Adamu aEva Teebakamuswiilila Pe Leza

Limwi zuba Eva naakali alikke, nzoka yakasaanguna kwaambuula anguwe. Yakati: ‘Nisimpe na kuti Leza wakamukasya kulya michelo yaminsamu yoonse?’ Eva wakasandula kuti: ‘Michelo yoonse tulayilya, kunze kwamichelo yamunsamu uumwi luzutu. Ikuti twalya michelo yawo, tulafwa.’ Mpawo nzoka yakati: ‘Tamukoofwa pe. Pesi kuti mwawulya, mulaba mbuli Leza.’ Makani aaya akali achoonzyo na? Peepe, kwakali kubeja. Pesi Eva wakaasyoma. Naakawulangisisya muchelo ooyo, wakawuyanda. Wakalya muchelo, mpawo umwi wakawupa Adamu. Adamu wakalizi kuti bakali kuyoofwa kuti baleka kuswiilila Leza. Nikuba boobo, Adamu wakawulya muchelo ooyo.

Mubuzuba oobo, Jehova wakaambuula aAdamu aEva. Wakababuzya kuti nkamboonzi nibakaleka kumuswiilila. Eva wakatamizya nzoka, mpawo Adamu wakatamizya Eva. Jehova wakatanda Adamu aEva mumuunda waEdeni, nkaambo bakaleka kumuswiilila. Jehova wakabikka bangelo apanga lyakali kuvwiilima mulilo kumanjililo amuunda kuchitila kuti batabweedi lubo.

Jehova wakaamba kuti ooyo wakeena Eva alakwe uyoosubulwa. Pesi teeyakali nzoka choonzyo yakaambuula aEva. Jehova wakalenga nzoka zitaambuuli. Pesi mungelo mubi nguwe wakapa kuti nzoka eeyo yaambuule. Wakachita oobo kuti ayene Eva. Mungelo ooyu utegwa nguSaatani Dyabbulosi. Mukuya kwachiindi, Jehova uyoomunyonyoona Saatani kuti atonooyeni bantu kuti kabachita zibi.