Leza Wakalenga Mwaalumi Amwanakazi Bakusaanguna

Jehova wakalima muunda uutegwa Edeni. Muunda ooyo wakali amaluba, minsamu abanyama. Kuzwa waawo, Leza wakalenga muntu wakusaanguna, Adamu kabelesya bulongo akumufulida muuya mumpemo. Ulizi na kuti niinzi zyakachitika kuzwa waawo? Muntu ooyo wakaba muumi! Jehova wakabuzya Adamu kuti alanganie muunda akuti awuzike banyama mazina.

Jehova wakapa Adamu mulawu uuyandikana. Wakabuzya Adamu kuti: ‘Michelo yoonse yamumuunda ulakonzya kulya pesi utalyi michelo yamunsamu uuyandikana. Ikuti walya michelo yamunsamu ooyu uyoofwa.’

Mukuya kwachiindi Jehova wakati: ‘Ndiyoochitila Adamu mugwasilizyi.’ Wakapa kuti Adamu awone ng’onzi mpati, mpawo Leza wakabelesya kampango kaAdamu kuti amupangile mukayintu. Mukayintu ooyo wakali Eva. Adamu aEva bakaba mpuli yakusaanguna. Adamu wakamvwa biyeni naakabona mukayintu wakwe? Adamu wakabotelwa loko zyakuti wakati: ‘Jehova walenga muntu kuzwa mukampango kangu! Ooyu uli mbuli ndime!’

Jehova wakabuzya Adamu aEva kuti bazyale bana akuti bazuzye nyika. Wakali kuyanda kuti babelekaamwi kuchitila kuti nyika yoonse ibe paradayizi mbuli mbuwakabede muunda waEdeni. Pesi teembuzyakaba pe. Niinzi zyakazoochitika? Tuyooyiya zyiingi muchiiyo chitobela.