Leza Wakalenga Julu Anyika

Jehova Leza Mulengi wesu. Wakalenga zintu zyoonse kuswaanizya zintu nzitukonzya kubona anzitutakonzyi kubona. Wakasaanguna kulenga bangelo biingi katanalenga zintu nzitukonzya kubona. Ulizi na kuti bangelo bali biyeni? Bangelo nzilenge zili mbuli Jehova. Tatukonzyi pe kubabona mbuli mbututakonzyi kubona Leza. Mungelo wakusaanguna Jehova ngwaakalenga wakaba mugwasilizyi wakwe. Mungelo ooyo wakagwasyania aJehova mukulenga nyenyeezi, mapulaneti azimwi zintu zyiingi. Imwi pulaneti njibakalenga, ninyika eeyi mbotu njitukkede.

Kuzwa waawo, Jehova wakalenga zintu zyakali kuyoopa kuti bantu abanyama bakonzye kukkala mulinjiyo. Wakachita kuti zuba limunike aanyika. Alubo wakalenga zilundu, lwizi amilonga.

Wakachitaanzi kuzwa waawo? Jehova wakati: ‘Ndiyanda kulenga masokwe aminsamu.’ Kuzwa waawo, kwakatalika kumena minsamu iisiyene-siyene iizyala michelo, zisyu amaluba. Mpawo Jehova wakalenga banyama boonse—bawuluka, bakkala mumaanzi, bayavula abeenda abula. Wakalenga tunyama tuniini tuli mbuli tusulwe abapati bali mbuli nzovu. Nguuli munyama nguyandisya?

Mpawo Jehova wakabuzya mungelo wakusaanguna kuti: “Atupange muntu.” Bantu bakali kunoosiyana abanyama. Nkaambo bakali kunookonzya kuchita zimwi zintu, kwaambuula, kuseka, kukomba akulangania nyika abanyama. Ulizi na kuti muntu wakusaanguna wakali ni? Atubone.