Bantu Bali Musanu Abatatu Bakafutuka

Nowa, mpuli yakwe abanyama bakanjila mubwaato. Jehova wakajala mulyango alimwi mvula yakasanguna kuwa. Mvula yakawa loko zyakuti bwaato bwakasaanguna kwiibuka. Nyika yoonse yakazula maanzi. Bantu bakali aanze abwaato bakafwa. Pesi Nowa ampuli yakwe bakali kwabililidwe mukati. Bakabotelwa loko akaambo kakuti bakaswiilila Jehova!

Mvula yakawa kwamazuba aali 40, sikati amansiku. Niyakamana kuwa, maanzi akasaanguna kuyosa. Kumamanino, bwaato bwakakkala ajulu azilundu. Nikuba boobo, maanzi akachili miingi, nkinkaako, teezyakali kuchita pe kuti Nowa ampuli yakwe bazwe mubwaato mpawaawo.

Mukuya kwachiindi maanzi akayuminina. Nowa ampuli yakwe bakakkala mubwaato kwachiindi chiinda munyaka. Kuzwa waawo, Jehova wakababuzya kuti bazwe mubwaato. Bakabotelwa kuti Jehova wakali wabafutula alimwi bakatondeezya kulumba kwiinda mukutuula chipo kuli nguwe.

Jehova wakabotelwa achipo eechi. Wakasyomezya kuti takooyoonyonyoona lubo nyika kabelesya zambangulwe. Wakatondeezya kuti chisyomezyo chakwe nchachoonzyo kwiinda mukuchita kuti kube fulichoongo kujulu. Ulimuzi na fulichoongo?

Alubo, Jehova wakabuzya Nowa ampuli yakwe kuti babe abana akuti bazuzye nyika.