuti kwachitika chintu chibi tweelede kuziba kuti teensi nguwe wapa kuti zichitike. Nga kwaba kubisya kusola Leza.

⁹ Kuli kaambo kabotu loko Leza nchalekelede zintu zibi kuti kazichitika. Muchaandano 11, uyooyiiya zyaamba Bbayibbele atala amakani aaya. Pesi ulakonzya kubaa choonzyo kuti Leza ulatuyanda akuti tayelede kusolwa akaambo kamapenzi eesu. Nguwe alikke uunga ulaamaninsya.​—Isaya 33:2.

10. Nkaamboonzi nitulaa choonzyo chakuti Leza uyoobambulula zyoonse zyakanyonyoonwa abantu batali kabotu?

¹⁰ Leza ulasalala. (Isaya 6:3) Zyoonse nzyachita zilasalala alimwi zili kabotu. Aboobo tulakonzya kumusyoma. Pesi bantu tabali oobo pe. Chimwi chiindi ngabachita zintu zibi. Nikuba mweendelezi uusyomeka takwe nguzu zyakubambulula zyoonse zyakanyonyoonwa abantu batali kabotu. Taakwe ulaanguzu zikonzya kweelanisigwa azyaLeza. Ulakonzya alimwi uyoobambulula zyoonse zyakanyonyoonwa abantu batali kabotu. Uyoogwisya bubi boonse kukabe kutamani.​—Bala Intembauzyo 37:9-11.

LEZA ULIMVWA BIYENI ATALA ABANTU BAFWABA?

11. Leza umvwa biyeni atala akufwaba kwako?

¹¹ Leza ulimvwa biyeni chiindi nabona zili kuchitika munyika alimwi anzuli kuswaanana aazyo? IBbayibbele lituyiisya kuti Leza “ulayandisya bululami.” (Intembauzyo 37:28) Ulaandaba loko atala azintu zili kabotu azitali kabotu. Ulabijilwa nabona bantu kabafwaba. IBbayibbele lyaamba kuti “wakapenga mumoyo wakwe” chiindi naakabona kuvula kwabubi munyika. (Matalikilo 6:5, 6) Leza tanachincha pe. (Malaki 3:6) IBbayibbele lyaamba kuti Leza chachoonzyo ulaandaba atala ambulimvwa.​—Bala 1 Petro 5:7.

12, 13. (a) Nkaamboonzi nitubayanda alimwi akubalangania bamwi, alimwi tulimvwa biyeni atala akufwaba kuli munyika? (b) Nkaamboonzi nitulaa choonzyo kuti Leza uyookugwisya kufwaba akutalulamisya koonse?

¹² IBbayibbele lilayindulula kalyaamba kuti wakatulenga muchikozyano chakwe. (Matalikilo 1:26) Eezi zyaamba kuti Leza wakatulenga katulaa bube bubotu mbwalaabo. Aboobo, ikuti kumvwa kuchiswa moyo chiindi nubona bantu batakwe mulandu kabafwaba, kweelede kuti Leza ukumvwa zyiindilide nababona! Tuzizi biyeni eezi?

¹³ IBbayibbele lituyiisya kuti “Leza nduyando.” (1 Johane 4:16) Zyoonse nzyachita Leza nzyaluyando. Tulayanda nkaambo Leza nduyando. Yeeya atala achechi: Kaansinga walaanguzu, wali kunookugwisya na kufwaba akutalulamisya kuli munyika? Nisimpe wali kunoochita oobo, nkaambo kakuti ulabayanda bantu. Kutegwani atala aLeza? Ulaamanguzu, alimwi ulatuyanda, uyookugwisya koonse kufwaba akutalulamisya. Ulakonzya kuba achoonzyo kuti zyoonse zisyomezyo zyaambwa kumatalikilo aabbuku eeli ziyoozuzikizigwa! Pesi kuti uzisyome zisyomezyo eezi, weelede kuziba zyiingi atala aLeza.

LEZA UYANDA KUTI UMUZIBE

14. Izina lyaLeza ngwani, alimwi tuzi biyeni kuti tweelede kulibelesya?

¹⁴ Ikuti kuyanda kuba mweenzinyina wawumwi, niinzi nchusaanguna kumubuzya? Ndizina lyako. Leza ulaalyo na zina? Zikombelo zyiingi zyaamba kuti zina lyakwe nguLeza naa Mwaami, pesi aaya teensi mazina pe. Mazina aakulemeka, mbuli kuti “mwaami” naa “mweendelezi.” Leza wakatuyiisya kuti zina lyakwe nguJehova. Intembauzyo 83:18 yaamba kuti: “Bazibe kuti nduwe olike oojisi izina lya-Jehova, Nduwe Mupatikampatila atala anyika yoonse.” Balembi baBbayibbele bakabelesya zina lyaLeza kwaziindi zibalilwa kuzyuulu. Jehova uyanda kuti umuzibe alimwi ubelesye zina lyakwe. Ukubuzya zina lyakwe kuchitila kuti ube mweenzinyina.

15. Izina lyakuti Jehova lyaambaanzi?

¹⁵ Zina lyaLeza, lyakuti Jehova lyaamba zyiingi. Lyaamba kuti Leza ulakonzya kuzuzikizya kufumbwa chisyomezyo nchachita alimwi ulazuzikizya makanze aakwe. Taakwe chimukachizya pe. nguJehova luzutu uulalyo zina eeli.a

16, 17. Aambaanzi mabala aakulemeka aakuti (a) “Singuzuzyoonse”? (b) “Mwami walyoonse”? (c) “Mulengi”?

¹⁶ Mbuli mbutwabala, muli Intembauzyo 83:18 itii atala aJehova: ‘Nduwe olikke Mupatikampatila.’ Alubo Ciyubunuzyo 15:3 yaamba kuti: “Milimo yako mipati alimwi ilagambya, Jehova Leza, Singuzuzyoonse. Inzila zyako zililuleme alimwi nzyamasimpe, O Mwami walyoonse alyoonse.” (NW) Chaambaanzi kuti “Singuzuzyoonse”? Chaamba kuti Jehova nguwe ulaamanguzu miingi kwiinda zintu zyoonse zyakalengwa. Alubo izina lyakuti “Mwami walyoonse” lyaamba kuti wakaliwo kuzwa chiindi. Ibbuku lyaIntembauzyo 90:2 lipandulula kuti wakaliwo kuzwa lili alili. Tazigambyi na eezi!

¹⁷ Jehova alikke ngonguwe Mulengi. Ibbuku lyaCiyubunuzyo 4:11 lyaamba kuti: ‘Nduwe weelede, O Mwami [Jehova], kutambula bulemu alulemeko anguzu, nkaambo nduwe wakalenga zintu zyoonse, nkaambo kabukanze bwako nkizibeda, ankizyakalengelwa.’ Nichoonzyo ibangelo bali kujulu, inyenyeezi zili mumajulu, michelo iili muminsamu alimwi answi zili mulwizi​—Jehova ngonguwe wakazilenga zyoonse nzyukonzya kuyeeya!

ZILACITA NA KUTI UBE MWEENZINYINA WAJEHOVA?

18. Nkaamboonzi bamwi bantu nibayeeyela kuti tachikonzyeki pe kuba beenzinyina baLeza? IBbayibbele lityeni atalaa makani aaya?

¹⁸ Bamwi nibayiiya atalaa bube bwaJehova bugambya, nga bayoowa akuyeeya kuti, ‘Leza ulaamanguzu alimwi mupati alimwi ulikule loko, nkaamboonzi nchayelede kundilangania?’ Leza uyanda kuti tulimvwe oobo na? Peepe. Jehova uyanda kuti abe afwiifwi andiswe. IBbayibbele lyaamba kuti Leza “talikule kuluumwi umwi wesu.” (Incito 17:27) Leza uyanda kuti uswene aafwiifwi anguwe. Usyomezya kuti “alakwe ulamuswenena.”​—Jakobo 4:8.

19. (a) Kujana wachita biyeni kuti ube mweenzinyina waLeza? (b) Mbubeenzi bubotu Jehova mbwalaabo mbuyandisya loko?

¹⁹ Kujana wachita biyeni kuti ube mweenzinyina waLeza? Jesu wakati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Ikuti wiinkilile anembo kulokwiiya, ulasika mpumuziba Jehova aJesu. Kuti wachitoobo uyoojana buumi butamani. Muchikozyano twayiiya kale kuti “Leza nduyando.” (1 Johane 4:16) Pesi ulabumwi bube bubotu. IBbayibbele litubuzya kuti Jehova ‘ngusiluzyalo asibuuya utafwambani kukalala, uzwide luse akasimpe.’ (Kulonga 34:6) Jehova “mubotu ulafwamba kujatila.” (Intembauzyo 86:5) Leza ulakkazika moyo alimwi ulasyomeka. (2 Petro 3:9; Ciyubunuzyo 15:4) Uyooyiiya ziingi atalaa bube bwakwe bubotu mbuli mbuya bubala atalaa nguwe muBbayibbele.

20-22. (a) Kujana twabaa fwiifwi biyeni aLeza ngututaboni? (b) Niinzi nchweelede kuchita aawo bamwi nibakulesya kwiiya Bbayibbele?

²⁰ Kujana wabaafwiifwi biyeni aLeza kakuli tumuboni pe? (Johane 1:18; 4:24; 1 Timoteo 1:17) Aawo nubala atala aJehova muBbayibbele, umuziba mbuli Muntu wachoonzyo. (Intembauzyo 27:4; BaRoma 1:20) Mbuya bwiiya zyiingi atala aJehova, uyoomuyandisya loko alimwi uyoolimvwa kuli aafwiifwi anguwe.

²¹ Uyoomvwisisisya kuti Jehova nguNdeende wesu. (Matayo 6:9) Wakatupa buumi, alimwi uyanda kuti tube abuumi bubotezya loko. Mbumbubo alakwe ndeende ulaaluyando mbwayanda kuti bana bakwe kababotelwa mubuumi. (Intembauzyo 36:9) Nichoonzyo, iBbayibbele liyiisya kuti ulakonzya kuba mweenzinyina waJehova. (Jakobo 2:23) Yeeya kuti, Jehova mulengi wazintu zyoonse, uyanda kuti ube mweenzinyina!

²² Bamwi bantu nga bayanda kuti uleke kwiiya Bbayibbele. Kabayoowa kuti ulachincha chikombelo. Pesi utazumizyi kuti bamwi bakulesye kuba mweenzinyina waJehova. NguuMweenzuma mupati wiinda boonse ngukonzya kujana.

23, 24. (a) Nkaamboonzi nweelede kunoobuzya mibuzyo? (b) Tuyoolanga-langaanzi muchaandano chitobela?

²³ Nuya bwiiya Bbayibbele, kuli zintu nzutakonzyi kumvwisisisya. Utayoowi pe kubuzya mibuzyo naa kukumbila lugwasyo. Jesu wakati, tweelede kulichesya mbuli bana baniini. (Matayo 18:2-4) Alubo bana babuzya mibuzyo myiingi. Leza uyanda kuti ujane nsandulo. Aboobo yiiya Bbayibbele chakubikkila maanu ikuti ubone kuti nzulokwiiya nisimpe na.​—Bala Incito 17:11.

²⁴ Nzila mbotu yakuziba Jehova nkwiiya Bbayibbele. Muchaandano chitobela, tuyooziba kaambo Bbayibbele nchilisiyene aamwi mabbuku.